譚玉瑛接受本刊訪問時坦言，新約人工少一半：「呢啲係睇時勢，咁多年嚟係有好多嘢唔開心！」
滾熱辣
無綫改約逼拍劇 譚玉瑛出書吐 32年寃屈
兒童節目元老譚玉瑛在無綫默默耕耘 32年，冇功都有勞，但無綫偏偏唔識寶。近日有指無綫藉改革兒童節目為由，向譚玉瑛開刀，要她由幕前變顧問，更遲遲未與她傾續約。
事件曝光後，網民仗義狂插，總經理李寶安不得不公開澄清：「本人同 TVB冇搞譚玉瑛。」希望平息炒魷風波。𤓓味濃烈，綜藝科製作總監餘詠珊嗱嗱聲召譚玉瑛傾約，不過一簽要簽兩份，包括兒童節目顧問合約和普通藝員合約。譚玉瑛隨時要捱更抵夜拍劇做閒角。
周二（ 18日），譚玉瑛接受本刊訪問時慨嘆：「擺明就係收入少咗啦，我做曬心理準備。」遭公司放棄，譚玉瑛正計劃出書，將入行以來的寃屈一次過爆發。
逢周末和周日返電視城錄影《放學 ICU》的譚玉瑛，上月底如常返工時突然收到公司通知，要改變合作模式。譚至今依然歷歷在目，她說：「我係有心理準備，每一件事有開始就有完結。不過突然間發生，又咁短時間知道唔需要做（主持），我係比較愕然。」
人工少一半
譚玉瑛本月底約滿無綫，忽然要放棄 32年的工作崗位，當然唔捨得。如要留守無綫工作，譚刻下要同時簽兩份合約，缺一不可。上周六（ 15日），餘詠珊就 call譚玉瑛返公司解釋合約條款。譚對此說：「佢今次要我簽兩種合約，第一種（兒童節目顧問）係 part-time staff；另外一個（普通藝員約）就係（一年）十零個騷，變咗係一個月一個騷咁上下。」據知譚玉瑛現時的合約是包騷藝員合約，騷價七千蚊。由於她每周至少有三集《放學 ICU》出街，月入最高可達九萬。而新簽的兩份合約，第一份兒童節目顧問有點兼職性質，人工不多，兼冇僱員福利；而第二份普通藝員約，無綫只承諾每月包一個騷，若冇安排工作的話，變相月入只得七千。譚對此說：「擺明收入就係少咗（少咗一半？）有。影響我生活，而且合約簽得一年，一年之後係點，冇人知。我要諗下（續約）。」
捱更抵夜拍劇
過往譚玉瑛工作時間穩定，由於要遷就參演嘅小朋友返學時間，她每周只返星期六和星期日，由朝早八點錄到晚上八點。若譚肯簽約的話，唔排除被公司安排拍劇做人阿媽，變成甘草演員。她說：「如果做戲都係呢啲角色㗎喇，我唔介意。（扮老角？）哎吔！我諗你真係冇睇我兒童節目喇！我出親鏡都係阿婆嚟㗎，都係做戲之嘛！」不過提到拍劇工時長，兼要捱更抵夜，她就耍手擰頭，「我生活好規律㗎，平時早睡早起。講真，其實我唔係好啱娛樂圈。」
忽然被公司投閒置散，難怪譚玉瑛近日萌生退出念頭，她無奈說：「哎，見步行步囉！我係好理解，作為一個製作人有權而且有責任鍾意點做就點做，咁我咪同自己講要慢慢適應囉！日子總要過，咩開心同唔開心嘅事情總會過去嘅！（好化喎？）年紀大喇，仲喺度忟忟憎憎，仲十八廿二咩！」
搵星爺芷珊寫序
譚玉瑛為人豁達，但不快始終要吐。據知今次事件發生後，譚隨即成為網民擁護對象，有出版商更立即食住條水，搵她出書講人生高低起跌。她說：「係有出版社搵過我，不過好初步，但首要條件都係搞掂合約先。（主力寫喺無綫受到嘅寃屈？）寫嚟寫去都係嗰啲嘢，我喺無綫咁多年嚟係有好多嘢唔開心，不過我放低曬，我性格係咁，費事激親自己。成事的話，都有可能搵星仔同芷珊寫序。其實呢件事發生之後，有好多人關心我，芷珊都有 WhatsApp我了解件事。」
今年 50歲的譚玉瑛，現時與初戀男友同居愉景灣，「我哋拍咗拖成 30年，冇諗過結婚，大家有共識唔生小朋友。我覺得做人唔算係一件好愉快嘅過程。我整咗個人出嚟，都唔 make sure佢會一生快樂，咁（指生仔）講唔通囉！
三度逼離場
譚玉瑛經歷過《 430穿梭機》、《閃電傳真機》、《至 NET小人類》及《放學 ICU》四個兒童節目年代。雖然地位崇高，但近年經常傳出她被無綫炒魷的消息。
00年易名惹揣測
00年，無綫將有十年歷史的《閃電傳真機》改為《至 NET小人類》，並且加入不少年輕新主持。當時有傳譚玉瑛遭淘汰，但後來證實只是謠言一則。
04年爆騷出事
無綫 04年籌備新兒童節目《放學 ICU》時，有指無綫嫌譚玉瑛長期爆騷，人工過高，決定停用她。當時一班藝人力挺譚，無綫順從民意，繼續起用她做《放》校長。
09年卡通做主角
09年，無綫又稱要創新兒童節目，決定設計一個卡通人物取代一眾主持，更稱對譚玉瑛作特別安排，最後譚當然再次大步檻過。
橫行霸道
自殼王陳國強上任後，無綫風雲色變，不時推出辣招：
阻賺外快
無綫為加快劇集拍攝進度，去年底忽然禁止一眾小生花旦拍劇期間抽時間接 job搵真銀，令藝人曝光率減少，例如黃翠如對上一次出席的收錢活動已經是 1月底。
|
鍾意就快D Share啦！
|
|
|