[FACE 356 外地娛樂] 2014大勢新男團 WINNER BIGBANG GOT7 Tasty JJCC JC,BIGBANG,JJCC,WINNER,GOT7,Tasty,賈曉晨,JJ,Jessica C,MF,

WINNER各成員年齡由 19歲到 22歲，個個年輕力壯，經 YG一直培訓，個個除咗唱得跳得，能夠砌低 Team B的原因是各人都比較有個人特色，一亮相， fans已能認出邊個打邊個。喺男團多到數唔曬嘅 K-pop界，呢點好重要。

韓面

2014大勢新男團

韓風吹唔停，除《來自星星的你》再把韓劇推上高峰，連 K-pop熱亦有增冇減，單睇最近韓國熱爆男團 EXO-M襲港， 3千港女迫爆旺角，就知 K-pop威力驚人。

踏入 2014年，韓國 3大製作公司嗱嗱聲推出新晉嫩口男團應市。先有 SM力穀 2人雙胞胎組合 Tasty跟師姐少女時代搵食；再有 JYP推出，集韓國、香港、美國、泰國舞男的雜牌 7人組合 GOT7，接師兄 2PM棒。

而巨星夢工場 YG娛樂新棒，走 pop及 hip hop路線的 5人男子組 WINNER，跟師兄 BIGBANG一樣每位成員都有個人特色，最近更宣布跟住師姐 2NE1到亞洲巡迴演唱。咁本週六（ 22日） 2NE1香港騷大有機會見到 WINNER喎！

YG WINNER　 BIGBANG照住

由 YG娛樂打造的 5人新男團 WINNER，其實是透過去年 YG跟 Mnet合辦的節目《 WIN: Who is Next》中，將合共 11人的兩隊練習生分為 A、 B隊，互鍊 3個回合後，最後 A隊勝出隨即成為 WINNER出道，輸家 B隊要即時解散。

由 5個 19至 22歲嫩口男組成的 WINNER，經 YG嚴格訓練，再經節目《 WIN: Who is Next》勝出，必屬精英。學足師兄 BIGBANG主打 pop及 hip hop，又跳又 rap得的 WINNER，自去年勝出比賽後，便跟住 BIGBANG去日本做巡迴騷暖場嘉賓。踏入 2014年，師姐 2NE1開亞洲巡迴演唱， 5子亦跟住師姐周圍飛，據知本週六 2NE1來港開騷， WINNER亦大有機會出現暖場。

WINNER被封為 YG於 2014年的重頭武器， WINNER原定於上月推出處女迷你專輯試水溫，點知因師姐 2NE1要推出全新專輯《 CRUSH》，由於此專輯擺明狙擊死對頭少女時代的新迷你專輯《 Mr. Mr.》，所以 YG撥大量資源穀行 2NE1打仗，故被迫押後 WINNER處男碟的推出日期讓路給師姐，據估計 WINNER的處男碟，起碼要等到 4月先有機會出街。

除咗《 WIN： Who is Next》決鬥外， YG還特登開個節目叫《 WINNER TV》畀 WINNER 5子，而「師兄」 BIGBANG 5子包括勝利（左一）及太陽（右一）仲齊齊亮相，第 6集中 WINNER各成員粉墨登埸扮 BIGBANG各成員，笑到爆嘴。

YG一向慢功出細貨，上年 YG選拔新男團節目《 WIN： Who is Next》中，安排兩隊 A隊及 B隊鬥唱、鬥舞，最後由 A隊勝出，即變身為 WINNER，成為繼 06年出道的 BIGBANG後，第 2隊一手栽培的男團。

BIGBANG唔只幫手訓練 WINNER，上年 11月太陽推出新歌〈 Ringa Linga〉，仲搵埋 WINNER嘅南泰賢（紅圈）及宋閔浩出鏡拍 MV；之後 BIGBANG去日本開巡迴演唱會，亦帶埋 5子去日本，擔任開場嘉賓，畀足機會師弟曝光。

BIGBANG唔只幫手訓練 WINNER，上年 11月太陽推出新歌〈 Ringa Linga〉，仲搵埋 WINNER嘅南泰賢（紅圈）及宋閔浩出鏡拍 MV；之後 BIGBANG去日本開巡迴演唱會，亦帶埋 5子去日本，擔任開場嘉賓，畀足機會師弟曝光。

2014年，啱啱出道已有廣告商睇中，最近便幫韓國流行服裝《 NII》做代言，示範簡樸便服。

WINNER隊長薑勝允，早於 4年前參加 Mnet電視台嘅歌唱比賽《 Superstar K2》，當時曾晉身 4強。上年加入 WINNER前，薑勝允其實已經出過〈 It Rains〉等 3首單曲，唱功有番咁上下。

JYP GOT　聯合國嫩男

由音樂教父樸震榮主理的 JYP娛樂，市場策略奇怪，數年前捧紅 Wonder Girls及 2PM後，通通後勁不繼，人氣不斷下跌。踏入 2014， JYP終於有新男團推出，今次仲係有 1位香港成員的 7人男子組合 GOT7。

由 7名 16歲至 20歲嫩男組成的 GOT7，特色是將韓國、美國、香港及泰國 4個國家的精英集合而成，銳意攻打韓國本土以至海外市場，而對香港人來說， GOT7更有一個賣點，就是隊中有位土生土長的香港人成員 Jackson（王嘉爾）。

今年 1月中， GOT7已推出首張迷你專輯《 GOT IT?》，碟中主打歌〈 Girls Girls Girls〉更熱爆韓國，最高曾打入《 M！ Countdown》流行榜第 9位。出道唔夠兩個月， 7子更一連接拍兩個廣告，搵錢唔執輸。

一出道已俘虜韓妹，下一站將進軍日本，最近 7子便宣布，將於下月 4日先去東京舉行迷你演唱會，之後再攻落大阪舉行第 2個日本演唱會。 GOT7的鄰家壞男孩 style，一定冧死唔少㗎妹。

由 JYP打造的 7人新男團 GOT7，特色是 7個年齡由 16至 20歲的嫩男，分別來自韓國、美國、泰國及香港，極度國際化。處男碟《 GOT IT？》已於 1月中出籠，早前一行 7人更走去 Mnet皇牌音樂節目《 M！ Countdown》造勢。

GOT7被視為 WINNER最大競敵。 WINNER有 BIGBANG撐；而 GOT7亦唔執輸，有師兄 2PM幫拖穀氣勢，早前 2PM的澤演（紅圈）趁 GOT7上《 M！ Countdown》節目時，專誠走去後台打氣，好有心。

出道短短兩個月， GOT7唔只人氣爆燈，更受廣告商歡迎，最近一口氣接咗《 Natuur Pop》雪糕及《 Walk Fit》運動鞋兩個廣告，吸金力強。

隊中唯一香港隊員王嘉爾（ Jackson），只得 19歲夠嫰口。曾是香港劍擊隊員的他，除負責做 rapper之外，仲做埋功夫舞蹈表演部分，多才多藝。 Jackson是 GOT7最受歡迎的成員，演出時多數企中間。

SM Tasty　等足 2年

YG同 JYP都推出新男團強攻 2014樂壇， SM亦力捧由 2名中國籍孖仔組成的 Tasty迎戰。

原屬於 Woollim娛樂的 Tasty，早於前年出道，亦曾出過迷你專輯《 SPECTRUM》，但未能一炮而紅。直至去年 8月， Woollim宣布與 SM娛樂旗下的子公司 SM C&C合併後，星途才開始有起色。由於 SM近年銳意開發大中華市場，故想利用本身是中國人的 Tasty攻入中國及台灣市場。自去年底開始， Tasty唔只有份出席 SMTOWN的北京演唱會，之後更被安排跟 SM一姐女團少女時代，來香港及澳門開騷做暖場嘉賓。有 SM力穀，今年 Tasty應該可以同 WINNER及 GOT7砌過！

Tasty由一對來自中國大陸的孖仔大龍及小龍組成。二人同樣來自吉林， 5年前曾參加 JYP的選秀（ Audition）被取錄，但之後轉投 Woollim娛樂。雖然出過碟，但一直紅唔起。直至上年 Woollim娛樂跟 SM C&C合併後形勢逆轉，有 SM照住，今年 Tasty將有大把握機會曝光上位。

埋到師姐堆

上年 11月 Tasty曾跟住 SM一姐女團少女時代去過香港開騷，上月少時澳門站巡唱， Tasty再次擔任暖場嘉賓又唱又跳。而一對孖仔最近亦埋到師姐允兒及孝淵堆，最緊要有師姐關照。

去年 11月推出的單曲〈離開（ Day'n Night）〉的 MV， Tasty孖仔專誠到香港取景，仲深入土瓜灣舊區拍攝，拍出香港特色。

JJCC　成龍踩入 K-pop

近年 K-pop橫掃全世界，連曾自稱為「半個韓國人」的成龍亦唔執輸，原來秘密培訓一隊名為 JJCC的 5人男子組合，將於本週四（ 20日）在韓國正式出道。

JJCC由 3個韓國人， 1個美籍華人及 1個澳洲籍華人組成， 5人平均年齡為 20歲，最煞食係平均身高達 5呎 11吋，個個高大威猛。據知成龍為培養他們可以同韓國男團一較高下，不單接受連串嚴格訓練，特別是隊長，更經歷長達 9年的練習生生涯。不過韓國各大巨星工廠的老闆即使唔係歌手出身，之前都係音樂人，而成龍就係動作巨星，所以有唔少網民都質疑 JJCC的音樂實力，仲笑佢哋可能只係雜技團。

經成龍嚴格訓練的 5人男團 JJCC，將於本週正式出道，隊中有 3名韓國人， 1名美籍華人、 1名澳洲籍華人，同 GOT7一樣極為國際化，不過成員的名及背景就至截稿前仍未公布。

JJCC隊長 Simba身高 6呎 2吋，高大威猛，個樣仲有啲似 F4嘅朱孝天。

鍾意就快D Share啦！

下一篇 》