面對面
坐上紅 Van食燒賣 文詠珊
上月尾生日收到車價 230萬林寶做禮物的 Angelababy，大街大巷獲男友黃曉明連人帶車速遞上門，當一眾港女恨到流曬口水之際，突然又被踢爆早於一個月前已得知有車收，仲係張智霖揸夠唔玩的舊款超跑，都咪話唔瘀皮。
同樣 25歲的文詠珊（ JM），與 Angelababy同期出道又是曾經一度的閨蜜， JM沒有億萬小生男友包餐廳做大龍鳳、更沒有福分收三手林寶。
剛去完巴黎時裝周，這天入到將軍澳「壹傳媒」大樓的 JM說：
「我份人好簡單，唔需要呢啲，我鍾意自己賺錢買嘢！」
的確，準時到達做訪問的 JM，望著眼前 11蚊 4粒的小食部燒賣，笑得比見到林寶即刻開眼的 Baby更真更純。
林寶同小巴， JM被選中坐上了《紅 Van》，起碼開往過柏林之路；自己賺自己買，燒賣都分外好食。
小巴有火花
食粒燒賣都冇時間的 JM，強調自己近來很忙，「前排去完柏林做影展，上個星期去咗巴黎 fashion week，嚟緊又要忙住宣傳新戲，有排忙！」
令 JM忙到甩轆的新戲《那夜淩晨，我坐上了旺角開往大埔的紅 Van》，早前入圍「第 64屆柏林國際電影節」全景單元，雖然輸畀埃塞俄比亞電影《 Difret》，不過這架由 MK開出的紅 van，卻將出道時形象 MK的 JM，第一次載到歐洲舞台，連美國雜誌《 Variety》亦點名讚 JM演技掂。
「第一次參加外國影展，感覺到觀眾同傳媒都好尊重演員，原來外國人都會對香港題材的電影有興趣。未接套戲前，我已經睇過小說，覺得劇本好吸引，點知冇耐導演陳果就搵我演 Yuki（女主角，性格神經質，同男主角黃又南有感情線）！其實呢套戲好特別， 17個人在小巴入面，戲分對白都好平均，冇話邊個特別搶，反而令我感受到成個團隊的火花！」
唔係特別多戲特別搶鏡，依然獲得外國傳媒點名畀 like，換言之，即係 JM真係做得好出色？「我自知經驗唔夠，所以每次接到角色，我都會花時間揣摩，諗嚇點樣加少少小動作同語氣，去令個角色更有個性，又會盡量同導演溝通。例如拍《大追捕》要一人分析兩角，我真係閉關 3個月入戲同練琴，效果未必係完美，但至少我自己滿意。」
Baby係普通朋友
再努力做好自己，但始終拍來拍去仍然是本土小品居多，比起 Angelababy拍親都係大片，早已榮升「億萬女星」，羨慕嗎？
「億萬女星有邊個唔想做？我都好想，但真係要等機會。我唔係角色唔啱都去接的人，我都想有機會衝出香港，唔係淨係北上，甚至亞洲、歐洲都想去，不過一定要有好劇本先得。之前都有幾個內地劇本搵我演，不過公司同我覺得角色、發揮等各方面都唔太合適，所以推掉唔拍。」
同年出道，大家都係 25歲，唔計獎項人氣同其他成就，單睇微博粉絲人數， Baby有 3,929萬（比 G.E.M.的 837萬更多）， JM只得 44萬。唔覺得行得比「好姊妹」慢嗎？
「我唔 care外界點睇，我唔鍾意同人比較，呢行係長途賽，可以由 model做到今時今日有得拍戲已經好意想不到，快同慢唔使 take it serious，最重要係行到最後會點。話唔定我呢一兩年遇到個好劇本，突然好多人識呢？我唔識得用旁門左道、亦唔會諗不切實際的事，每個人性格唔同，作風同目標唔同，我係一個我行我素的人，總之我𠵱家做每一件事都係我想做，最緊要唔會後悔！追其他人的步伐係好辛苦，好多事要講天時地利人和，再加自己努力同運氣先得！」
講運氣，相信 JM自己都唔否認， Baby確係好運得多。 JM 09年簽約黎明旗下做「模 Art」，可惜雷聲大雨點小， 5年來進步不大，有傳將過檔新公司；相反， Baby有個進取的經理人幫手開拓國內外市場，更有大大個海綿蛋糕做靠山、做盲公竹。識於微時但現階段明顯高下立見，今時今日仍然可以以姊妹相稱嗎？
「我同 Baby𠵱家唔算係好 close的朋友，只可以話係普通朋友，太耐冇見喇！當初大家都細個，又有個細佬，覺得兩個人的背景都好似，自自然然就啱傾玩得埋；但呢行太多是非，又有外在因素令我同佢有誤會，加上工作太忙，慢慢就開始疏遠。緣分呢樣嘢，都冇話可唔可惜！」
男友唔一定要靚仔
Angelababy有男友送車送樓，其實 JM都唔弱，同佢傳過緋聞的，大部分唔係明星就係富二代，由前度李冠鋒開始， Moiselle太子爺陳柏熹、「翻版李準基」衞以德（圈外人、製衣廠太子爺）同餘文樂，最新鮮熱辣仲有謝霆鋒。
「係傳媒寫佢哋有錢啫，你又知佢哋有？我唔係鍾意收貴重禮物的人，我寧願諗點樣好好賺錢，買自己鍾意的；我份人好簡單，朋友話我鱷魚頭老襯底添！平時唔開心，我會一個人揸車兜風，或者食嚇甜品焗嚇蛋糕，好快就冇事！
「我可以好坦白同你講，我𠵱家真係冇拍拖。自從（跟李冠鋒）分手之後，我就一直單身，話時話，咁耐以來都冇試過單身咁耐。做呢行要搵男朋友真係唔易，連食餐飯都要俾人影，佢真係要好愛好愛你先忍受得到囉！」
圈中人一定習慣面對鏡頭，謝霆鋒適合嗎？
「同霆鋒係好朋友，呢刻冇事需要回應。其實我搵男友最緊要啱 feel，點解一定要靚仔先？靚仔係會加分，不過如果性格唔夾，幾靚仔幾有錢都係假」
對感情事答得大方得體，即使面對多年來的負面新聞， 25歲的 JM繼續睇得開。
「好似前排有報道話我去蒲蘭桂坊飲醉酒，搞到我朋友要爆樽保護我，其實我只不過係朋友生日會飲咗少少，未至於醉，我記得我當時仲識自己行添！不過我明白傳媒一定係要咁寫，唔通話我去蒲但好清醒咩？冇所謂啦，反正係娛樂新聞，最緊要娛樂到讀者啫！」
|
鍾意就快D Share啦！
|
|
|