[FACE 356] 轉運 林寶接送 陪食 3粒鐘 蔡淇俊轉撈保險冧闊太 蔡淇俊,MF,

長達 3粒鐘的晚飯之後，行去停車場期間，蔡淇俊仍然雞啄唔斷，好吹得！

真面目

轉運　林寶接送　陪食 3粒鐘　蔡淇俊轉撈保險冧闊太

出道有「翻版霆鋒」之稱的蔡淇俊，高大靚仔，出道時孭飛拍過《赤沙印記@四葉草.2》、又曾受力捧演處境劇《同事三分親》，可惜在新劇《叛逃》和《飛虎Ⅱ》已淪陷到大茄角色！

捱足 12年點會唔心淡，最近操肌做大隻仔的蔡淇俊，原來已由「親生仔」轉為普通藝員約，私底下更搵定後路，轉行撈保險。本刊早前直擊蔡淇俊跟一位周身名牌的闊太共進燭光晚餐，係唔係 sell保險就唔知，不過餐飯就食足 3粒鐘，飯後仲有林寶接送，認真架勢。所以話，靚仔幾時都係著數啲嘅！

29歲蔡淇俊出道至今發展平平，近年仲愈撈愈黴。前路茫茫，蔡淇俊約滿無綫經理人合約後，曾試過推銷 nu skin美容減肥產品，去年更轉行做保險，懂得精打細算又有靚仔本錢，冧爆闊太客仔。

蔡淇俊靠樣搵食，一得閒就會跑步加健身，時刻保持至 fit狀態，差唔多 6呎嘅蔡淇俊，型過唔少小生㗎。

04年，蔡淇俊因拍《四葉草》而認識陳自瑤 Yoyo，有傳他介入 Yoyo和阿感的戀情，令二人分手收場。 Yoyo現已成為當紮小生王浩信愛妻。

餐廳玩手指

「阿俊𠵱家係普通藝員約，鬼咩！拍親都係大配角，所以走咗去做保險。阿俊高大靚仔，只要把口 sell得，一定可以搵到錢，佢好勤力做 gym做 facial keep住自己，好似撈得唔錯。」知情人士透露。

本月 1日，晚上 8時多，本刊撞正蔡淇俊和一名打扮光鮮的闊太，在尖沙咀一間高級意大利餐廳共享晚餐。整個飯局長達 3粒鐘，蔡淇俊全程望實對方，一言一語逗得闊太不時大笑，其間蔡淇俊更用手指撩對方的手指，可見關係熟絡；而到埋單環節，闊太就搶住出手，蔡就繑埋雙手；晚飯過後，兩人由商場步行至停車場，闊太揸住架林寶堅尼，做埋柴可夫司機接送。

兩人在餐廳不時抬住頭深情對望，蔡淇俊仲出埋「指功」，女人真係好難抗拒嘅。

靚太埋單

轉為普通藝員合約後，新劇跌到五、六線，轉戰保險行業可能搵得仲多，呢餐闊太搶住埋單，蔡淇俊又慳番餐。

「最緊要賺到錢！」

蔡淇俊正為新劇《再戰明天》開工，只有普通藝員約，工作量自然不多，平日有跑步和健身，以保持健碩身形，加上面部勤保養， 29歲的他仍能保持青靚白淨兼大隻仔的身形。

本刊週一（ 17日），致電曾與蔡合作的姚子羚，問到有關他轉行做保險一事，她說：「我只知佢賣 nu skin嘅嘢，冇幫襯過佢，自己有買保險，不過就唔知佢做保險。」至於另一好友徐榮說：「我自從拍完《愛．回家》，少見咗佢，所以唔知佢係咪做保險，做都冇所謂，最緊要賺到錢！」當事人蔡淇俊則回應本刊說：「其實 4、 5年前無綫同我傾約嗰陣已經轉咗普通藝員合約，𠵱家拍劇為主，冇做保險嘅嘢，不過好多年前已經考咗保險牌。嗰日同我食飯嗰個係好朋友，識咗好多年！（當日佢埋單，又揸靚車住獨立屋喎？）有冇錢唔知，總之佢環境好過我！自己都仲好有心㗎，會繼續留喺無綫拍劇。」啱嘅！無綫捧唔起，只好靠自己！

徐榮：「做都冇所謂，最緊要賺到錢。」

姚子羚：「我只知佢賣 nu skin嘅嘢！」

超跑車主豪住億半獨立屋

闊太所揸的橙色林寶堅尼，據資料顯示是由一位叫林岱的男士登記，林岱現為 10間有限公司的主席，手持超過 3億物業，過去一買一賣賺取 1億多盈利。林岱更和一女子卓淑卿曾聯名持幾個物業，而林岱亦有一妹。

闊太做埋柴可夫司機，揸住架橙色林寶堅尼接送，排場十足。

本刊查證後，橙色林寶堅尼的登記人叫林岱，而登記地址在上水的禦林皇府，以林岱的公司持有，此物業市值$1.5億。

林寶超跑嘅車主林岱，手持 3億幾物業，過去售出 11個物業，賺 1億幾，圖為林岱與其妹林寧。

愈撈愈黴

02年藝員訓練班出道的蔡淇俊，雖然有「翻版霆鋒」之稱，但無助演藝事業，入行近 12年，最為人熟悉作品只得《赤沙印記@四葉草.2》和《同事三分親》，之後仲愈撈愈黴，由高峰期男二跌到大茄。

'04擔正

04年，蔡淇俊首次擔正，與司徒瑞祈及陳自瑤等合演青春劇《赤沙印記@四葉草.2》，當時有「翻版霆鋒」稱號。

'07力捧

事隔 3年，曾勵珍親自欽點演出 364集處境劇《同事三分親》，蔡淇俊拍住一姐關詠荷，第二次擔正男主角。

'10-'13大茄

蔡淇俊轉為普通藝員合約後，拍劇出鏡機會每況愈下，於《巨輪》一劇更淪為大大大茄。

鍾意就快D Share啦！

下一篇 》