熱爆娛樂: [忽然1周 978] 耆英騷爛尾　薰妮怒轟區瑞強四宗罪薰妮,MW,

2014年4月25日星期五

[忽然1周 978] 耆英騷爛尾　薰妮怒轟區瑞強四宗罪薰妮,MW,

娛樂喧

耆英騷爛尾　薰妮怒轟區瑞強四宗罪

唱民歌搵食的區瑞強，本月初在灣仔伊館開騷，請來薰妮、曾志偉等多名嘉賓助陣，結果三場爆滿。食髓知味，區下月再於新光戲院搞四場騷，繼續玩群星效應。

不過門票開賣冇耐，區瑞強忽然以場地裝修為由取消演唱會。據知演唱會突然爛尾，全因嘉賓之一薰妮辭演，她在 facebook狂數區瑞強四宗罪，力斥對方完全唔尊重自己。薰妮向本刊說：「佢（區瑞強）令我太失望！」今年 63歲的薰妮，依然好火。

其他影片： >>63歲薰妮怒轟區瑞強：佢令我太失望

薰妮金曲〈每當變幻時〉令她在 70年代走紅，不過婚後她決定放棄樂壇。

憑〈每當變幻時〉，一曲走紅的薰妮，於 80年代淡出後，一直相夫教子。不過年前她遭有酗酒病患的丈夫虐打，最後決定離婚，重出江湖。可惜她 08年又因輸血感染紅斑狼瘡症，復出之路重重波折。移居加拿大的她，間中會來港演出搵食。不過今次她客串助陣區瑞強下月舉行的演唱會，卻搞出大頭佛。

不滿歌酬

賣飛唔夠兩星期，薰妮突然在 facebook宣布辭演，更公開了一封她早前寫俾區瑞強助手「 Camping」的一封信，交代辭演真相。她在信中怒轟區瑞強四宗罪：第一，區瑞強未獲得她同意擅自出演唱會廣告；第二，不滿區俾她的歌酬與「某某人」一樣；第三，區由始至終冇徵詢過她想要幾多錢歌酬；最後，插區將她相片求其放在海報上，連新人都不如。她在 facebook說：「我是一個念舊的人……可是這一次的不帶尊重安排……明顯感覺到他（區瑞強）對我的輕視，我的心傷了。」

認識接近 30年的薰妮和區瑞強突然反面，當然並非一朝一夕的事。知情人士說：「今個月初搞嘅伊館騷，佢哋表面好 friend咁，但實則區瑞強亦嫌薰妮麻煩，埋怨佢經常夜媽媽先現身綵排，搞到其他歌手同樂隊就曬佢一個。區瑞強知佢麻煩，今次新光騷特登將佢嘜頭擺正海報中間，又俾佢唱足五首歌，但佢又唔滿意自己嘅歌酬竟然同麥潔文平起平坐。佢臨時縮沙，搞到區瑞強頭都大埋。」據知這類群星演唱會，大部分歌手都只收五位數大利是作為酬勞，但薰妮認為此舉對她有欠尊重。

禍不單行

近日與區瑞強反目的薰妮，上周五（ 18日）出席張耀榮喪禮，泊車時撞到後面客貨車，即時搵司機理論，認真猛火。

薰妮辭演新光騷，早前更在 facebook大鬧監製區瑞強，並表示絕不為歌酬屈服。

區：佢情緒有起伏

一直低調的薰妮忽然在網上炮轟區瑞強，記者聯絡她時，依然氣難下。她說：「坦白講，我移民咗加拿大 17年，佢（區瑞強）搵我幫手，我二話不說即刻應承，但佢今次嘅處事方式令我太失望喇！」她原本打算召開記招，公開指責區瑞強的不是，「係呀！我想開記者會㗎！我都要向自己嘅 fans交代，佢哋好多人買咗飛係想嚟睇我，不過我最近整親個鼻至唔開記招。總之呢件事我好傷心。（係咪唔滿意歌酬同麥潔文一樣？）既然依家個騷取消咗，仲有咩好講啫！」

記者就此事搵過區瑞強了解，他上周五（ 18日）出席活動時，就解釋新光戲院要裝修而令演唱會延期至 10月，完全與薰妮辭演一事無關。他說：「依家要重新度過曬啲藝人期，薰妮話要去日本醫病，所以未知到時佢得唔得喎！（薰妮喺 facebook開名鬧你？）哎，佢啲嘢我唔知，我都唔睇 facebook嘅！可能演唱會有壓力，影響到佢情緒，例如佢嚟我 4月嗰個演唱會，都要夜啲先嚟，佢話唔曬得太陽，又話把聲唔好，口好乾呀咁！好奇怪㗎，嚟練歌都要飲住可樂。（你同佢不和？）我冇嘢喎！我百毒不侵㗎啦，我點會同人唔啱啫！冇所謂啦，啱啱撞到新光要維修，咪延期囉！」不過他愈講愈亂，暗示曾和薰妮鬧得不快，「依家都冇嘢啦，仲講嚟做乜吖！佢情緒有少少起伏啫！」

記者亦有致電新光，但職員只說：「總之買咗區瑞強啲飛，就一定五月底之前退飛。」並稱對裝修一事不知情。