明叔坦承自己霸地，但認為自己不是去偷去搶，亦無殺人放火，是「好人」一個，「四叔講得自己咁偉大，希望佢開嚇恩。」
財經脈搏
霸地明叔鬥四叔「唔要一無所有！」
去年八月，李兆基（四叔）慷慨捐出元朗馬田壆農地，以建屋幫助年輕人置業。但事隔八個月，現場未有動土痕跡，連英泥都無一包！原因之一，是這塊捐出的農地上，仍有一戶賴死不走。在上面霸地種果樹、花卉兼自住的花農陳偉明，霸地已十多年，企硬不搬，「我呢度五萬呎，佢起曬所有樹，喺第二度俾我種過」他又攤一攤手說：「四叔話要幫年輕人嘛，我屋企都有三個年輕人住喺度等佢幫！」塊地捐極「唔出」，四叔今勻真是「捐錯地」。
陳偉明（明叔）經營的「田香花園」，佔地約五萬呎，種植果樹為主，就算早前黑雨兼落雹，園內仍見有大量當造的人參果、蓮霧果實，而芒果、碌柚、荔枝等樹亦開滿花。他一家住在這裡，一生事業也在這裡。過往有不少報章在農曆新年前後訪問陳偉明，封他為「水仙王」，陳氏已當正這裡是他「五星級的家」。
當初恒基選中並要捐出這塊地，已早作部署，閃電入稟，指出一直有向陳偉明的叔父陳文忠收租，故陳偉明不屬「逆權侵佔」。上月中法庭裁定，恒基勝訴。然而，五十多歲的陳偉明不服，「事實唔係咁！我從來一蚊租都無交過。我根本唔係陳文忠姪仔，只係撞啱大家都姓陳！當年來到，仲係陳文忠教我霸地㗎！我問佢啲仔女會唔會接手耕田，佢話唔會，我先喺附近霸地種樹。話恒基八○年用幾十萬買呢度，我夠投資咗幾百萬落去」
根據入稟狀及判辭，龍翔發展（恒基旗下公司）九三年租地予村民陳文忠，其間陳文忠擅自轉租予陳偉明，○四年陳文忠去世，租約由兒子繼承。一三年三月租約期滿，土地未有交回，龍翔發展於去年七月中入稟要求收地，即是四叔公布捐出馬田壆地的大半個月前。「逆權侵佔」意指擅自侵佔私人土地超過十二年，就可申請「逆權管有」土地，成為擁有人。由於陳文忠兒子確認有交租予恒基，陳偉明在法律面前吃了大虧。
搵社工幫拖
發展商要趕走人，手法當然不止於此，「一一年恒基向城規申請，喺呢度起十八幢四層高住宅後，一時有警察來話有人投訴有黑工，一時地政又話我呢度唔可以種樹，要清走，又有啲人新年入嚟，問我要二百盆年桔！」
雖被趕絕，但無讀過書的陳偉明，甚懂得保障自己權益。其收到的律師信，都是由關注事件的社工、環保團體及議員為他解讀。事實上，記者採訪途中，亦有一位社工突然到場，與記者一同跟明叔、明嬸一起午膳。記者問明叔何以在飯廳安裝四部閉路電視，他指是社工們教路，以應付不斷前來騷擾的各路人馬。
一二年，他霸用了十多年、隔鄰一幅並不屬恒基名下的農地，亦突然易手，要求他搬走。「嗰個新業主，都係恒基啲艇仔。佢哋收地有一套手法，專由你門口開始收，封咗你條路先。」
明叔繼續爆大鑊：「梁福元（鄉議局執委）嘅荔枝山莊俾人話霸官地時，佢仲有時間帶六、七個人來話幫我調停。我以前幫梁福元屋企同荔枝山莊打理花花草草㗎，佢叫我『花仔』嘅。佢啲衰嘢我知道曬，佢選十八鄉個位，都係想從調停中搵著數啫！」陳偉明續說：「又叫我搵沈豪傑（元朗區議員兼律師）幫手，打嚟幾次話：『花仔，出嚟飲燒酒傾嚇啦』，假情假意！我唔睬佢，佢想攞料摸我底，食埋我咋嘛，班仆街！」
覓地左揀右揀
其實辣著明叔，四叔李兆基亦難有好日子過。事實上，四叔已多次想速戰速決，快快搬走陳偉明，不過對方不領情，他「好人」都無得做。收地官司未開庭前，旗下職員四次帶陳偉明到大帽山附近的農地視察，但陳偉明道：「無水、無電、無路，要經過圍村入去，啲路人哋俾唔俾我用呢？同埋我啲樹咁大棵，啲路得三呎，根本入唔到。」到上月恒基贏官司，再帶他遊米埔，「嗰度係路壆嚟，企上去一望就見到深圳，下面就係河水，成幅地蕉形，又係無路入去嘅。我哋種樹，唔係話搬就搬，唔係菜農，收割咗就走得。搬一棵起碼三、四個人先抱得起啲根，啲根同泥唔可以分開，就好似人條頸同個頭唔可以分割咁。」恒地職員無表明這些土地是送或是租給明叔，帶他看農地時，一貫笑騎騎，話自己「話唔到事」。
「我希望四叔開恩呀，佢話要幫年輕人嘛，我屋企都有三個年輕人等佢幫，依家真正係上無寸瓦，下無寸土呀！」陳偉明想五萬呎地上的樹木，都「原封不動」搬走；看來四叔要安置明叔，實在是一件艱巨工程。
|
鍾意就快D Share啦！
|
|
|