網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2014年4月10日 星期四

[壹週刊 1257] 無綫捱十八年 月薪萬八 譚小環銅鑼灣賣魚蛋 M1,





試過俾人掟玻璃樽,譚小環已放棄到內地夜場登台賺錢,寧願每日企足八粒鐘賣魚蛋。

娛頭

無綫捱十八年 月薪萬八 譚小環銅鑼灣賣魚蛋

與無綫解約後,近年幾乎銷聲匿跡的九四年港姐譚小環,原來已經秘密轉行。本刊發現,當年長期雄霸信和賣相第一位的冠軍港姐,如今已變成在銅鑼灣渣甸坊開鋪賣魚蛋的阿姐。

在無綫捱足十八年,離開前,月薪僅得一萬八千元,無綫之後加薪三百元傾續約,令譚小環心死,決定走人。

由索爆港姐變魚蛋妹,譚小環吸一口氣說:「去到呢個階段,已經冇得介意,魚蛋妹都係人,靚唔可以當飯食!」

改頭換面
據觀察,每日上午十一時許,譚小環都會到位於銅鑼灣渣甸坊、面積約百多呎的魚蛋檔開工,一埋位,便會忙個不停。接近十二時午飯時間,排隊顧客愈來愈多,即使另有三名員工,小環依然無停手。

過去習慣留長頭髮的譚小環,為方便工作,將頭髮剪短,並刻意戴上眼鏡,就算食客近距離望,亦未必即時察覺這個四眼阿姐,原來是九四年港姐冠軍譚小環。

「個鋪月租要成十一萬,加埋水電煤同請咗六個人分兩更,皮費唔輕,小環都要落埋場幫手,每日企足八粒鐘,都咪話唔辛苦!」知情者說。

在鬧市開檔賣魚蛋,譚小環拋開過去,但仍刻意改頭換面。

「啱啱開鋪嗰段時間,好多人認得小環,成日撩佢傾偈,後來佢剪短曬啲頭髮,又戴個眼鏡遮嚇,佢唔係怕人笑,只係想專心做生意。」

小環搵埋媽咪(右一)一齊看檔,一身平民裝束加上剪短頭髮,食客不易認出她。

加三百㷫爆
由冠軍港姐到做魚蛋阿姐,譚小環決心轉行,也是靠 TVB「激勵」。

「小環喺無綫已經十八年,每次傾續約都係加幾百,一個月收入得萬幾蚊,要俾父母家用,又幫媽咪請咗個工人;自己要食要住又要養車,因為返將軍澳冇車好唔方便;佢乜都慳住,收工買個飯盒就一餐,都要靠去大陸夜場登台,先賺到生活費。靠 TVB份人工?都唔知點算。」譚小環身邊人說。

一二年,因為王維基搞香港電視,高價撬走無綫近二百名台前幕後員工,其時無綫高調表態會大幅度調整薪酬,到頭來講一套做一套。

「無綫走佬潮嗰陣,小環同公司傾續約,但所謂嘅大幅加薪,都係話加三百蚊騷錢,小環好㷫,咪決定唔續約。」

離開無綫後,譚小環亦有與王維基的香港電視接觸,可惜對方開台連番受阻,為免夜長夢多,譚小環決定放手一搏,開檔魚蛋檔。

當年參選港姐,譚小環憑清純外表極速走紅。

94年譚小環(箭嘴)隨港姐團到意大利拍外景,與當時嘉賓之一的 Sammi合照。

和小環合作過的向海嵐、蒙嘉慧,都先後離開無綫。

阿媽幫手
上週四(四月三日)中午,譚小環如常在鋪頭睇檔,一點午飯時間,從事保險的小環老公蔡強榮到鋪頭準備接老婆一齊食飯,由於顧客應接不暇,他唯有與友人傾住等。

之後,一行人到附近的茶餐廳開飯,上樓坐近窗口的卡位,明顯經常幫襯的小環,與侍應有傾有講。吃了約一小時,小環買了外賣,給也有在魚蛋檔幫手的小環媽醫肚。

「小環媽咪以前做過小販,已經退咗休,但賣嘢完全難唔倒佢,埋嚟睇埋嚟食佢嗌得好順口,決定開鋪之後,煮豉油咖喱汁呢類準備功夫都搞好耐,因為要校到最啱口味,都係全靠小環媽咪!」小環友人說。

鋪頭餐盒用曬,小環立刻推手推車去街口貨倉取貨。

98年,譚小環奪叱吒新人獎,當年的她和森美,非常嫩口。

租屋擺貨
長期人逼人的銅鑼灣週六(五日)下午逼爆,排隊的食客塞滿鋪外,譚小環在鋪內七手八臂,大汗疊細汗,之後又走入鋪旁的小巷,將一架手推車推到街口的大廈。原來為方便提存,小環在此租了一個單位放貨,攞完貨放上手推車,再推返鋪頭,鋪面打雜一腳踢。

其間,本刊上前訪問譚小環轉行賣魚蛋一事。「(開工企到收工,係咪好辛苦?)其實我每日落鋪頭幾粒鐘,反而媽咪幫我手多啲,因為啲汁料要靠佢調味,我就做粗重功夫。你話辛苦?點都唔會辛苦過拍劇!嗰時○三(淩晨三點)收工,(早上)○七又要化妝入廠。」譚小環說。

老公專登陪小環食晏,二人行去後面街的冰室撐枱腳。

慳番好多
對於最後一次和無綫傾約,公司只加三百元人工,灰爆的她才決心不再續約,小環嘆氣說:「咁 TVB人工唔高係人都知,我喺度十八年,雖然人工得萬幾元,但可以攞到知名度。老實講,以前真係靠返大陸登台,通常係啲 disco或者劈酒場,試過俾人掟玻璃樽,真係好驚㗎!所以結婚之後,老公都唔俾我再去唱呢啲場。」

港姐冠軍變賣魚蛋阿姐,放下身段的譚小環直言不介意被叫魚蛋妹。

「去到呢個階段,無得再介意,魚蛋妹都係人!如果人哋見到我,記得我係賣魚蛋,都好吖!其實而家唔使扮靚,已經可以慳番好多錢。靚唔可以當飯食,做乜都好,只要過到自己一關就得。」譚小環說。

入行不久,小環便歌影視三線發展,更與鄭伊健合唱情歌。

小環與任職保險高層的蔡強榮,於 07年在洲際酒店結婚。

極少緋聞的譚小環, 99年與排舞老師 Sunny撻著,最後因男方偷食分手,最終賠上事業同愛情。

對於近日無綫藝員要被高層面試,小環不諱言未有心理準備再 sell自己。

30萬回本
譚小環投資的魚蛋檔,位處銅鑼灣地段,鋪租不菲,所賣的小食價格走平民路線,腸粉賣 12蚊 4條,魚蛋 10蚊 6粒,燒賣就 10蚊 5粒,月做十七粒鐘!首月營業額有 34萬,扣除開支,賺到 4萬,已多過 TVB份糧。

賣相天後
94年, 21歲的譚小環打低張可頤、李綺虹、黃紀瑩當選港姐冠軍,更一度成為信和賣相天後,經常高踞銷量榜首,受歡迎程度媲美當時的四大天王,更極速在無綫劇集《殭屍福星》、《緝私群英》擔正做女主角。 96年簽約 BMA唱片公司,更與當時憑《古惑仔》紅極一時的鄭伊健,合唱《如果天空要下雨》,歌影視三線發展。

99年,譚小環與郭富城排舞師 Sunny Wong拍拖,無心戀戰令事業開始下滑,後因 Sunny搭上羅明珠,二人於 04年分手。 07年與任職保險的蔡強榮結婚後開始減產,與無綫簽部頭約的她,經常被安排做三、四線角色,後期更被下放到主持《都市閒情》。

後路
娛樂圈愈來愈難撈,不少藝人為生活紛紛鋪定後路甚至轉行,當中有不少是同飲食有關。

李雨陽(雞檔)

原本決心由無綫過檔王維基港視,可惜開台一波三折,李雨陽走投無路轉行做雞販,今年初與三個圈外朋友合資搞網上雞檔,賣有機冰鮮雞,上至送貨下至派傳單,親力親為。

張慧儀(百貨店)

03年因感情問題宣布退出娛樂圈,其後轉戰內地從商,又在廣西經營參茸禮品生意,去年張慧儀回港定居;並於深水埗開小型百貨店,食品日用品家電樣樣齊。

谷祖琳(甜品店)

拍過多部電影及主持電台節目的谷祖琳, 08年進軍飲食界,拍住叔父谷德昭和好友倪震,斥資數十萬於大坑開「小甜谷」賣甜品,明星效應,生意愈做愈旺, 12年於尖沙咀再開分店。

鄭艷麗(賣包)

90年代脫星鄭艷麗,無綫出身,靠身材為人識;後來搭上台商黃任中離開娛樂圈;數年前傾盡積蓄於台灣開私房菜失利,血本無歸;今年初,被發現於麥當勞通宵賣包。


鍾意就快D Share啦!