自爆唔止一次受傷害 祖兒唔原諒阿澤
杜汶澤大前晚在伍樂城演唱會上，自爆𠱁英皇老闆楊受成開拍《Diva華麗之後》，捧容祖兒做影後，事件辣㷫祖兒，甚少與人為敵的她公開指摘杜汶澤，更直指他是娛樂圈內唯一討厭的人，雖然杜汶澤一日之內兩度公開在fb向祖兒道歉，但是祖兒前晚在伍樂城演唱會尾場後台訪問時，非常認真地回應事件：「都知嚴重性講真，我唔係衝動，只係希望教訓佢一下，其實真係唔止一次。」原來祖兒曾一次又一次被傷害，但她卻不肯透露細節，更強調做朋友不應互相傷害。
■祖兒希望藉今次事件教訓杜汶澤。
「我好支持秋生」
黃秋生指杜汶澤眾叛親離，祖兒認同說：「秋生我好支持佢，但經過今日，自己唔想再講，唔想變成是非，純粹只係想教訓下佢（阿澤），其實鬧人同生氣，係好傷身。」祖兒訪問中，又借台上合唱的李克勤明寸杜汶澤說：「搞氣氛有好多方法，克勤係一個搞氣氛能手，佢令大家好溫暖、舒服，有愛感覺喺裏面，呢個至係搞笑最高境界。」
杜汶澤只是兩度公開在fb道歉，未有親自向祖兒道歉，祖兒表示有人給她看過杜汶澤fb道歉內容，是否接受？她不置可否，說：「睇表現，觀察一陣先，因為唔止我一個受害者。我自問唔係一個衝動嘅人，希望多一個朋友，少一個敵人。君子之交淡如水，可以觀察，畀啲時間。」有說阿澤為祖兒避席前晚尾場演出，她表示自己好專業，不會影響工作，不過對於經理人霍汶希左右做人難，感到不好意思。祖兒重申今次是最後一次回應此事，她強調不需要別人安慰，朋友亦毋須表明立場。
■阿澤已在fb道歉，但未獲祖兒原諒。
另外，伍樂城尾場演唱會還有陳慧琳（Kelly）大仔蝦餃仔捧場，跟爹哋和經理人鍾珍觀看媽咪表演，當Kelly在升降台上升高的時候，蝦餃仔被嚇到呆了。楊千嬅即場感謝伍樂城，間接撮合她跟老公丁子高，因為丁生第一次見千嬅，就是唱《鍊金術》。在演唱會開騷前，太極Patrick和Joey Tang獻唱《朋友》送給張耀榮。第一場疑似側手翻走光的蔡卓妍（Sa），第二場改穿長褲，防走光。
採訪、攝影：馬建華
■祖兒指李克勤是搞氣氛能手，令人感溫暖、舒服，明寸阿澤。
■楊千嬅感謝伍樂城，間接撮合她跟老公丁子高（小圖）。
■蔡卓妍（左）第二場改穿長褲，防走光。
|
鍾意就快D Share啦！
|
|
|