熱爆娛樂: [FACE 360] 飲食霸權　茶包侍應嚇到請假　惡蘇鬧到小店執笠惡蘇,蘇施黃,MF,

2014年4月16日星期三

[FACE 360] 飲食霸權　茶包侍應嚇到請假　惡蘇鬧到小店執笠惡蘇,蘇施黃,MF,

蘇施黃今次鬧人終累己，唔正式道歉都幾難收科。

真面目

飲食霸權　茶包侍應嚇到請假　惡蘇鬧到小店執笠

蘇施黃「茶包裡的風波」連日來被網民狂插，阿蘇日前喺 facebook自稱反省卻始終欠一句道歉，而原定於週一（ 14日）返商台開咪的蘇施黃，更突然要請假一個禮拜避風頭。

而事發的皇冠假日酒店，被阿蘇鬧蠢的侍應 J亦請假冇返工。其實阿蘇亂開火有前科，有線年代曾到銅鑼灣一間快餐店踩場，大鬧老闆「咁鬼蠢，執咗佢」又在專欄狂踩另一間居酒屋，搞到小店執笠。阿蘇係時候收斂嚇喎！

蘇施黃出名嘴刁又口賤，寫食評從來唔留手，日前在 facebook唱衰銅鑼灣皇冠假日酒店餐廳加茶包竟要收雙倍價錢是 cheap精，又開名鬧侍應蠢兼叫人「請廣傳」，諗住攞彩點知反被指無理取鬧。

11/4 fb投訴

銅鑼灣皇冠假日酒店的 Club28餐廳經理稱有關侍應放假，而當日蘇施黃則和家人坐在餐廳較入位置（箭嘴）。

阿蘇在 fb大鬧皇冠假日酒店收費唔合理，又指侍應是蠢侍應，收多一倍茶包價錢。

13/4　 Hea回應

見被網友狂轟，阿蘇認衰，可是未有向酒店及侍應道歉繼續被網友圍攻。

死唔肯道歉

近日網友廣傳阿蘇在《蘇 GOOD》食完街邊雪榚，將雪糕紙掟向檔主的片段，指她唔識尊重人。電視圖片

雖然阿蘇週日（ 13日）已在網上留言解畫：「我係一個樂於學習、樂於反省的人。我今次絕對有不是的地方，錯在“ assume”，我冇問清楚加一個茶包要加多幾多錢，我 assume的價錢和 Crowne Hotel收的價錢有距離……細時學的教訓，時常都會繼續忘記……大家繼續生意興隆！」只是留言未有向酒店及侍應道歉，得不到網民原諒，繼續圍攻。

其實 59歲阿蘇並非第一次惡形惡相鬧食肆，她無論在雜誌專欄抑或電視節目都鬧到出曬位，更曾有食肆小店因為被阿蘇狠批而搞到執笠，觀眾有 buy有唔 buy；而阿蘇口臭亦令她在有線時期跟高層徐小明和余詠珊交惡，間接促成後來余詠珊在 TVB綜藝科揸旗，阿蘇的《阿蘇出駕》更被迫調到 J2台，冇乜人知。

齊齊請假避

而原本要返商台錄節目的阿蘇，週一（ 14日）突然請假，商台公關稱阿蘇需要放假一星期，未有交代是否與今次事件有關。另外，被阿蘇侮辱的侍應 J亦避風頭，記者連續兩天到皇冠假日酒店 28樓 Club28都不見有關侍應，經理表示該侍應要放假，其餘不願多談。一篇 fb搞到兩個人都要請假避風頭，為乜呢？

聲大夾惡

蘇施黃惡到出汁，對食肆一有不滿就鬧到貼地，話之你係老細都冇面畀，以往曾有食肆因為被阿蘇在節目或專欄中狂插，最終執笠收場，食評啫，唔使趕絕嘅！

Case 1　鬧老闆蠢

蘇施黃 07年在有線節目《一粒鐘真人蘇》特設踩場環節，餐廳東主主動邀請阿蘇試食，阿蘇在銅鑼灣快餐店吃了一塊豆腐和炸豬扒後，即鬧老闆唔識煮食物、唔識做生意兼人身攻擊：「咁鬼蠢，執咗佢」、「唔知你啲枱要嚟做乜，又冇人坐！」、「食埋啲 cheap嘢！」鬧到老細頭耷耷，節目出街後不久餐廳便執笠。

餐廳老闆被鬧到體無完膚，裝笑遮醜。

電視圖片

阿蘇鬧到停唔到口，更叫老闆早啲執笠，句句惡頂！

電視圖片

Case 2　居酒屋受靶

4年前阿蘇在《飲食男女》專欄評論今次「茶包」事件酒店旁，銅鑼灣禮頓道的連粵日居酒屋，明明食品不是太差，卻無端端以「不願評分」來表達不滿，彈店主 40歲就退休心態、彈地點唔夠旺、彈營業時間太短等等；當時有網上食評家「不眠王子」不值阿蘇所為，實行為佢翻舊賬話：「有幾多間居酒屋位於超旺地點呀？有……魚一丁囉！」、「有幾多間（居酒屋）開到 2、 3點呀？你上面至話個地點半滴旺都唔覺，開到咁夜托咩？」可惜該食肆依然捱唔住，迅速結業。

蘇施黃於專欄批評連粵日居酒屋，大打幾個交叉，連分都唔肯畀，令人覺得該食肆一無是處。

連粵日居酒屋營業只一年便執笠大吉。網上圖片

網上食評家「不眠王子」引述當年報道反擊阿蘇，認為食物有水準，阿蘇不應亂咁鬧。

失陳總靠山

阿蘇主持的電視節目由有線跳到無綫，原來都有玄機，跟阿蘇的臭脾氣有莫大關係。

05年有線《一粒鐘真人蘇》共有兩輯，但阿蘇一直不滿有線是收費台少人睇，加上有傳她與執行董事徐小明和當時於有線任高層的余詠珊不和，早萌去意。

其後阿蘇找獨立公司製作《蘇 GOOD》系列賣版權給無綫，得到老友陳志雲及何麗全協助，兩輯分別於翡翠台及高清翡翠台黃金時段播出。

但播出以來不時有觀眾向廣管局投訴，指阿蘇鬧人用詞太粗俗、挖苦別人等等；加上陳及何相繼離巢，仇人余詠珊卻入主 TVB綜藝科總監，結果去年的《阿蘇出駕》被安排到 J2台播出，觀眾少咁一截，亦不見有第二輯。