23/3劉華在歌迷燒烤會上滿場飛，更四萬咁口，不時主動坐低和歌迷傾偈。
滾熱辣
直擊歌迷聚會 劉華逐枱曬愛女相 3秒
劉德華對兩歲愛女劉向蕙（ Hanna）的保密工夫做到滴水不漏，既買下相連加多利山獨立屋，又租用尖沙嘴服務式住宅聽濤閣，實行兩頭住家。就算女兒去診所打針，亦有四名保鑣跟身，傳媒難以埋身。
不過，一向待歌迷是家人的劉華，去年 12月被歌迷追問幾時有得見劉向蕙時，就開下支票：「應承大家，下次聚會安排嚇！」華仔果然守諾，在三月尾的歌迷聚會中，讓 fans一睹囡囡真貌。雖然只是手機照片，而且每枱限睇三秒，不過為了這三秒，聚會比以往嚴密三倍，不但全場圍黑布，亦下旨全場熄電話，現場更有成打護衞駐守，大陣仗到嚇死你。
從兩年前愛女劉向蕙（ Hanna）出生後，劉華千方百計收埋女兒，不過，父愛氾濫的他，仍忍唔住將愛女掛在口唇邊。去年 12月歌迷聚會上，他甜到漏讚愛女靚︰「由出世到依家都係似媽咪」，又話「希望囡囡留喺香港，最好讀 local school」。
劉華曾私底下向相熟歌迷表示，會在女兒兩歲時，讓 fans見一見她真貌。劉向蕙今年 5月 9日就足兩歲，講得出做得到的劉華，終於在三月尾的歌迷燒烤聚會上兌現他的承諾。
嘴咀男 B
見到一名年約三歲的男孩時，劉華不但主動抱起他，仲嘴對嘴錫小朋友，父愛氾濫。
禁拍照禁開手機
3月 23日傍晚，華仔與歌迷在大埔大尾督舉行 BBQ聚會。當日中午，燒烤場四周一早已被黑布圍住，場內約十多名工作人員及護衞，唯一入口亦有專人守衞，禁絕外人出入。黃昏六點時，現場廣播吩咐歌迷不能攝影，更要將手機關閉，如見附近有人攝影更要舉報，私隱度十足。現場所見，歌迷十分聽話，只見他們頻頻走到布簾外講電話。
劉華約在六時現身，只見他滿場飛，枱過枱與 fans傾偈、影合照。當他見到一個約三歲的小男孩，更肉緊地抱起對方嘴對嘴親吻。歌迷笑他恨仔恨到發燒，更起哄叫佢追番個。不過當晚高潮是他公開手機內囡囡的相片。有歌迷覆述當時情況：「唔少 fans打蛇隨棍上，問有冇得見嚇 Hanna（向蕙英文名），以往華仔多數笑笑口，講聲：『乖』就算。點知嗰日佢竟然喺相熟歌迷面前，攞個電話出嚟，然後講明︰『嗱，係見三秒咋！ 1、 2、 3』然後喺逐個人面前揚一揚 Hanna張手機相。我哋見到 Hanna短頭髮、鼻高、眼大，真係好似朱麗倩。大家笑住問佢幾時追多個，佢雖然冇答，不過就一直笑笑口，心情好靚。」
近年減產的劉華，真的十分享受家庭樂。就連出席歌迷聚會前，亦把握時間，親自下廚冧老婆，認真廿四孝好老公。
知情者說：「華仔聚會當日陪唔到老婆，知佢最鍾意食叻沙麵，咪學煮冧嚇個馬拉老婆囉。華仔仲用電話同 Hanna影咗幾張靚相，話應承咗 fans，要俾佢哋見下 Hanna。朱麗倩當晚仲特登夜少少瞓，等埋老公返屋企同佢吹水。華仔次次去完歌迷聚會，都有好多嘢同老婆分享。」
雖然一直傳出 52歲的劉華想追第二胎，不過，現時他忙於在江西拍內地電影《失孤》，預計要拍到 6、 7月才煞科，看來造人大計也要下半年才實行。
下廚冧老婆
劉華出席歌迷聚會當日中午，先煮叻沙冧老婆，他在歌迷會網頁上載圖文記錄自己下廚過程。
老婆朱麗倩捱夜等劉華回家。講妻女，劉華用「溫馨極了」、「和諧極了」來形容一家關係。
|
鍾意就快D Share啦！
|
|
|