化了淡妝的苗金鳳冇乜皺紋，而且皮膚白滑，亦冇鬆弛跡象。「我每晚搽精華素由下而上按摩。」
娛樂喧
69歲索 old嬋 苗金鳳曬 26吋黃蜂腰
娛圈最近湧現一班美魔女，位位身材弗爆，皮光肉滑，肌齡倒退十幾年。不過，原來索 old嬋更厲害。
粵語片著名女星苗金鳳，近日在大台新劇飾演惡家婆。雖然寸人冇命賠，但深得一眾網友歡心，驚嘆她保養得宜，冇乜皺紋之餘身形仲好弗。
苗金鳳今年原來已經 69歲，生了兩個兒子，做埋人阿嫲。上周六（ 4月 26日），她與記者分享保養心得，只化淡妝的她，幾乎零毛孔，腰圍只得 26吋。真羨慕死人！
闊別幕前 16年的苗金鳳，憑住不老容顏，在大台新劇殺出重圍，揮低七個中女，成為網上紅人。
上周六（ 4月 26日），記者約了苗金鳳做訪問，她準時現身尖沙嘴某咖啡室。她身穿紫色絨質上衣，貼身長褲，並披上白色圖案絲巾，行路婀娜多姿，離遠已聞到一朕粵語長片味道，她更以溫柔聲線說：「哎吔！真係好耐冇見喇！」
養顏秘訣
1.勤搽加拿大護膚品
2.日日飲老火湯，唔落鹽煲
3.做家務當運動，出汗排毒
正當她細數拍粵語長片的點滴時，記者向她由頭至腳近距離掃描一次，她皮膚白淨，臉上幾乎冇皺紋和毛孔細緻，睇得出冇經後天加工。今年 69歲的她笑說：「以前啲化妝品冇依家咁好，嗰陣我啲皮膚都麻麻，後尾有個朋友介紹咗隻加拿大牌子俾我，我一用就十幾年，好多人都讚我皮膚靚。」
要改善肌齡，當然要用適合自己的護膚品，不過苗金鳳身材依然苗條，身高 5呎 6吋的她，擁有 42吋長腿，現時腰圍只有 26吋，羨慕死人。「哎吔，其實我肥咗好多，做女嗰陣得 95磅咋！我依家 110磅，想肥多 5磅， 115磅會標準啲！」
自言不做運動的她，要保持體形，原來另有秘訣，「我退出娛樂圈頭嗰十年，去咗澳洲陪個仔讀書，嗰陣佢住宿舍，我就自己一個打理成間大屋。由開始髹灰水，到之後洗屋頂，都係自己爬上爬落做。我乜都自己做，咁多年嚟我冇請過工人，做到出曬汗，血液運行好好。」除了做家務，苗金鳳還堅持日日煲老火湯。「我每日去街市睇下有乜新鮮材料，自己煲湯煮飯，最緊要冇味精。我一個人食唔曬，咪請朋友返屋企食囉！」勤力過肥媽。
30年不變
訪問當日，苗金鳳特登帶了大堆舊相前來，記者睇過舊相，再與真人比較，發現她多年來容顏不變，令人驚訝！
與新抱保持距離
苗金鳳現時獨居將軍澳，兩個兒子亦已成家立室。提到與新抱相處，她強調自己現實生活裏絕非惡家婆，「相見好，同住難。佢哋都大個仔，當佢哋係朋友就最好。對班仔唔好囉囌，對新抱仲要客氣啲！依家我個細新抱喺公司都俾人叫做李若彤，啲同事成日問佢有冇俾奶奶恰㗎。」
曾經歷婚姻失敗的苗金鳳，提到現任丈夫（第二任，圈外一男子），她淡然地說：「老公？唔講老公我覺得狗仲有性過人，之前我養咗一隻魔天使，醫生話佢肝癌救唔番，佢去咗之後我成日喊，好似患咗抑鬱！我唔再養喇，依家我自己去寵物店睇下！（咁湊孫啦？）唔湊我都係鍾意一個人住。」
粵語片女神
今年 69歲的苗金鳳是六十年代粵語片最紅女星之一，她擅長演繹楚楚可憐的少女角色。 1966年，她與張瑛合作的《一水隔天涯》成名，之後幾乎都做女一，是當時的女神。
苗金鳳第一任老公為從事電影工作的劉芳，不過離婚收場。之後再嫁俾澳洲華僑，育有兩子。
膠面俱樂部
大台新劇打著「女神回歸」的噱頭，但昔日觀眾心目中的「女神」，如今已經全部四字頭，出盡力化妝仍有點走樣，只怪歲月無情。
|
鍾意就快D Share啦！
|
|
|