離開大台後，李思欣吸金力有增無減，仲帶挈埋老公範振鋒夫妻檔搵真銀，難怪兩人受訪時笑曬口。
娛樂喧
處女電影做女一 李思欣夫妻檔日賺七萬
兩個月前宣布離開大台的李思欣，除了開火鍋店、搞鑽石生意及下周六（ 10日）在新城開咪外，最近仲首次拍電影《尋愛事務所》做女主角。入行十年，要離開大台，才終於初嘗「女一」滋味。
除了接拍電影，李思欣最近更孖住範振鋒夫妻檔登台，一個活動兼任司儀及唱歌，騷價七萬，非常好執。憑阿範人脈，平均每個月有三個登台 show，兩公婆穩袋 21萬，收入等如李思欣在大台兩年人工。吐氣揚眉的李思欣亦話︰「依家個心定咗好多！」
自從港視發牌波折重重，一班離開大台的藝員頓變得人心惶惶。不過，其實有危就有機，就算冇港視，好多二、三線港星依然不愁沒出路，好像在大台十年吊命的李思欣，近來入息十級跳。
本周一（ 28日），李思欣與範振鋒夫妻檔拍住往澳門登台搵食，因為兩人識做司儀及唱歌，叫價不俗，每個活動賺七萬，比花旦袒胸露背行泳衣騷都是得五、六萬還高。
李思欣唱得
唔講唔知，原來李思欣幾唱得。現場所見，李思欣與範振鋒表現甚有默契。原先兩人合唱一首歌及各獨唱一首，不過現場觀眾大叫安歌，主辦單位見現場氣氛好，臨時要求他們各自多唱一首，兩人亦賣大包送多首。李思欣唱〈小城故事〉時，歌聲甜美，觀眾反應奇佳，連唱家班的 Yumiko亦給比下去。問到賣大包，李思欣笑說：「冇所謂啦，我哋好抵用！」當晚十時半完騷，兩人即晚趕返香港。
當初決定離開大台，李思欣坦言亦有一陣子忐忑：「起初都有徬徨，唔知行出去會點。老公都有俾意見，依家個心真係定咗好多，其實都有啲意外，冇諗過工作多元化咗。依家自己做埋經理人嗰份，個人好充實同積極咗。」身旁的阿範則苦笑說：「我就攰咗好多，因為多咗要幫佢打電話做聯絡。」
識冧老闆
做抑鬱怨婦
除了生意、登台及開咪，李思欣更初嘗做電影女主角的滋味。日前她為田雞監製的慈善電影《尋愛事務所》開工，片中飾演一名患抑鬱病母親，與五歲女兒有不少感人場面，演技甚有發揮。
苦等十年，終於做得成女一，李思欣說：「梗係開心，之前都未試過，係一個挑戰。呢次係我第三次做人阿媽，仲係有抑鬱症嗰隻，因為好多內心戲，我有壓力。」
現時李思欣夫婦每個月有兩至三次登台，連同其他生意，估計每月有三十萬收入。以往兩人以八千元租住深井豪景花園，最近已訂下了買樓目標。李思欣說：「依家想買樓！（有心水未？）仲諗緊，打算繼續同我媽媽一齊住，所以都係搵三房嘅單位。」
塞翁失馬，焉知非福！將於 5月尾正式同大台「分手」的李思欣，今次真係吐氣揚眉。
離大台有運行
一班二、三線的「大台叛將」，由於有實力，離開大台後成功轉型，收入激增。
彭國樑 轉戰內地
去年初約滿港視的彭國樑，接拍梅小青及劉家豪監製的內地劇《大漢賢後衞子夫》。現時他身在瀋陽，拍攝電視劇《參工傳奇》（圖）。「六月尾仲會去橫店拍劇，七月應該會拍電影。」據知，彭國樑內地劇酬每集萬多元，《參》劇他佔十五集戲份，酬勞近廿萬。
|
鍾意就快D Share啦！
|
|
|