當轉身抹眼淚時，罕有地露出白滑嘅背部。
媽咪姐
黎姿提細佬淚漣漣
告別娛樂圈六年嘅黎姿（ Gigi），星期二（ 20日）以 CEO身份出席胞弟黎嬰成立嘅醫學皮膚診所新店 CosMax開幕活動，雖然已經係三個囡囡嘅媽媽，但依然 keep得好好，皮膚白滑身材纖瘦，媽咪姐覺得佢仲靚過以前多多聲。
2007年黎嬰發生交通意外， Gigi就接手皮膚診所嘅生意。原來最初不獲老公馬廷強支持，但 Gigi嘅堅持最終感動老公，難怪 Gigi話：「依家生活好充實，每日有七、八小時睡眠時間係自己外，其餘時間都俾曬家人同工作。」
雖然 Gigi嘅幸福喺面上表露曬出來，但一講到胞弟嘅情況，佢就泣不成聲，「佢依家仲要坐輪椅，行動唔太好，有好多治療，做緊時可以企嚇起身。我會默默等待，希望有一日佢可以企喺度同大家講嘢。」
媽咪姐聽到都好心酸，不過， Gigi好堅強，抹完眼淚就即刻笑番曬。講到三個囡囡時仲好開心，「我唔會係怪獸家長，品格先係最重要，依家啲小朋友好醒目，我要同佢哋鬥智鬥力。」
|
鍾意就快D Share啦！
|
|
|