當日江欣燕以青春打扮及五吋高踭鞋，迎見高大新歡 Kenneth。二人年紀相距十年，但外形匹配。
探熱針
赤柱餵雪糕 江欣燕新歡細十年
去年中公開承認跟吳積遜結束十二年夫妻關係的江欣燕，最近已辦妥離婚手續，回復單身，出發再「上市」！ 46歲，江欣燕照有本把炮到細自己十年的「六呎版伊健」埋身，成為 M Club女之中，最本事一個。
上週末，打扮少女的江欣燕同新歡赤柱拍拖，餵食雪糕，「六呎伊健」幫抹嘴仔，中年回春，一樣 sweet。
做糖果生意
正式甩掉人妻包袱後，身邊好友紛紛推波助瀾，急撥大葵扇，目標讓江欣燕在五張前搵到第二春。
前夫吳積遜拖金髮熟女遊街，重新上市的江欣燕，經連月來重新裝備亦有唔少人吼。友人車輪轉做介紹人，對象大部分都是專業筍盤，甚至有行家（導演）力追，但江欣燕應酬了一兩次就無影。
唯一例外！外形夠殺，可以用「六呎版伊健」形容的 Kenneth，比起其他「師」級人選，六呎版伊健財力唔算最標青，但卻得到江欣燕另眼相看，過去的個多月，二人頻頻約會，打得火熱。
「大家都係咁介紹男仔俾欣欣識， Kenneth係其中一個。講條件，佢唔算最勁，屋企人喺廣州有間番泰行食品做糖果生意嘅，規模同喺香港嘅鉅記差不多。但 Kenneth份人好玩得，所以欣欣特別覺得佢同自己好夾，呢兩個月佢哋頻頻約會。不過因為對方細十年，欣欣都有啲顧慮。我哋就鼓勵佢相處嚇先，唔使諗長遠住。」江欣燕身邊人爆。
五吋踭高攀
四月底，曾志偉吹雞，率 M Club一眾女角包括江欣燕到台灣吃喝玩樂慶功。一返到香港，江欣燕即刻爭取時間，約會新歡。上週六（五月三日）下午，再度迎春的江欣燕以粉紅上衣襯白裙仔，露出減肥成功的美腿，從汀九寓所駕車到中環友人家。半小時後，就見她與新歡同車離開，直駛去拍拖勝地赤柱。
為與「六呎伊健」拉近距離，當日江欣燕踩住對五吋高踭鞋出動。當見到週末的赤柱大街人頭湧湧，即拉住新歡行去赤柱廣場。其間 Kenneth見江欣燕食雪糕食到嘴邊都有，邊笑她「論盡豬」又攞住紙巾為她抹嘴，四十六歲的江欣燕冧到暈。
攬住呵番
要遠離人群享受浪漫，江欣燕無理會自己踩住五吋高踭鞋，拍拖行去較為清靜的石灘。
甜蜜之際，點知忽然有人大嗌：「欣欣！」嚇一跳的江欣燕回頭一望，原來是幾個要求合照的 fans。
石灘浪漫受到打擾，二人唯有搵間餐廳坐低暱一暱；可惜週末赤柱的餐廳差不多間間爆，「六呎伊健」見江欣燕無曬癮，即把她輕擁入懷呵番。
獲前夫祝福
反正點都會被認出，江欣燕索性豁出去，同新歡排隊買 Pizza，甚至坐在望街的「開揚」位，邊食邊與男友玩自拍。醫完肚，二人由赤柱駕車出銅鑼灣，原來回春的江欣燕，同九十後的超蓮一樣愛玩貼紙相，專程去到世貿中心，才發現店鋪已結業；再一次蝦碌收場的她當堂扁曬嘴，之後同「六呎伊健」駕車返回接他出發的中環寓所，二人留在上址，整夜沒再外出。
本週二（五月六日），江欣燕飛加拿大工作，被問到同「六呎伊健」撻著一事，她全程重複說：「我無嘢好講㗎！」但每聽提及 Kennth，她都忍唔住漏出甜笑。
至於前夫吳積遜，得悉江欣燕有新對象，回應說：「恭喜佢，希望佢搵到幸福！（你哋仲有冇聯絡？）冇 Anyway，佢開心我就開心。」
熟女有市場
新劇《 M Club》班中女，一半經歷過婚姻破裂。離婚後就算失修走樣，但爛船有三斤釘，一樣有著落。
|
鍾意就快D Share啦！
|
|
|