就與師母撞到正一事，本刊致電鄭嘉穎求證，他未聽問題已經「 cup」線。
娛頭
撞見師母掉頭走 戴思聰女怒爆鄭嘉穎：你繼續講大話
06年，爆出鄭嘉穎早於 93年跟歌唱老師戴思聰簽下一份「終身合約」，師徒二人因為抽傭問題反目成仇。 10年，戴思聰因心臟病離世，當時鄭嘉穎向外表示，對老師只有「恩」沒有「仇」。話雖如此，但這段超過二十年的恩怨根本不曾化解。有指一個月前，鄭嘉穎在銅鑼灣與戴師母狹路相逢，但他竟然招呼唔打，掉轉頭走人。
提到鄭嘉穎無情無禮，戴師母不願再提；戴思聰女兒戴辛尉卻不吐不快，還開腔為亡父討回公道。
「所謂嘅『終身合約』件事曝光前，爹哋喺林文龍婚禮撞到嘉穎，佢藐曬嘴咁對住爹哋，對一個恩人點解可以咁，爹哋好唔舒服，先提醒佢其實仲有一份合約喺度！我講嘅全部真話，佢可以繼續講大話，我心安理得！」戴辛尉振振有詞。
師母拒原諒
戴思聰離世多年，與鄭嘉穎的「終身合約」糾紛，亦隨之長埋黃土。恩師過身，當時未有出席喪禮的鄭嘉穎向外稱對老師只有「恩」沒有「仇」。
但一個月前，有人目睹鄭嘉穎在銅鑼灣時代廣場一間食肆遇上戴師母，當時他不單連招呼都唔打一個，還急急腳掉頭走，事後戴師母曾向友人訴說：「呢世都唔會原諒佢（鄭嘉穎）！」
既然有恩無仇，偏偏鄭嘉穎對師母如此無禮！對此，戴思聰細女戴辛尉揶揄回應：「媽咪有白內障，可能都睇唔到佢！但我想同佢講，唔需要咁驚嘅！」
戴辛尉指母親年事已高，亦不想再回應有關這個人（鄭嘉穎）的事，只想忘記不快，開心生活。但戴辛尉仍忍唔住開腔發炮，為父平反。
「其實之所以有『終身合約』呢件事爆出嚟，係爹哋喺林文龍個婚禮見到鄭嘉穎，當時佢黑口黑面，又藐曬嘴咁對爹哋，點解對一個恩人可以咁樣？當日咁親嘅人，講句 Hello都唔得？爹哋好唔舒服，覺得既然你咁嘅態度，就提醒佢仲有一份合約喺度！如果真係追佢錢，晨早追咗但一提醒佢仲有份約，佢就俾曬反應，動作多多！」
93年 戴思聰與鄭嘉穎簽下一份「終身合約」，只要他一日在娛樂圈搵食，收入要被抽 10%。
97年 鄭嘉穎不續約寶麗金，戴思聰安排簽約台灣的「金點唱片公司」，之後更以 30萬連同其經理人合約一併賣
給「金點」。
06年 3月 擔演《天幕下的戀人》收視理想，同一時間爆出戴思聰以律師信追討鄭嘉穎履行 13年前簽下的「終身合約」，事件鬧到滿城風雨，一星期後，戴思聰發聲明表示不再追究。
11年 3月 未有出席喪禮的鄭嘉穎，被發現到戴思聰擺放骨灰的龕堂善緣拜祭，哭墳一小時。
八年冇聯絡
戴思聰離世，戴師母打擊很大，全靠兩個女不停安慰，才度過低潮。
「我都曾經問過媽咪，如果有機會見到唔鍾意嘅人會點？媽咪話會睇情況，我問如果嗰個人行埋嚟打招呼呢？媽咪話咁咪點嚇頭，唔會行咗去咁小家！」
由師徒反目到恩師病逝，這八年來，鄭嘉穎再無與戴家聯絡。
「我敢講一句，爹哋媽咪行出街，做任何事，都對得住自己良心，見到任何人，起碼唔會掉頭走，因為佢哋無對唔住任何人！」戴辛尉說。
八年換六經理人
鄭嘉穎 01年投無綫後，一直得樂易玲提攜， 06年更憑《天幕下的戀人》榮登視帝；近年他轉戰大陸市場，身價暴漲同時氣焰亦大增，為怕樂大媽要他加簽合約，經常避開對方。去年樂易玲的生日派對，身為「契仔」之一的他未見蹤影。除此之外，鄭嘉穎亦被指經常耍大牌，對劇組人員及身邊經理人諸多投訴，在無綫八年，已六度換經理人，個個都做唔長，相當難服侍。
唔怕對質
當年簽下「終身合約」，鄭嘉穎曾稱是被迫簽約。戴辛尉更氣憤。「佢話爹哋逼佢簽約，一個成年人點逼？用槍？你已經報咗警用刀？你都報警我講嘅全都係事實，我又無做錯事，唔怕同佢對質！佢可以繼續講大話，我就心安理得咁生活！」
鄭嘉穎反面不認人，戴家後人為戴思聰推出回憶錄，亦刻意將有關他的部分全部抽起。
「其實爹哋喺回憶錄寫得最多係鄭嘉穎，但佢已經唔喺度，我哋唔想將件事複雜化，勾起啲唔開心嘅事刺激到媽咪，所以先決定全部抽起曬，只出啲開心事！你問我，想唔想將真相話俾全香港人知，我係想，但點樣去逐一解釋……」
快樂好過有錢
○六年，爆出「終身合約」糾紛，鄭嘉穎仍是「黴得得」，博得外界同情，時至今日，他貴為無綫一線小生，在內地年賺半億。
鄭嘉穎的收入幾何級跳，「終身合約」是否依然生效？戴辛尉顯得有點欷歔。「無諗嘞！錢有邊個人唔鍾意，但我寧願要快樂多啲！如果佢真係搵到咁多，我恭喜佢！希望佢可以做嚇善事囉！有咁嘅運氣，做番啲嘢回饋社會」
合約有得拗
當年的終身抽傭合約是由鄭嘉穎、戴思聰及戴師母三人共同簽署，據伍家賢律師表示，合約條款需要列明其中一方過身，繼承人仍可得到相關利益，否則，合約會出現爭拗機會，須視乎合約內容由法庭作出判決；而現時的終身合約亦未必有效力，為保障藝人利益，遇到不合理的條款，法庭可作出推翻。
|
鍾意就快D Share啦！
|
|
|