[FACE 366] FAITH負評闖四萬 經理人 Percy：其實真係賺咗！ FAITH,MF,

FAITH經理人 Percy強調是住家式公司，冇諗過聽眾咁大反應，但從來冇後悔孕育出 FAITH。

搜尋氣

FAITH負評闖四萬　經理人 Percy：其實真係賺咗！

新組合 FAITH第一首歌點擊率近百萬，負評 2萬幾；第二首點擊率 90萬，負評又 2萬，網民不斷批評、惡搞、同行指住鬧，身為經理人的 Percy Wong終於忍唔住要爆，日前寫了千字聲明大反擊，可惜冇乜人和應兼同意。

Percy接受訪問時感觸到眼紅紅，但仍然大聲堅持：「從來冇後悔！」網民叫 FAITH「收皮」？冇咁易！

其他影片：>>負評又如何？

我本來教開 Hiu Yong（ FAITH成員）唱歌， 12年想捧佢做獨立歌手，但個潮流好似唔係咁，變做組合好似仲有睇頭；當時睇完《狂舞派》叫佢學跳舞，喺跳舞學校識咗 Sky同 Wave，佢哋都跳咗一段時間又出過學校騷㗎喇，覺得佢哋幾夾就組成咗 FAITH。

初初諗住自家製作，吸納到少少支持者就夠，反正唔係咩大公司嘛，製作水準呢樣好抱歉囉！冇預過喺網絡上面分享，大家會用一把國際嘅尺嚟量度，真係受寵若驚！（咁都得？）

本來對首個 MV〈 Stop Peeping〉好有信心，拍之前做過 research睇嚇𠵱家啲女仔鍾意乜，跟住叫佢哋學化妝自己化，本來係好有誠意，喺咪咁醜怪呢？我覺得唔係，係咪韓風呢？𠵱家潮流係咁，好多男仔都化妝出街

FAITH新歌〈 Ma Ma Easy〉的 MV再被狂插，指製作馬虎、音樂古怪，負評高達 2萬。網上圖片

曾於台灣發展的 Percy，做過 model， facebook內有大量騷股猛男照。網上圖片

自稱 30幾歲的 Percy去年為慈善灌錄唱片，自己唱埋一份，亦有拍 MV上網，但他說自己已過了做歌手年紀，現在只想做經理人。網上圖片

FAITH保姆蘭茜的 MV早前被指騎呢， Percy解釋：「首歌係一年前錄慈善碟嘅時候拍嘅，俾人挖番出嚟講大家都好唔開心，唔想再回應。」網上圖片

第二首 MV本來唔係〈 Ma Ma Easy〉嘅，不過小朋友都有佢哋想講嘅嘢，於是寫咗呢隻媽咪歌，係咪要睇住個市場嚟做？我哋覺得唔係！啲音樂俾人鬧，係運氣問題，我搵人做咗個好正嘅混音，但剪接完發現個混音 support唔到條片，但照樣夾咗落去，我又冇聽過先就放咗上網（咁都得？），到點擊率去到 70幾萬，個混音師至打俾我，問我知唔知個音樂好怪，嘩！點會咁㗎？唉！

之前寫嗰份聲明講得好詳細，我哋係有誠意去做，希望大家批判時……我都講唔到落去！冇嬲過，去到呢個位其實真係賺咗，好多音樂人 e-mail我話好羨慕我哋，佢話想攞 3千點擊率都好辛苦，知唔知我好幸福？我仲嬲咩啫，我冇嘢嬲！呢一刻都冇後悔！學咗好多嘢，有乜好後悔呢？以後（ FAITH）做唔做藝人都好，無論做人態度同智慧都有好大收穫！

鍾意就快D Share啦！

下一篇 》