封面
養曬全家 阿媽再嫁 王敏奕提家事爆喊
李麗珍同前夫許願夫妻恩怨，劇中飾演少女版「李麗珍」嘅王敏奕（ Venus），現實中出身都頗為坎坷，相比劇中「朱莉」角色，原來只係小巫見大巫。只有 22歲，單親家庭長大嘅王敏奕，自父母離婚後，就同阿媽相依為命，家中所有開支靠曬做全職按摩師嘅阿媽，直到阿媽再婚，開始懂事的她二話不說孭起頭家。講到家事時，王敏奕更忍唔住爆喊，她說：「我希望用 2年時間儲夠錢，等媽咪全面退落嚟享福！」
王敏奕 1歲時跟隨父母由惠州來香港定居，一家四人住在百呎公屋單位，而她和細一年嘅細佬感情最好（另有一 7歲細佬由繼父所出），不過未幾父母搞離婚，兩姊弟從此分開生活，而靠阿媽一手一腳養大的她，因新劇人氣急升，梗係希望阿媽可以享福。
唔想同細佬分開
週日（ 25日），本刊直擊王敏奕搭地鐵去開工，等到她完成工作時，本刊把握機會上前訪問，談到家中狀況時，她馬上眼濕濕：「細個同細佬關係最好，當爹哋同媽咪搞離婚時，知道要同佢分開生活，當時真係好唔開心，有喊過，因為佢（細佬）好倚賴我，所以都好擔心佢！」
自此，王敏奕和阿媽相依為命，至於家中嘅所有開支都係靠曬全職做按摩師的阿媽，她說：「嗰陣環境唔係咁好，自己對罐頭嘢又會敏感，所以阿媽為咗等我可以食好啲，佢試過一年都放唔夠 7日假，日日都要直踩十幾個鐘，仲要一年都買唔到一件新衫，為嘅都係等我可以食好啲，學多啲嘢，所以自己到 14歲出嚟兼職拍廣告幫補家計。」
8成收入當家用
王敏奕在 14歲開始投身社會賺錢，從此就不問阿媽攞一分一毫零用錢，到她中五時，阿媽再婚再生下弟弟，說：「自己同後父嘅關係都好，自己放假時都會幫手照顧細佬，佢𠵱家讀緊幼稚園，啲學費都幾貴㗎，因為自己仲係起步階段，所以暫時都係阿媽幫手。」
問到最艱苦的時刻，王敏奕再次提到阿媽，她說：「最辛苦嗰個一定係阿媽，仲要捱足咁多年，我𠵱家每個月都會俾 8成收入當家用，自己只係留番 2千自用。自己事業開始有啲起色，𠵱家想慢慢儲夠錢，希望 2年後，阿媽可以退落嚟享嚇福！」
未夠秤入行
王敏奕 14歲就開始接觸演藝工作， 12年更到紐約修讀半年嘅 Acting For Film，雖然拍過唔少作品，不過直至大台劇的「朱莉」一角先開始多人認識，網民激讚演技超班。據知王敏奕想主力拍電影，拍完《 M Club》就未有咁快拍另一套劇集。
|
鍾意就快D Share啦！
|
|
|