鄧穎芝 profile現年 29歲的鄧穎芝， 03年參加「全球華人新秀大賽」而入行做歌手， 04年獲得多個新人獎，推出過 4張唱片。今年自由身的她，早前隻身飛去上海為《中國好聲音 3》試音，最近仲為明年出碟而飛去美國學唱歌及跳舞，成名作有〈霎眼嬌〉、〈電光火石〉。
滾熱辣
林師傑車震𡃁模 Gwen 鄧穎芝捉姦在車
巨聲幫戇男原來個個擅長偷食，繼坤哥後，在大台拍處境劇扮乖仔嘅「木偶哥」林師傑，原來都係鹹濕仔。
上個月，林師傑與女友鄧穎芝分手，原因是𡃁模 Gwen介入。小三 Gwen更趾高氣揚，借 fb發「管仔論」及曬情侶鈪。鄧穎芝嬲爆怒掟林師傑之餘，更於 fb暗寸有人半夜車𡃁模去荒山野嶺車震。
求證鄧穎芝，她無奈表示︰「知道啲唔想知嘅嘢！」至於林師傑回應車震，則口窒窒︰「……俾啲空間我。」
巨聲幫出身的林師傑因為拍處境劇，飾演「木偶哥」而人氣急升，大台近日安排他與湯洛雯有感情線外，更安排他出碟。個個月爆騷的他，事業順利更加鬆毛鬆翼，就算有正印女友鄧穎芝，一樣四出溝女。
親眼目睹車震
其實鄧穎芝亦知林師傑花弗，去年她曾因發現男友偷食，主動向他提出分手，不過後來林師傑死𦧲箍煲成功。今年 5月，鄧再發現男友偷食𡃁模 Gwen，還親眼目擊兩人車震，終告忍無可忍，決定斬纜！
「 Vangie（鄧穎芝）好鍾意 Auston（林師傑），不過 Auston愈來愈過分，成日借開工為名早出晚歸。佢有幾多嘢做，大家都知嗰次 Vangie收到風 Auston泊咗架車喺西貢後山，佢去到嗰陣，見 Auston同個女仔喺後座攬埋一嚿，架車仲鬱嚇鬱嚇。 Vangie當堂嬲到震，跑過去開車門。見到兩條肉蟲喺度，佢嬲到講唔到嘢就喊住走，事後仲同個姊妹呻親眼見到有人車震！」知情者說。
偷食被撞破，「芝傑戀」即玩完。小三𡃁模 Gwen更在 fb曬情侶鈪，又發「管仔論」，令鄧穎芝㷫爆，還拖爆大鑊，揭發賤男友林師傑「車震」。據知剛分手的鄧穎芝終日以淚洗面，為免心軟，她更拉埋一班姊妹陪飛泰國及台灣，再去美國。
26/5正印還擊
一日後，爆出彭順偷食 Liddy事件，鄧穎芝藉此譏諷男友「相比嗰個人偷食，半夜揸車去荒山野嶺同個女仔喺後座唔知做咩，差幾皮！」明寸林師傑同 Gwen車震。
狂愛巨聲幫
現年 25歲的林師傑由澳洲讀書返港，加入「巨聲幫」後被大台力捧，一大堆緋聞亦隨之而生。林師傑先後與同是「巨聲幫」的何雁詩及何紫慧傳緋聞，最近更越級溝港姐，認真有「鬥心」。
提車震無名火起
6月 2日（周一），剛從台北散心返港的鄧穎芝，面容憔悴，面對記者，初時她避談與林師傑分手，但提起車震，佢明顯起火。
記︰點解分手？
鄧︰唔想講！你問番佢！
記︰ Gwen係咪小三？
鄧︰佢（林師傑）話係朋友吖嘛！我唔識佢（ Gwen）！
記︰ Gwen喺 instagram留咗段「管仔論」，林師傑讚好喎！好似反擊你！
鄧︰你問番佢
記︰你 fb寸佢（林師傑）車震？
鄧︰好多人都係咁，冇指明係佢！
記︰據聞你見到啲唔想見嘅嘢？
鄧︰係囉！知道啲唔想知嘅嘢！
記︰你親眼睇到？
鄧︰可能係我自己問題，我好冇安全感……唔講嘞……唔想 hurt到佢屋企人。
備受情傷的鄧穎芝爆瘡兼謝曬，不過同一日林師傑卻心情靚爆，約埋今屆港姐歐陽巧瑩、後生版陳豪楊潮凱等人到赤柱漫步沙灘兼食飯。
傍晚七時，四人在赤柱大街的 Sea Front飲酒吹水。揸車的林師傑發現記者，隨即埋單，還走上前跟記者打招呼，輕佻話︰「想落水（遊龍舟水），好多人呀……我哋影張相先」
被問到與鄧穎芝分手，林即時搶著說：「我冇同佢哋（同行歐陽巧瑩及楊潮凱）講！」楊潮凱卻唔覺意爆：「佢冇嘢呀！頭先仲談笑風生！」
林師傑口窒窒默認
記：鄧穎芝喺 fb聲稱有人車震，係咪講你？
林：……我都係 focus做嘢（口窒窒）
記：你係咪偷食搞到分手？
林：私人嘢唔講
記：咁你有冇車震？
林：……咩呀？俾番啲空間我
記︰第三者係咪 Gwen？
林︰唔係 Gwen，我哋其實唔熟！
記：你贊同 Gwen講嗰段「管仔論」？
林：……唔贊同……（咁你又 like佢？） like都係一個掣，我一係 like一係 comment。
記： Gwen都有你依家戴緊嘅情侶鈪喎！
林：唔知喎，我冇睇到……
再問到是否追歐陽巧瑩，林師傑立即驚青否認。「呢個真係唔係…（擰擰頭）我今日係第二次接觸佢，都係因為佢哋先識……」
問歐陽巧瑩，林師傑花唔花弗？她即置身事外：「如果係，佢已經追咗我」而原本表現雀躍的林師傑被記者問起車震事件後，心情跌曬 watt離去。風流梗要付代價！彭順有辦你睇
車震冇運行
唔少圈中人愛玩車震，梁榮忠當然係先鋒，呢位「車震始祖」偷食朱慧敏，不但震碎佢同鍾麗淇嘅八年感情，仲連事業都震碎埋。
|
鍾意就快D Share啦！
|
|
|