[忽然1周 988] 子宮收縮快 隨時早產 吳文忻冒險挺巨肚落水 吳文忻,MW,

閉氣半分鐘

醫生勒令停遊水，但佗住 9個月 B女的吳文忻，仍偷偷落水，更足足閉氣半分鐘影相。

娛樂喧

子宮收縮快　隨時早產　吳文忻冒險挺巨肚落水

前港姐吳文忻（現改名吳忻熹）， 2011年下嫁有「南丫島王子」之稱的大學同學陳劍陵後，決心淡出娛圈，努力做人妻。

為了趕及 40歲前生 B，吳文忻打排卵針，終於成功得米。現時佗住 9個月 B女的她，由於子宮收縮快兼子宮頸短，隨時早產，醫生勒令她減少運動。不過她冇有怕，照挺 50吋巨肚遊水，她說：「雖然水可以令孕婦減壓，但都有少少辛苦。」

其他影片：>>吳忻熹三點式曬巨肚　今個月生得！

女人生仔，從來並非只是懷胎十月的事。將近 40歲的吳文忻，去年就中西醫合璧求孕，她說：「首先睇中醫調理身體，因為子宮寒的話好難有 BB。之後搵西醫 check輸卵管有冇塞，再打排卵針。每朝去洗手間用排卵棒睇住，邊日命中率高就嚟。」她笑言已成為專家，更稱生仔一事，男人有責。「男性啲 spam（精子）都有活躍同唔活躍，食多啲有鋅物質嘅嘢例如生蠔，令啲 spam可以遊遠啲。」

孕味三點式

現時住在中環的吳文忻，即使腹大便便，也照著三點式到屋企會所泳池曬太陽。

遊水助減壓

即使隨時早產，吳文忻堅持每星期遊水。「醫生有叫過我 cut曬啲運動，但我反而覺得喺水下面個人冇咁重。」

高難度拗腰

有做瑜伽習慣的吳文忻，在水底不時做出拗腰動作，雙手拗後掂實腳趾，非常高難度。

體重升 40磅

吳文忻懷孕初期冇乜戒口兼甚少嘔吐，她更頻做瑜伽，身手依舊靈活。直至到懷孕第六個月，她開始感受佗 B之苦，除了個肚愈來愈大，醫生更預計有早產危機，勸諭她減少運動量。「因為我子宮頸本身短，加上子宮收縮比一般孕婦快咗成三個月，所以隨時早產。」現時懷孕 9個月的她，體重已急升 40磅，上升到新高 150磅，個肚亦有 50吋。「依家個肚硬曬，所以晚晚都瞓得唔好，不過 BB暫時仲係打橫瞓喺個肚入面。如果個頭轉咗落去的話，應該隨時生得。」

雖然隨時早產，但近日天氣酷熱，她堅持挺住巨肚，每周遊水幾次。「我由細到大都好熟水性，所以唔係好擔心。其實遊水可以令孕婦減壓，不過個肚咁大，都有少少辛苦。」她專登搵好友幫她影了一輯水底大肚相，記者發現肚大過籮的她，動作姿勢尚算優美。

2011年，吳文忻低調嫁人，與老公陳劍陵於香港鄉村俱樂部搞婚宴。

做了人妻後，吳文忻淡出娛圈，之後與韓國醫療集團搞整容公司，但現時她已退股，做全職媽咪。

中環產檢

上月 24日，本刊拍得吳文忻單拖到中環產檢，其間她發現記者，笑曬望鏡頭。由於肚大過籮，當時她特登著住鬆身衫遮肚。

影大肚寫真

早前吳文忻花了五位數，與老公到影樓影了一輯大肚寫真，「嗰日影相仲辛苦，要企足成日，加上我慣咗影相挺胸收腹，所以唔係好自然。」

生完即追仔

吳文忻已 book定山頂嘉諾撒醫院產房開刀生 B，「雖然我鍾意遊水，但冇考慮過水中分娩，年紀唔細喇，順產的話有好多變數，所以我一定開刀，安安全全。依家愈來愈緊張，上網睇定啲片，見到要開八層刀，都幾驚㗎！」

吳文忻希望誕女後再下一城追番個仔。「屋企唔係俾壓力我，只係想生多個陪下個女，一男一女就梗係好不過始終都係高齡產婦，唔係話想有就有。依家都叫身邊啲朋友有心想組織家庭的話，就要趁嫩生，遲咗追唔番㗎。」

醫生：情緒令子宮收縮快

一般孕婦生產前幾周都有子宮收縮現象，即是整個腹部覺得有緊繃，一天內次數頻繁，是正常假痛現象。但如果像吳文忻一樣，懷孕第 6個月便發現子宮收縮頻密，有可能是早產跡象。關嘉美醫生說：「好多孕婦喺懷孕初期，以為個肚唔係好大，所以冇好好注意休息，太過勞累嘅話、或者情緒波動，子宮會容易收縮得快。其實子宮每隔 10至 15分鐘就收縮一次，只要臥牀休息就可以改善。如果休息後都冇作用的話，就要即刻搵醫生檢查。」

鍾意就快D Share啦！

下一篇 》