穿上白色 Zara V領 Tee的李心潔，入𨋢後，企定定大方讓記者拍照，而且春風滿面，但就一概不回應記者的提問。
滾熱辣
Liddy回港搶彭順 李心潔留港𥄫實
彭順背住李心潔偷食𡃁模李悅彤（ Liddy），事件轟動中、港、台。三方避世個半月，李心潔終放下心結，原諒偷食老公，日前更孖實彭順來港，跟港視老闆王維基傾合作。周三（ 16日）李心潔單拖殺上葵涌一工業大廈試造型，即使面對逾三十名記者追訪，她依然笑容滿面。
李心潔表面風騷，實則仍有隱憂。本刊收到消息，小三 Liddy在月初已悄悄回港，其間更多次 send短訊給彭順，又𦧲又𠱁伺機搶情郎。為趕小三，李心潔索性做跟得夫人，留港四個月，以防老公再行差踏錯。
自從經歷做小三及喪父事件後，一夜「成名」的 Liddy，辦完父親喪事，便極速和家人逃離香港北上隱居。可是，日前本刊收到消息，原來月初 Liddy已悄悄回港。一名讀者透露：「嗰日（ 3日）下晝兩點，我見到 Liddy喺將軍澳新都城二期商場行街，佢紮住條辮同埋冇化妝，亦都冇戴口罩。最初冇人認得佢，不過後來佢戴番副黑框眼鏡，我先知佢係邊個。佢喺商場行咗半個鐘，冇買嘢就走人。」
未斬纜
據知，彭順在 Liddy喪父後一直與對方保持聯絡，甚至為 Liddy在北京安排住屋、司機等，讓她順利避開香港傳媒的追訪。彭順直至跟老婆李心潔修補關係後，才決心斬纜。至於我心不死的 Liddy，由事件曝光至今，每日都會不定時 send WhatsApp及微信給彭順。知情人透露：「 Liddy同彭順一齊咗年幾，邊可以話斷就斷。佢一早講明冇名份都唔緊要。彭順同佢行埋嗰陣，曾經誓神劈願話會照顧佢，又話同老婆冇晒感情。即使喺北京，彭順都有覆佢微信。但到最近， Liddy搵親彭順，佢都話自己好忙， Liddy覺得個男嘅好似想疏遠佢，所以就決定返香港，諗住當面問清楚。」
主動拍港劇
至於見過鬼怕黑的李心潔，自小三事件後，縱使表面原諒老公，但卻處處防範對方再次出軌。在大馬休養期間，李心潔察覺老公和 Liddy仍有聯絡，曾試過質問對方，但彭順死口唔認。早前她得知老公要回港傾新戲，即提議齊齊返港定居，更主動聯絡港視老闆王維基。
知情人透露：「其實王生（王維基）兩年前開台嗰陣，已經搵李心潔拍劇，仲要開天價 10萬蚊一集。不過李心潔話想留喺大馬照顧個女（彭順與前妻所生），就算幾多錢都唔拍。」今次李心潔來港拍網劇《風雲》，預計有 30集，她最少要留港四個月，大把時間可以近距離監視老公。
今次李心潔所接拍的政治實況網劇《風雲》，原先女主角由鄧萃雯飾演，鄧更連劇本都睇埋，只欠動筆簽約。如今李心潔硬搶角色，據知鄧曾向王維基詐型。港視發言人鄭小姐就回應說：「雯女係睇過呢個劇本，但佢話唔係好啱。」
頻做小動作
周三（ 16日）早上 10時半，心潔終於正式現身，到位於葵涌健康街一工業大廈試造型。當日她一身白衫、牛仔褲，素顏且戴上黑超，與女助手乘七人車抵達。現場一早已有 30名記者守候。只見車內的李心潔不時咬唇又咬手指，多多小動作，看似頗緊張，直至落車行入𨋢時，才展現笑容。其間有記者問她心情是否已平伏？與彭順關係是否沒變？以及知否 Liddy和彭順仍有聯絡？李心潔只是臉帶微笑，未有回應，最後笑着說：「唔好意思。」隨即上樓，心情相當不俗。
直至傍晚六時，李心潔乘貨 Van離開直返入住的帝景酒店，而老公亦於五分鐘內現身酒店向老婆報到。唔止一次偷食的彭順，為博老婆信任，當然要守行為
|
鍾意就快D Share啦！
|
|
|