28/6
娛頭
52歲生日 3連慶 開 P陪阿媽出海 梁朝偉趕絶劉嘉玲
結婚六年，劉嘉玲與梁朝偉婚後一直保持獨立，各自各精彩。剛剛度過五十二歲生日的偉仔，一連三日有慶生活動，不過，全程無老婆劉嘉玲份。冇得一齊開心，嘉玲仍不愁寂寞，連日來 shopping、飯局，玩通宵。
婆媳關係僵化
婚後曾一度積極為梁家生番個，戒煙戒酒戒蒲的劉嘉玲，經過多番努力，最終肚皮唔爭氣，她唯有放棄做媽咪，近年全副心機，投身商界，在內地開鋪開夜店，再回馬槍踩埋返香港，一口氣開三間餐廳，做生意飛來飛去，交際頻繁，兩公婆聚少離多。
「偉仔媽咪其實一向對嘉玲都好麻麻！成日話自己個仔又內向又低調，但嘉玲就貪玩鍾意 social，性格完全唔同。咁老人家最唔鍾意就梗係有緋聞啦，搞到個仔冇曬面！結婚之後嘉玲有段時間真係想生 BB，可惜身體狀況配合唔到，用盡方法都唔成功，偉仔冇所謂，但佢媽咪就空歡喜一場，兩婆媳關係冇乜改善，偉仔喺中間做磨心。」知情者透露。
三袋禮物走
多年來都慣有自己生活空間的梁朝偉、劉嘉玲，每逢大時大節，例必合體慶祝。但由於婆媳關係僵化，怕煩的偉仔，唔想做「夾心人」，老婆老媽子同場，可免則免。連慶祝五十二歲生日，都一樣！
孝順的偉仔，當然阿媽行先，六月二十七日正日，撇甩老婆，兩母子歎中菜慶祝。生日前一天，一班老友包括杜德偉、呂方等，提早跟梁朝偉晚飯慶祝，同樣冇預劉嘉玲。
上週五（六月二十七日），傍晚六點，偉仔現身中環置地廣場，一落車，即箭步衝入商場，左穿右插走入文華酒店；不久偉仔媽亦到埗，兩母子相約了朋友在中菜廳食飯。
食足四粒鐘，便服戴 cap帽的偉仔離開時手上拎住三大袋禮物，等車期間，記者上前，但他未有回答問題，急上車離開。
唔同玩法
劉嘉玲與梁朝偉 08年結束馬拉松之戀，到不丹舉行大婚，二人性格上一動一靜，偉仔內斂，嘉玲愛熱鬧，多年來生活節奏不一，但一個凹一個凸，各有各，相安無事。
私竇避靜
08年平安夜，偉仔同嘉玲又係分開玩，相識滿天下的嘉玲帶了多名猛男回家倒數開派對，怕嘈的偉仔為免應酬，當天下午已移師到麥當勞道另一私竇，與幾個好友把酒言歡，慢慢歎。
無時間陪慶生
「喺偉仔心目中，媽咪一定比老婆重要，雖然兩公婆年年都去北海道滑雪，但偉仔陪媽咪出埠，就唔會叫埋老婆；嘉玲習慣曬，所以偉仔生日，佢都照樣接 job，兩公婆就算一齊喺香港，一個早出，一個晚歸，甚少碰頭。」
未有現身陪老公過生日，劉嘉玲於微博上載一張偉仔的童年照並留言：「愛不是要改變對方，而是在旁守護，生日快樂！」
當日出席品牌活動時，劉嘉玲被問到如何同老公慶生，她推說要為舞台劇《杜老誌》彩排。
「而家得番星期一休息，每日要彩排八個鐘，冇時間同佢慶祝，佢有朋友同佢慶祝！」之後即急急改變話題。
口口聲聲話得星期一可以休息，但上星期二（二十四日），嘉玲卻孖住助手去太子大廈 shopping， Chanel、 Chloe，買足一粒鐘，離開時更有職員替她拎住大袋戰利品上車，非常悠閒。
占士邦船
城中不少富豪追捧的 Sunseeker，是英國殿堂級遊艇品牌，梁朝偉所持有的型號是 Predator 62，價值 1,800萬，有指黎明曾經贈送此款遊艇給前妻樂基兒。朝偉的「戰船」全長約 64呎，速度可達 37海里，船內採用三房兩廳設計，包括一間主人房、兩間客房，最多可容納 20人，是占士邦系列電影的禦用遊艇，因此有「邦船」之稱。
豪宅玩通宵
上週六（二十八日），劉嘉玲無開工，亦無同老公補祝生日，兩公婆繼續各有各玩。
偉仔一早便從寓所出發，約了大班朋友到深灣遊艇會，上了艘價值一千八百萬的 Sunseeker Predator遊艇出海五粒鐘，之後返歸稍作休息，晚上再出動同朋友到灣仔食日本菜。食到十點鐘，飲到腳步浮浮的偉仔貓住離開，司機送完友人返酒店，再送他返歸。
另一邊廂，愈夜愈精彩的嘉玲，晚上才出動，駕車到位於麥當勞道一豪宅開 P，玩至淩晨四點，著住白色恤衫披頭散髮的嘉玲，才與生意拍檔鄧霓儀盡興離開。
兩公婆，生活、性格天南地北，拒復工休息超過一年的梁朝偉，每日做運動打發時間，偶然約朋友食飯飲酒，生活枯燥規律。梁太劉嘉玲主力做生意後，交際頻繁，兩公婆生活習慣，距離愈拉愈遠。
自由自在
婚後生活同未婚一樣的圈中夫婦唔算多，但包容度之大，尋常人不可能做到，另一方有極大自由度，甚至偷食都冇事發生，非常奇趣。
馬德鐘
94年與張筱蘭結婚後，緋聞依然不斷，先後與陳慧珊、郭羨妮等花旦傳出婚外情， 11年爆出與陳浩民在橫店狼擒陳嘉桓，但馬太只在微博訓示丈夫要克己復禮，冇事！ 12年馬德鐘一錯再錯，在無錫向醉酒女化妝師上下其手，又冇事。
|
鍾意就快D Share啦！
|
|
|
