上年九月，細 B手拿私人物件，由赤柱放監出來，三十三歲
就當上尖東話事人之一，年少氣盛的他，江湖從此多事。
爆壹爆
尖東話事人一變三
自 09年尖東霸王泰龍被仇家伏殺後，新義安一直搵唔到合適人選替代泰龍，尖東新記變咗一盤散沙，有時甚至為咗利益同爭女，變成自己人打自己人。一班老新叔父見形勢唔對路，決定選番個話事人出嚟。
好多古惑仔認為，呢個位一定係細 B坐，但班叔父驚細 B未夠班，難以服眾及鎮得住場，所以一改傳統，選咗三個人做尖東話事人，分別係細 B、肥傑和家樂。細 B因洗黑錢逾千萬元，前年被判囚 32個月，上年 9月才放監出來，現主力做藥房生意，而肥傑同家樂一向做開酒吧同毒品，大家可謂河水不犯井水，內訌局面稍為紓緩。由於叔父牙帶強事先講明，叫三人唔好咁高調，所以佢哋當選後都無大事鋪張慶祝，免引起警方注意。
替大佬報仇 out曬
講開泰龍被伏殺，事後警方拘控了多名疑犯，控方在庭上指，事件源於 06年泰龍爆樽「畫花」和勝和大佬「紋身忠」塊面，紋身忠密謀報仇，雖然紋身忠事先已吩咐「唔好斬要害」，但可能刀手出手過重，卒之搞出人命，而紋身忠兩名在附近睇水的手下，更以特赦證人身份出庭頂證同謀，在案中擔任司機及刀手的三人，最後被裁定謀殺罪成判囚終身。而幕後主腦紋身忠因一早著草至泰國及緬甸邊界躲藏，所以香港警方一直捉佢唔到，江湖盛傳紋身忠近日大搖大擺在曼谷出現，因佢每月定時去搵當地一位勝和老叔父支取生活費，但奇怪係泰龍一班親信手下對此傳聞無甚反應，扮作不知，有老叔父慨嘆依家古惑仔唔講義氣，泰龍在生時個個都擁埋去攞著數，人一死個個就四散去搵其他老細，「唔一定要私下去報仇，起碼去收嚇風，確定咗個消息，屆時通知警方拉人都好，當做好市民，又為大佬做番啲嘢。」
紅色大狀粗口爛舌
上期講開律師會會長林新強，法界友人繼續爆料話好多親中法律界人士，好鬼騎呢，例如一位紅色大狀，鍾愛娛圈女子，甚至因此同家人反面，呢位大狀其實早已臭名遠播，佢試過一年內換了多個秘書，因秘書頂唔順佢啲臭脾氣，另外，此人粗口爛舌到可以鬧走客人，事緣有次一位社團大哥搵佢打官司，大家商討官司時，佢把口照出娘親、老母等字眼，卒之社團大哥要拍枱走人，話頂唔順被佢問候娘親，紅色大狀以前想過出來選公會會長，好彩有重量級法界人士四圍打電話叫友好唔好支持紅色大狀，佢先無去馬，否則大律師公會將變成現時律師會咁，有個把口好「叻」嘅會長。
爆哥乜料
金融界撈家，穿梭黑白政商界，朋友遍布旺角至中環，每星期都八到唔同料，同《壹》仔讀者過嚇癮！
|
鍾意就快D Share啦！
|
|
|
