探熱針
厚此薄彼 劉美君大魚大肉 吳千語黃又南捱飯盒
DJ劉偉恆執導新片《王家欣》，除了有吳千語、黃又南孭飛做男女主角，更碌人情咭，氹掂身在美國湊孫的劉美君返港演出。小品電影、資金有限，好在劉美君肯講心唔講金，劇組於是日日預備海鮮大餐慰勞，再配指定牌子法國礦泉水。太后式款待，相對吳千語跟黃又南日日捱食飯盒，真係同戲唔同命！
專幫新人
離開香港轉眼十四個月，劉美君一直留在美國休息、湊孫，享受生活，直至電影《王家欣》監製伍健雄出面游說演出，人情牌一出，即使片酬有限，但仍打動於○八年憑《我不賣身、我賣子宮》奪得金馬影后的劉美君，結束悠長假期返港，她說：「我同雄仔（監製伍健雄）好 friend，加上知道導演個古仔寫好咗六年，今時今日先有機會開拍，我份人鍾意幫新人，因為連新人都唔幫，藝術事業就會玩完。同我合作過嘅人都知我嘴刁，但劇組好 sweet，知我鍾意食乜就每日安排俾我。」
開工有食神
劉美君最愛食海鮮，當日入到坪洲，監製親自到街市入貨，揀了條三斤重細鱗、蝦以及鮑魚，仲有監製陪坐陪食兼俾錢。
「我鍾意 organic，海魚係野生魚，養魚唔好食咁多。我哋休息地方係間酒樓，一陣俾佢哋煮，咁新鮮一定好好味！拍完套戲我會去韓國玩幾日，之後再返美國。」劉美君說。
好啱 key
劉美君大魚大肉，反而兩位男女主角黃又南同吳千語，只能餐餐捱飯盒，但吳千語話天口熱，就算食龍肉都冇味。「天氣太熱，食嘢冇乜胃口，飯盒都係食幾啖食唔落。」
食嘢冇胃口，好在同新拍檔黃又南合作有火花：「又南係個好多嘢講嘅人，我本身都多嘢講，對住佢真係遇到對手，大家 friend啲可以演得自然啲，唔使就住。」至於食緊飯盒嘅又南，亦加把嘴：「拍咗六日已經曬黑，之前咁啱洗完牙，而家咁黑，屋企人話我係黑人牙膏。」
|
鍾意就快D Share啦！
|
|
|