跨欄趕睇舖 劉俐合資百萬賣點心
早前在書展推出寫真的「藍莓」劉俐，密密發功轉型，與友人合資七位數開點心餐廳。首次做老闆娘的她日前落舖視察裝修進度，她更自爆平日慳家成性，日使數十元已足夠。
劉俐跨欄前先「試腳」就位。
劉俐長腿一提，輕易跨過鐵欄。
話晒第一次做老闆娘，劉俐親身到店舖視察裝修進度。
憑無綫節目《耳分高下》擔任「Sing之天使」的劉俐，以「藍莓」一名闖出名堂，去年約滿無綫後回復自由身作多方面發展，早前「處女下海」出寫真與「同門」蕊蕊爭做書展「寫真女王」後，原來藍莓平日「慳得一蚊得一蚊」儲錢，近日更撈過飲食界與兩位圈外友人合資逾七位數開點心餐廳過老闆娘癮！
日前身穿短褲及恤衫的藍莓獨自到觀塘宜安街視察新店裝修進度，她先於附近一間茶餐廳醫肚，食飽後未知是否心急睇舖，她無懼走光危機，竟學奧運金牌得主劉翔玩「跨欄」，擁有42吋長腿的她不費吹灰之力輕易跨過街邊鐵欄，引得途人眼望望欣賞「表演」！其後藍莓左望右望，趁冇車時即大步行過對面街走向舖頭。藍莓走進巷內一間裝修中的店舖，以老闆娘身份巡視一番，期間不時與裝修工人傾偈，逗留約十分鐘才離開。當日氣溫逾30度，在酷熱天氣警告下如此頻撲，藍莓亦濕晒身大汗疊細汗，她走到舖頭旁的雜貨士多，揀選一輪後買下涼茶消消暑，老闆娘認真唔易做！
「紅酒配點心」玩噱頭
首次做老闆娘的藍莓昨日接受本報記者訪問時，承認今次搞餐廳與家人投資了六位數，主打中式點心及老火湯，更大玩「以酒代茶」：「同兩位朋友合資七位數搞間舖，我同屋企人就夾咗六位數投資，遲啲回本一定還畀屋企人。間舖除咗有傳統中式點心，仲諗住玩破格，食點心唔一定配茶，仲可以配紅酒白酒！同埋會專做送湯（外賣）嘅生意，因為飲到家常靚湯好緊要。」問到會否親自做生招牌？她笑說：「冇諗過喎！不過開張當日一定隆重其事，會幫吓手！（幾時開張？）未有日期，依家等緊政府發牌。（平時會落舖？）一定要！做生意要親力親為落手落腳，一腳踢都冇問題，睇數同Marketing嘅嘢都要顧。」
劉俐跨欄前先「試腳」就位。
劉俐長腿一提，輕易跨過鐵欄。
話晒第一次做老闆娘，劉俐親身到店舖視察裝修進度。
|
鍾意就快D Share啦！
|
|
|