張智霖水著女同遊 靚靚冇眼睇
型男張智霖（Chilam）最近碌盡人情卡拍攝新MV，請來好友大玩Cosplay，艷福無邊的Chilam更獲美女相伴，邀得Mandy Lieu日模師妹清穗久美子三點式同車，問到太太袁詠儀（靚靚）有否呷醋？Chilam笑說：「我叫咗佢嚟探班，佢話冇眼睇！」
男歌手張智霖近年積極回歸樂壇，諗頭多多的他拍MV經常發揮創意，曾請來女神陳法拉、謝安琪及黃美棋與他互動，又邀得蔡一傑及伍詠薇性感肉搏，最近他為演唱會主題曲《瘋狂有時》拍MV，再度碌盡人情卡，與多位好友蔡一智、蘇志威、梁烈唯、Bob（林盛斌）及BabyJohn（蔡瀚億）大玩角色扮演，扮蝙蝠俠及殭屍等，更獲Mandy Lieu師妹日模清穗久美子（Kumiko）三點式助陣，盡情表達Crazy感覺！
清穗久美子有緣
Chilam近日為本月6日舉行的個唱密密綵排，日前難得抽空一天拍攝MV，即與眾好友玩到癲，因經理人公司老闆蕭定一拍慣3D電影，MV順勢大玩特技，並時光倒流以80年代做背景，重現幾個80年代Hit爆的場景，首先Chilam Gel行頭扮演占士甸駕駛名車，接載身穿泳衣的Kumiko出發往沙灘遊水，身材出眾的Kumiko大曬D Cup上圍，香車配美人畫面夠曬香艷，其後兩人遇追捕，因而展開一輪瘋狂之旅，並不停變裝避開追捕！Chilam直言與Kumiko相當有緣，曾合作多次拍攝廣告，據知Kumiko更是Chilam粉絲，將自掏腰包往睇騷。問到與索女如此親密，會否怕太太靚靚呷醋？Chilam笑說：「我有叫佢嚟探班，佢話冇眼睇我呀！」
殭屍造型過足癮
Chilam大玩Cosplay，身穿蝙蝠俠衫與扮演羅賓的梁烈唯追捕謎語人BabyJohn，蒙面的Chilam與唯唯大騷「腹肌」，造型Old School配合懷舊Feel，單睇造型已令人笑爆嘴！另一幕Chilam與蔡一智化身中國古代殭屍，蘇志威則戴上眼鏡扮道士，問到最喜歡的造型，Chilam笑說：「最好玩梗係係扮殭屍，我冇咩機會，點睇我都唔似殭屍今次真係過足癮！」
文：影視組
|
鍾意就快D Share啦！
|
|
|
