體重高達 145磅，近期永遠黑衫嘅衞蘭明顯仍未在狀態，輪廓仲未出番嚟！
封面
戒煙暴肥追欣宜 145磅衞蘭有仔埋身
近年事業停滯不前的衞蘭，掛住瘟仔兼身形走樣，懶散態度仲激嬲米飯班主黎明。
32歲唔後生，有傳衞蘭喊住向黎明認錯，拍心口唔再 hea努力減肥，而黎明亦親自搵張玉珊打救愛將。冇得唔聽話，已成功戒煙的衞蘭，體重比之前更脹，已升至 145磅新高，再唔減分分鐘變欣宜第二！
不過肥人都有市場，本刊發現衞蘭近日同一名年約 20歲的汽車經紀玩得好埋，對方幫衞蘭買車，又經常黐住蒲，關係密切。邊個話肥就冇仔埋身先？
出道 9年的衞蘭，近年掛住瘟仔又唔肯 keep，體重失控更被指似甘草盧宛茵，激到一手捧紅佢的 Amusic老闆黎明下令唔再續約。
3小時食兩餐
唯一飯碗都不保，衞蘭要養埋不事生產的細妹衞詩，又要孭起月租 3萬的大圍新居，焗住向公司跪地認錯，向黎明保證唔再 hea，定時做機減肥，並應承戒煙保持健康。
搣甩煙癮係好，但同時亦令肥底、得 5呎 3吋嘅衞蘭脹上加脹，體重激增至 145磅。生活變得有規律，不過衞蘭在飲食方面仍未有節制。上月 18日（星期三）下午 5點，衞蘭同阿妹先到小食店篤魚蛋、腸粉，然後 8點未夠，又同教友王君馨等人飯局，密密食唔停口！再咁食法，唔通以欣宜的 200磅做指標？
「 SJ」情侶車牌
早前同教友男友 Roger無疾而終的衞蘭，近期終於有新密友。據知衞蘭密友 Edwin Yu只有約 20歲，屬 90後，現時在車行做經紀，去年尾才考獲車牌的衞蘭，「處女車」寶馬亦是透過 Edwin幫手買。除了車行正職， Edwin本身亦擁有一部七人車，唔使返工時會兼職做司機。
「 Edwin有時會做下 freelance司機，有次佢個 friend介紹 Janice俾佢識，兩個好快熟絡，成日出嚟一齊玩。之前 Janice冇工開好唔開心，晚晚出去劈酒劈到貓曬，無論幾點都係 call Edwin去接佢， Edwin又會隨傳隨到，對女友都冇咁體貼！」知情人士透露。
新牌仔衞蘭，今年初透過 Edwin幫手買入一架易手寶馬代步，兩人唔同時間出牌，但兩架車竟然巧合地以「 SJ」開頭，好有情侶車牌 feel啫！
減肥真人騷
年尾開演場會的衞蘭，唔想脹爆 look趕客賣唔到飛，近日開始積極減肥，而 Amusic亦將佢一系列做運動的短片「 Janice Works Out」公開任睇，向觀眾派定心丸。最新一段片都係 6月初，睇嚟衞蘭要勤力啲 upload喎！
Janice︰我當佢係細佬
上週四（ 26日），衞蘭回應本刊時否認同 Edwin拍拖，強調只當對方係細佬，話畀黎明知自己會專注事業。
F：《 FACE》 J：衞蘭
F：最近幫你搞買車嗰個朋友，係咪飲嘢識？
J：嚇？點解你會識佢？朋友咋！
F：佢本身有女朋友？
J：我知，我當佢係細佬！
F：如果佢可以同你做男女朋友，會唔會考慮？
J：梗係唔得啦，佢好細個，得 20歲咋！佢有女朋友㗎！
F：近期 G.E.M.返內地發展咁紅，你識韓文（衞蘭係中韓混血兒！），有冇諗過去韓國發展？
J：睇機會啦，我相信公司嘅帶領，唔會擔心，逐步嚟，我𠵱家比較注意自己健康。
F：怕唔怕人將你同欣宜比較？
J：我最近戒咗煙，一定脹咗啲！
F：會唔會再努力去搵好嘅發展？驚唔驚被淡忘？
J：咁樣會好辛苦！我信咗主，所以有好多嘢都尋找緊自己……事業當然希望更好啦，𠵱家忙緊出碟同演唱會，唔使咁急住！冇得令所有人開心，都要自己開心先得，你紅唔代表你開心！
開心的確係最重要嘅！
樂壇肥妹
香港歌手愛瘦，得 100磅都話要再減肥，其實唔少有肉地的女歌手都係唱得之人，上一代有曾路得同「肥媽」 Maria Cordero，𠵱家則有欣宜、林二汶、「巨聲幫」鄧小巧同街頭歌手張潔瑩。
欣宜 200磅
由細肥到大的欣宜，上週五（ 27日）趁亡母肥姐生忌，公開在 fb剖白當年減肥血淚，並宣布唔再減，成為肥人英雄。「我決定減肥，去做世界上的普通人，我不是死肥婆，不是終極豬扒。」
|
鍾意就快D Share啦！
|
|
|
