捱咗多年嘅黎諾懿，終憑《愛．回家》馬壯一角入屋，除咗爆騷外，亦有唔少登台錢搵，不過把口就花咗啲囉。
真面目
甜到漏 《愛．回家》鹹濕王 黎諾懿笑高 Ling「波 dun dun」
大台處境劇《愛•回家》最近話會拍到 700集，長命過不死狼人，硬播兩年幾難睇都洗咗你腦先！《愛》劇個個角色正面，劇中男主角黎諾懿捱咗多年，更撈到個主角馬壯有名有利仲準備年底娶 5億身家女友。
劇中馬壯係顧家男但口花花，原來現實黎諾懿把口更唔收。據知黎諾懿最愛喺最多女演員出入的服裝間內，公然講有味笑話。他更試過叫同劇演員莊思明、湯洛雯隆胸，仲話想大台波神高海寧入組，只因想睇佢「波 dun dun」喎！
34歲黎諾懿入行 10年，兩年前開始拍《愛•回家》，憑馬壯一角終於入屋，而且係該劇爆騷王，以佢騷價 5千一個，黎諾懿隨時搵成 10萬一個月；年底仲計劃與富貴前港姐女友李潔瑩結婚，一幅好男人模樣，但原來私下把口相當花。
叫湯洛雯隆胸
據知入行多年嘅黎諾懿，同一眾台前幕後混熟，由於製作部同事男性居多，成班麻甩佬圍埋，一開口就講鹹嘢。
據一服裝阿姐爆料：「試過有日收工，有位服裝阿姐問佢『收工喇？』條衰仔即刻講：『係呀！去叫雞呀！』雖然話人哋知佢玩啫，但對住女人講啲咁嘅嘢，始終唔好嘛！」由於黎諾懿係劇中男一，加上係曾勵珍愛將，而監製徐遇安又當佢仔咁錫，所以幕後都唔敢得罪呢位《愛．回家》大哥。
據知黎諾懿亦最鍾意係服裝間四圍撩女，更試過當眾評論湯洛雯、莊思明身材。「你兩個不如去隆胸」雖然兩人都知講笑，不過都令人相當尷尬。
而早前傳出高海寧會入劇組，仲會同黎諾懿有感情綫，但原來純屬黎諾懿主觀願望。知情者說：「係人都知佢冧高 Ling啦，佢親口講㗎：『如果高 Ling做我秘書，著住件吊帶波 dun dun揸 file，係咪好睇先。』」黎諾懿咁好橋，其實不如做埋編劇，咪可以實現願望囉。
新加入又走
上週四（ 26日）《愛．回家》到大美篤拍外景，當日拍攝劇楊明和朱慧敏劃獨木舟場口，但據知新加入的楊明又將會離開，玩咩！
亂改對白 監製開會狂炳
上週三（ 25日）《愛．回家》忽然開大會，原因係監製徐遇安有感一眾律師樓演員，態度散漫兼亂改劇本對白。其中契仔黎諾懿亦被鬧，不過鬧得最勁係李霖恩，更被監製掟劇本鬧，之後更命令佢即場揸住劇本逐隻字讀一次，認真𤓓爆！
當日開會半小時，主要係希望一眾律師樓演員要跟劇本做，尤其係張達倫、黎諾懿，而李霖恩更要當眾揸住劇本讀對白。呢啲情節，拍出嚟就好喇。
馬子妮大減戲
《愛．回家》播到 544集，距離 700集仲有一段距離，全劇唯一嫩口女角，有傳馬子妮（蔣家旻飾）亦被飛。不過蔣家旻話：「會講我去英國讀書，但有好多我用 webcam同馬家溝通嘅戲分，亦拍緊我喺英國返嚟嘅戲，戲分𠵱家係少咗，但唔係被飛。」唔係飛，不過大減戲啫！
|
鍾意就快D Share啦！
|
|
|
