掃呢頁CODE去手機

2014年7月2日 星期三

[FACE 371] 甜到漏 《愛.回家》鹹濕王 黎諾懿笑高 Ling「波 dun dun」 黎諾懿,BKD_S,MF,




捱咗多年嘅黎諾懿,終憑《愛.回家》馬壯一角入屋,除咗爆騷外,亦有唔少登台錢搵,不過把口就花咗啲囉。

真面目

甜到漏 《愛.回家》鹹濕王 黎諾懿笑高 Ling「波 dun dun」

大台處境劇《愛•回家》最近話會拍到 700集,長命過不死狼人,硬播兩年幾難睇都洗咗你腦先!《愛》劇個個角色正面,劇中男主角黎諾懿捱咗多年,更撈到個主角馬壯有名有利仲準備年底娶 5億身家女友。

劇中馬壯係顧家男但口花花,原來現實黎諾懿把口更唔收。據知黎諾懿最愛喺最多女演員出入的服裝間內,公然講有味笑話。他更試過叫同劇演員莊思明、湯洛雯隆胸,仲話想大台波神高海寧入組,只因想睇佢「波 dun dun」喎!

年底同前港姐李潔瑩拍拖,女方家底豐厚,有傳 5億身家。黎諾懿娶人後把口真係要乖少少。

34歲黎諾懿入行 10年,兩年前開始拍《愛•回家》,憑馬壯一角終於入屋,而且係該劇爆騷王,以佢騷價 5千一個,黎諾懿隨時搵成 10萬一個月;年底仲計劃與富貴前港姐女友李潔瑩結婚,一幅好男人模樣,但原來私下把口相當花。

叫湯洛雯隆胸

據知入行多年嘅黎諾懿,同一眾台前幕後混熟,由於製作部同事男性居多,成班麻甩佬圍埋,一開口就講鹹嘢。

據一服裝阿姐爆料:「試過有日收工,有位服裝阿姐問佢『收工喇?』條衰仔即刻講:『係呀!去叫雞呀!』雖然話人哋知佢玩啫,但對住女人講啲咁嘅嘢,始終唔好嘛!」由於黎諾懿係劇中男一,加上係曾勵珍愛將,而監製徐遇安又當佢仔咁錫,所以幕後都唔敢得罪呢位《愛.回家》大哥。

據知黎諾懿亦最鍾意係服裝間四圍撩女,更試過當眾評論湯洛雯、莊思明身材。「你兩個不如去隆胸」雖然兩人都知講笑,不過都令人相當尷尬。

而早前傳出高海寧會入劇組,仲會同黎諾懿有感情綫,但原來純屬黎諾懿主觀願望。知情者說:「係人都知佢冧高 Ling啦,佢親口講㗎:『如果高 Ling做我秘書,著住件吊帶波 dun dun揸 file,係咪好睇先。』」黎諾懿咁好橋,其實不如做埋編劇,咪可以實現願望囉。

幻想對象

高 Ling入《愛.回家》其實係黎諾懿主觀願望,不過都希望你願望成真,大家睇得開心啫。

平胸孖寶

湯洛雯、莊思明兩位港姐出身,論身材都唔輸蝕,未致於被黎諾懿講到要去隆胸咁嚴重啩。

新加入又走

上週四( 26日)《愛.回家》到大美篤拍外景,當日拍攝劇楊明和朱慧敏劃獨木舟場口,但據知新加入的楊明又將會離開,玩咩!

亂改對白 監製開會狂炳

上週三( 25日)《愛.回家》忽然開大會,原因係監製徐遇安有感一眾律師樓演員,態度散漫兼亂改劇本對白。其中契仔黎諾懿亦被鬧,不過鬧得最勁係李霖恩,更被監製掟劇本鬧,之後更命令佢即場揸住劇本逐隻字讀一次,認真𤓓爆!

當日開會半小時,主要係希望一眾律師樓演員要跟劇本做,尤其係張達倫、黎諾懿,而李霖恩更要當眾揸住劇本讀對白。呢啲情節,拍出嚟就好喇。

黎諾懿最愛係服裝間發表偉論,試過對住服裝間姐姐大聲講笑話自己收工去叫雞。

馬子妮大減戲

《愛.回家》播到 544集,距離 700集仲有一段距離,全劇唯一嫩口女角,有傳馬子妮(蔣家旻飾)亦被飛。不過蔣家旻話:「會講我去英國讀書,但有好多我用 webcam同馬家溝通嘅戲分,亦拍緊我喺英國返嚟嘅戲,戲分𠵱家係少咗,但唔係被飛。」唔係飛,不過大減戲啫!

馬子妮(蔣家旻飾)同豪(李豪飾)呢對情侶深受網友歡迎,可惜馬子妮要去英國讀書,二人最後分手收場!

查理施律師樓將會執笠,劇中唔少演員將被飛走,暫時留得低係湯洛雯、張達倫、黃子雄。

多次傳出被飛嘅朱慧敏,現時仍繼續為《愛.回家》開工。 700集時應該仲繼續見到佢,至於傳入組嘅高海寧,現忙拍《天眼》,想拍《愛》劇都冇期。



鍾意就快D Share啦!