經過半年大執， Meggie翻新樣比起參加《沒女》時，真係正常好多。
探熱針
爆新 look 沒女 Meggie 餵飽李治廷
繼《盛女愛作戰》、《求愛大作戰》後，無綫再炮製真人騷節目《沒女大翻身》，七個被形容為神級騎呢港女，進行為期半年的大翻身，由心靈到外觀，全經導師團隊徹底改造。
打頭陣出場的沒女極品 Meggie，樣貌「驚」為天人，對靚仔情有獨鍾，追過黎明，餵過李治廷，抽盡型男水的爆 seed醜女，經過半年改造後， Meggie個樣果然唔同晒，節目出街前，她再補打 botox，落重料大執！
愛死黎明
被形容為人間悲劇、沒女中極品的三十四歲醜女 Meggie（陳子懿），大牙肉插蘇鼻「鞋抽」面，配埋把雞仔聲同冬菇頭髮型，外表睇，是七個沒女中最具殺傷力一個。
雖然擁有神級外貌，但無阻 Meggie對靚仔的熱切追求，除了是黎明的死士粉絲，在她的社交網頁內，更發現唔少黐住型仔男模，流晒口水的亢奮集郵照。
自《沒女》宣傳片出街後， Meggie馬上被黎明 fans認出，而被偶像力捧的歌手李治廷，同樣獲她「愛尋迷」。一一年，李治廷舉行聖誕歌迷聚會， Meggie執到好籌，上台爆牙肉餵食蛋糕，至於「艷福」無邊的李治廷，則努力唧出笑容，「硬食」溫柔。
還原靚靚拳
「 Meggie喺 Leon fans堆中有個綽號叫 Meggie Leon，佢同其他頭號 fans一樣，逢車必追，逢場必到。可以有咁多時間追星，因為佢成日俾人蝦，份份工都做唔長。聽講佢拍完個節目整番好個樣，已經搵到工，喺國泰航空餐飲部做咗三個月，第一次打工順利過到試用期。」知情者說。
上週三（七月三十日）上午，經過「全面」翻新的 Meggie，離開天水圍寓所往尖沙咀，搵整形外科醫生鄭明孝執漏；怕宣傳片出街後被人認出， Meggie一上車便戴口罩。
有專人教路， Meggie的冬菇頭已換上清爽短髮，整過棚牙再減肥，由極品醜女提升到接近正常，雖然驚嚇度大大減弱，但天生面長頸長，驟眼看仍跟迪士尼卡通電影《魔雪奇緣》中的詼諧野馬，似到十足十。
去到醫學美容中心， Meggie跟護士說：「 Book咗十一點打 botox！」
原來趁節目出街前夕，作最後衝刺。做完療程， Meggie便坐車返東涌上班，其間每逢路過見到鏡，必定停步照爆，自信心返晒嚟。
初戀遭騙財
在節目大喊：「我一生註定係失敗！」的 Meggie，因長相關係，自小遭人排斥，更曾經自殺。三十出頭，只拍過一次拖，但初戀男友居然是愛情騙子。
「當時有個叫子華，三十零歲嘅男仔追佢，我哋都有提醒 Meggie要小心，最終個男人話搞生意，氹 Meggie借八十萬俾佢；佢俾仔瘟，竟然瞞住阿媽將間居屋做二按，借咗幾十萬俾對方，仲借埋財務公司，個衰人收到錢就人間蒸發！ Meggie當然傷到入肉，仲累埋阿媽每個月淨係還息，都要一萬三千五百。」知情者爆。
有指 Meggie在《沒女》心靈劇場中，見到有人扮拋棄妻女的父親和呃錢男友時，觸動埋藏多年的舊傷，歇斯底里震撼全場。
「佢阿媽當年俾老公拋棄，唔信男人，亦都唔想個女信男人，所以由細到大將佢打扮到好騎呢。但睇過佢父母嘅相，個樣都好正常，唔知點解 Meggie會正正得負。」知情人說。
爆炸導師團
雌雄同體教練 王君萍
外號「鴨仔」的王君萍，有十八年私人健身及體能教練經驗，身邊學生盡是名人藝人如何超蓮、張敬軒、 G.E.M.及陳偉霆等。 05年，王君萍贏得「香港最具潛質運動員」獎項， 08至 09及 2011曾獲選香港十大傑出健身教練，並成為 2013年 Life Fitness世界十大教練；並連續多年贏得「亞洲女子健美錦標」冠軍及「東亞健美錦標賽」女子健美冠軍，健碩外形，難以一眼辨認出係女兒身。
|
鍾意就快D Share啦！
|
|
|