日前王祖藍帶同媽咪，以及大隻佬麵家老闆（右一）去荃灣睇鋪位。
探熱針
分店預埋李亞男 王祖藍荃灣賣雲吞
雖然曾有過與友人合作開糖水鋪，最後蝕百萬收場的慘痛教訓，但事隔數年，王祖藍決定捲土重來，夥拍大隻佬麵家老闆開雲吞麵店，日前他帶埋阿媽去荃灣睇鋪位，為在飲食界東山再起做準備。準藍嫂李亞男表示，等麵店有錢賺，她會入股計劃中的將軍澳分店。開鋪做老闆娘，李亞男睇定嚟「食」！
帶阿媽睇鋪
開鋪做生意，地點人流是關鍵。王祖藍日前母子咇到荃灣德華街一帶巡鋪，拍檔大隻佬麵家老闆賴義芳早已在場守候，一行人走入一個約千呎地鋪，裡裡外外周圍睇，之後祖藍更駐足鋪外，觀察人流。
之後三人跟隨經紀返地產公司，了解附近一帶其他鋪位，再一同返回旺角大隻佬麵家，邊食邊開會。
「想做雲吞麵，預算要投資過百萬，因為好多地鋪啲租都俾金鋪同藥房搶貴晒，要先找到地點租金啱嘅鋪先開。」王祖藍對身邊人說。
據了解，王祖藍跟大隻佬麵家是老主顧，與老闆相識多年。
「由細幫襯到大嗰隻，連祖藍媽咪、舅父都係熟客，平日工作忙，冇乜同其他親戚見面，但去到麵店，祖藍透過老闆就會知道大家嘅近況，可想而知有幾熟。幾年前搞糖水鋪蝕錢，祖藍明白力不到不為財，所以佢今次會睇緊啲，加上對拍檔有信心，所以亞男都話唔介意男友攞咗啲老婆本去投資。」
將軍澳分店
對王祖藍再闖飲食業搞生意，李亞男決定睇定嚟食！
「等佢試吓先，最重要唔好蝕錢，唔好衝動，如果 OK，開分店我都會投資。我同祖藍一樣諗法，再開嘅話會喺將軍澳，方便同事食碗麵 gathering。」李亞男說。
上週五（八月一日），記者與到電台做訪問的王祖藍面談。
壹：記者
王：王祖藍
壹：你準備喺荃灣開雲吞麵店？
王：呀……我睇吓啫！
壹：係咪同大隻佬麵家老闆合作？
王：我好朋友，（佢係）我好朋友，未知道，周圍睇吓咁
壹：之前開甜品鋪蝕大本，今次怕不怕？
王：哈……我對佢（拍檔）有信心嘛。
壹：李亞男會幫手？
王：我自己生意。
有指王祖藍和亞男明年會拉埋天窗，李亞男可以擔定櫈仔做老闆娘！
|
鍾意就快D Share啦！
|
|
|