掃呢頁CODE去手機

2014年8月20日 星期三

[FACE 378] 本週回帶 靠「天堂老鳥」翻生 魯振順 30年扮嘢王 MF,




57歲

全知言

本週回帶 靠「天堂老鳥」翻生 魯振順 30年扮嘢王

近排播緊嘅《 Sunday扮嘢王》,家燕媽媽絕對可以 skip,但甘草魯振順、王俊棠同王維德扮「天堂老鳥」,就好多人睇完都話笑到肚痛!

「嗰時收到通知,話要扮天堂鳥,講真我真係唔認識佢哋。咪上網、上 YouTube睇佢哋嘅嘢。咁我扮 Lincoln呀嘛,咪睇多啲佢嘅動作、眼神同一啲微細動作囉!之後見到真人就再問吓佢,交流吓意見。而且我哋錄影前有個幾鐘排練,有接觸過會易啲捉摸。」入行 34年嘅魯振順其實先係名符其實嘅「扮嘢王」,最經典扮過「一隻手字捽死佢」嘅洪朝豐。今次扮男子組合成員,魯振順話佢初時都有抗拒,不過身為戲劇組一份子,做戲其實咪一樣係扮人哋,「以前扮過奇哥(李奇),不過都係扮天堂鳥迴響最大,真係估唔到,工作量都因為咁多咗好多。而且同佢哋 3個後生仔又好玩,佢哋唔扮嘢,冇代溝,我哋仲幾玩得埋添!」

咪睇魯振順扮嘢唱得跳得,其實佢已經 50有 7,唔怪得佢話初時排舞嗰陣都幾吃力,後尾適應咗至 ok,嚟緊佢會繼續喺《 Sunday扮嘢王》度扮嘢,扮拾音社唱〈 Kiss Kiss Kiss〉,到時大家可能要笑到跌低。最後都要提番大家,薛家燕係要 skip㗎!

早前喺《 Sunday扮嘢王》入面扮天堂鳥又唱又跳,魯振順表現最出色,成年輕人潮 icon。

01年,喺電視劇《娛樂反斗星》扮梅朝豐,影射當時打得火熱嘅洪朝豐同寶詠琴,因而激嬲 2人。

95年,古天樂同李若彤版本嘅《神鵰俠侶》,魯振順飾演霍都,至今呢個角色同套劇都係魯振順最愛之一。

80年入行,當時仲係正正經經未走扮嘢路線,當年同劉德華合作拍《獵鷹》。大家出世未?

57歲,個樣都仲 keep得幾好,原來魯振順鍾意喺屋企用果酸護膚。《忽然 1周》圖片

拍劇拍結婚場口就拍得多,但現實生活中,魯振順一直未婚。



鍾意就快D Share啦!