[FACE 378] 爆紅 強國都知陳偉霆是誰喇 陳偉霆,MF,

陳偉霆啱啱喺北京開騷，反應勁好！

真面目

爆紅　強國都知陳偉霆是誰喇

港星愛北上搵食，一個唔覺意爆紅隨時發過豬頭！最新幸運兒係「的士陳」陳偉霆，當年因黃曉明一句「而我不知道陳偉霆是誰」，被高登仔笑到面黃，最近終於憑內地劇《古劍奇譚》「大師兄」一角彈起，微博粉絲人數急增至近 190萬，更劇接劇成為搶手貨添！

不過強國錢唔易搵，次次開劇起碼要留低幾個月，適應唔到當地生活都幾大鑊。𠵱家就等陳偉霆過番幾招北漂求生攻略

1.無啦啦點解咁紅？

呢套劇改編自內地同名武俠 hit game，食住呢條電子遊戲水，而且有楊冪、李易峰，加上安排喺大台湖南衞視播，自然多觀眾！而我飾演嘅「大師兄」陵越，性格溫柔內斂，好多觀眾都鍾意呢個「暖男」形象！

《古劍》 game喺內地勁 hit，難怪已經貴為一線花旦嘅楊冪都肯接。

喺香港拍咗多套電影都未彈得起，估唔到一套《古劍奇譚》可以令陳偉霆吐氣揚眉！

2.係咪長駐內地賺人仔？

威廉對上一次喺香港唱歌，已經係 12年新城喇！

暫時重心都係內地工作為主，𠵱家揀緊啲劇本。啱啱喺北京開咗個音樂會，嚟緊又有部叫《活色生香》嘅劇，同劇有唐嫣同李易峰，仲有之前拍落套《少年四大名捕》都未播。

3.你片酬同微博人數都狂升喎？

價錢就唔講喇，但的確比之前加咗嘅！至於微博，之前得幾十萬，但《古劍》出咗街之後，粉絲人數喺一個月內急升到𠵱家接近 190萬，所以都好開心！

威廉𠵱家出入大陸，都有勁多粉絲接送。靠《古劍》食糊，威廉連微博頭像都換上「大師兄」個樣！

4.成日北上拍劇，最鍾意去邊間餐廳？

我最愛去橫店嗰間「洞天茶餐廳」，佢個焗豬扒飯超正，好多香港藝人都鍾意去食，你哋落去分分鐘撞到好多明星㗎！

據講呢間茶餐廳係香港人開，所以好多港星幫襯！

鍾意就快D Share啦！

下一篇 》