[FACE 378] 鄭中基畀大台抄橋兼截糊 中基,鄭中基,MF,

全知言

鄭中基畀大台抄橋兼截糊

大台神功，除咗是是旦旦，仲有面皮厚！鄭中基（ Ronald）以「張保仔」為題材開拍電影《神秘寶藏》，大台又拍張保仔；人玩穿越佢又玩穿越；人玩度身訂造海盜船，你又話準備整番隻船。不過人哋鄭中基嗰套一早拍完做緊後期，你就下個月至開鏡，抄得咁盡？難怪導演鄭中基都頂唔順要上微博插大台。

上週四，趁住鄭中基為另一套戲《第七謊言》做宣傳，全知言嗱嗱聲捉住佢問兩句。呢日全知言問起， Ronald竟然熄晒火，「可能真係咁啱呢……我套嘢雖然已經拍完做緊後期，但係好多嘢搞，最快都要出年暑假至有得上畫，大台分分鐘快過我。我又唔怕俾人飲咗頭啖湯喎，因為我哋製作好好多，搞特技都花咗 8位數字。」咁又係， 8位數字荷里活特技，你估大台慳皮慳力是是旦旦抄得嚟咩？

《神秘寶藏》拍咗幾個月，鄭中基、法拉同男主角黃子華亦專登入埋長洲拍攝，𠵱家分分鐘俾大台截埋糊。

喺微博留言鬧爆，但呢日全知言捉住 Ronald問清楚，佢嘅態度變溫和，始終唔敢得罪大台。

黃浩然接拍大台《張保仔》，最近就去咗張保仔洞參觀，做定功課。

鍾意就快D Share啦！

下一篇 》