2014年8月20日 星期三

[FACE 378] 執平貨 韓星新蒲點 安宰賢工廈 outlet洗樓 安宰賢,MF,




4:30pm到港收花

上週五( 15日)下午到港,安宰賢步出 VIP通道後,即收到大會送花迎接,但安宰賢亦不忘向現場 fans點頭,好親民。

真面目

執平貨 韓星新蒲點 安宰賢工廈 outlet洗樓

上週六( 16日),一連 3組韓星飛嚟香港掘金, JYJ開騷,金宇彬宣傳新戲《朋友 2》,而《星星》演千頌伊細佬嘅安宰賢都唔執輸,同日踩到香港出席天梭表活動,期間賣萌咬手指、又造出心心手勢,冧到台下 500 fans尖叫。

上月尾, BIGBANG訪港,成員勝利亦爭取時間去鴨脷洲名店 outlet掃韓國買唔到的名牌款式返韓國 mix and match。今次人財雙收的安宰賢亦同其他韓星一樣有行 outlet癮。週日( 17日)離港前,專程留港消費,由經理人陪同下,大軍殺入鴨脷洲名店 outlet集中地新海怡廣場,「洗樓」掃減價名牌, 3粒鐘後安宰賢買下 5大袋戰利品,香港之旅滿載而歸!







《來自星星的你》除令男女主角金秀賢同全智賢紅上加紅,連劇中飾演千頌伊細佬,同金秀賢外星指對指嘅安宰賢,亦紅埋一份,早前先拍完韓劇《你們被包圍了》,依家仲拍緊兩套電影,包括《時尚王》同《婚禮日記》,今年賺唔少。

7:45pm歎燒鵝

返酒店休息一陣,安宰賢即出動,由助手及工作人員陪同下,走去尖沙咀棉登徑雲來軒歎粵菜,當中梗係唔少得食餐廳名菜港式燒鵝。

16/8 9:45pm活動賣萌

上週六( 16日)下午,安宰賢出席「瑞士天梭表——第 17屆韓國仁川亞運倒數展覽揭幕禮」活動,期間宰賢 oppa發揮暖男本色,不斷向在場 fans揮手,同江若琳合照時,仲擺埋咬手指甫士,超可愛。

17/8 1:15pm瞓到中午趕 shopping

離港前,安宰賢原本打算朝早 11點離開入住的 Ritz Carlton酒店,去鴨脷洲新海怡廣場掃名牌,但因瞓晏咗,最後搞到下午 1點先到海怡。一到達,安宰賢即上 27樓餐廳快快食午飯醫肚,期間一直手機送飯。

由高層掃起

由於 shopping緊要過食飯,所以安宰賢只係花咗半粒鐘食午飯,就急急腳開始 shopping。

1:45pm貪靚照鏡

先到 27樓掃貨,安宰賢見到有鏡,即走埋去整理頭髮,一照就照咗成分鐘,勁貪靚。

2:00pm狂睇西裝

之後落 23樓連卡佛 outlet。由於 model出身,安宰賢對服裝亦好講究,睇西裝時就不斷問經理人意見。

2:30pm婉拒合照

喺連卡佛睇鞋,安宰賢被 fans認出,之後更有 fans要求合照,但因是私人時間,所以經理人禮貌地拒絕。

4:15pm 5袋戰利品

3粒鐘洗樓掃名牌,最後安宰賢買咗 5大袋戰利品,由經理人拎上車。其實大隊集合時間係 4點,安安掛住掃貨,遲了 15分鐘先落樓。

5:05pm離港風騷

滿載而歸,之後直接去機場嘅安宰賢,見到 200名到場送機嘅 fans,即揮手道別。買咁多嘢,心情唔靚就假。