[忽然1周 998] 向太鬧爆星爺 甄妮又抽水？ 向太,周星馳,星爺,甄妮,陳嵐,MW,

媽咪姐

向太鬧爆星爺　甄妮又抽水？

呢幾日，電影公司老闆娘向太陳嵐鬧爆周星馳喺網上抹黑老公向華強嘅新聞，又有新進展。最新加入嘅角色，係娛樂圈判官——甄妮！咦，點解又關佢事？

其他影片：>>為夫爆大鑊　向太力數星爺不是
>>向佐詛咒星爺去死　王晶林小明齊怒轟：人品差兼自私

Well，唔知大家仲記唔記得無幾耐之前，甄阿姐先喺 fb貼文評「房東事件」，寸祖名「腦生蟲」，仲同習主席講：「這些吸毒小將要靠你下令修理了，別手軟。」，力撐世姪嘅向太即刻喺微博話甄妮「惡毒」，隔空開火㗎。

敵人嘅敵人，咪就係朋友囉！今次向太向星爺連環開火，本來唔關事嘅甄妮，遠在台灣都無啦啦喺 fb貼文，話電影公司老闆「數落明星就有失風度了」，明眼人都知講邊個

嗱，媽咪姐特登睇番甄阿姐嘅 fb，發現佢最近鬧台灣衞生局把關不力，搞到有地溝油事件，又鬧狗仔隊影佢相。今次向太反而無再向甄妮發火，只係話唔識佢！都係嗰句，萬大事以和為貴，向太啲火睇嚟都收咗啲啦。甄阿姐你六十有一歲咯，不如慳番啖氣，養生呢。

網文起火

近日有一篇由星爺童年講到依家嘅文章《為什麼這麼多人黑周星馳》喺網上瘋傳。文中講到電影公司老闆向華強涉黑，又話星爺因為拍過佢嘅戲而「惹上黑道背景」，因為咁而移唔到民㖭。

篇文雖然無作者署名，但有晒星爺嘅童年相，好多細節都好詳細。所以向太睇完嬲爆，質疑有人放料抹黑老公向華強，即刻上雜誌鬧爆星爺，仲喺周二（ 9日）凌晨公開叫佢自己現身解釋。

向太發功

周二（ 9日）晚，向太可能見唔少國內 fans力撐星爺，又喺微博留言話佢同星爺係「私人恩怨」，叫童孩「站在中立的立場」。

中港網民唔同 point

今次呢場「星之風暴」，最特別嘅地方係中港網民反應好唔同。我哋香港人有撐有唔撐，但內地呢，就多數撐星爺喎！哎吔，咁星爺就咪鬼移民

甄妮除咗喺佢台灣嘅農莊種菜養鴨，最鍾意就係喺 fb發聲。係估唔到佢仲咁留意香港娛樂圈， post文叫電影公司老闆唔好忘記自己係靠明星起家，但又提醒人唔好對號入座。網民就叫佢做「抽水 auntie」！

真假大爆料

喺《為什麼這麼多人黑周星馳》呢篇疑似星爺小自傳入面，爆咗唔少佢嘅戀情同拍戲細節，睇嚟有真有假，信不信由你嘞！

關心羅慧娟？

喺文中提及到星爺多位女友，但講得最多嘅係羅慧娟。作者講到星爺好情深義重，「其實周星馳一直都想結婚，他和娟妹也曾經談及婚嫁，到了朱茵這段，同樣是談及婚嫁。」

仲話 99年星爺知道娟妹因潛水令聽覺受損，傳 message俾前度話：「娟妹，得悉意外，甚表關心，祝早日康復！」而娟妹回佢：「患難見情真！」但向太就話唔信星爺咁偉大，仲話佢嘅女友都係唔愉快分手。

數朱茵？

另一個講得比較多嘅星爺女友係朱茵。不過就係數佢多，主要係話朱茵要求多，又不明白星爺，仲暗示佢借星爺博出鏡。

爾冬陞勁 buy？

向太喺雜誌上話星爺想借文美化自己。喺篇網文度就講到爾冬陞套《色情男女》原本係為星爺度身訂做，只係星爺無接，所以後來男主角（張國榮飾）個名都係叫「阿星」。不過，爾冬陞就澄清話，個角色名本來叫「阿星」，仲話唔想同星爺聯絡。

勁踩文雋

文中提到星爺執導嘅《功夫》得到 16項金像獎提名，好多人攞咗獎，但星爺攞唔到最佳導演。跟住就寫嗰屆金像獎主席係文雋，再提到周星馳好耐之前講到文雋，係咁講：「大家都不是一個層次，無謂多說。」 Well，作者有乜弦外之音，大家諗吓啦。

鍾意就快D Share啦！

下一篇 》