腸癌有四期，偏偏鄺佐輝一發現就是這階段，他為此一度自責。「我做主持咁耐，訪問過唔少醫生，知道 40歲後就要定期做身體檢查，但我冇理，先搞到今日一發現就去到第四期。」
探熱針
腸癌四期擴散 鄺佐輝切肝保命
曾在無綫主持婦女節目近廿年，現年五十八歲的鄺佐輝，前年改投一直不獲發牌的港視後，轉眼又告約滿；手停口停之餘，更發現患上腸癌，並擴散至肝臟。七月至今，連捱兩刀保命的鄺佐輝坦承得圈中各好友經濟支援，還有新婚少妻不離不棄，是他拼命求存的動力。
切肝後化療半年
三個月前，鄺佐輝發現大便出血卻不以為然，直至一晚演變成大量出血，走出廳求救時更短暫昏迷；醒來時，他已由妻子及朋友送到北區醫院急症室。經過詳細檢查及事後再睇私家醫生，均證實患上第四期腸癌。
剛捱過一次維持三個半小時的切除腫瘤手術，鄺佐輝精神尚算不錯。
「醫生話個腫瘤 size好大，但我唔想知究竟有幾大。唔好彩，仲發現擴散去到肝。七月尾喺北區醫院做咗切腸道手術，下個星期會再喺另一間醫院做埋肝手術，切得幾多得幾多。」鄺佐輝說。
身患惡疾，但眼前的鄺佐輝仍然面掛笑容。
「當初從醫生口中聽到呢個消息，太太好激動，我就好冷靜。個天對我已經好好，至少仲俾時間我處理事情。個腫瘤雖然大，但好在無塞住腸道，可以做微創；之後亦唔需要開造口，算係不幸中之大幸。但嚟緊做個肝範圍就大好多，手術後仲要做六個月化療。」
唔怕切肝唔驚化療，但提到經濟問題，再樂觀的鄺佐輝也收起笑容。今年五月與合作已兩年的港視約滿，再無穩定收入，只靠偶然做司儀及唱歌騷維持。病發前為睇餸食飯，兩公婆已由市區搬到租金較平的元朗八鄉村屋。
「幾咁樂觀同積極都好，呢個（經濟）係好實際嘅問題。開始化療後，有可能成年唔可以做嘢，生活有困難，心理當然有負擔。」鄺佐輝說。
放低自尊靠接濟
貧病交加，唔想靠人的鄺佐輝唯有放下無謂的包袱，接受身邊人接濟。
「除咗 Annie（廖安麗）幫忙，以前喺亞視搵過我幫佢拍咗套微電影《微藍》嘅卓慧敏成立咗個『微藍基金』，佢知道我有病，乜都冇講就用基金名義開咗張二萬蚊支票俾我應急。」
消息傳開後，以無綫訓練班同學組成的藝進同學會，亦開始籌錢支援鄺佐輝。「名譽會長甄茂強打俾我，我好坦白，承認經濟上有困難。以前我做副會長都搞過唔少籌款幫有需要嘅人，所以今日我接受人家幫助，唔怕面皮厚！我亦好多謝曾志偉，佢都幫咗我一個大忙。總之要多謝所有幫我嘅親朋戚友，使我捱過難關。」鄺佐輝雙眼通紅說。
師奶節目台柱
78年畢業於無綫藝訓班的鄺佐輝，代表作是午間師奶節目，由《婦女新姿》橫跨到《都市閒情》，擔任主持幾近廿年外，亦偶然客串電視劇，亦大多飾演醫生法官律師等專業角色。 94年曾以自由黨名義參選油尖旺區議會詩歌舞區議員，可惜落選。前年離開服務超過三十年的無綫，轉投港視，今年五月約滿。
少妻患難見真情
朋友雪中送炭，五十八歲的鄺佐輝亦感激新婚不久的第二任妻子不離不棄。
記者上門訪問當日，應門的是個年約三十多歲、講普通話的女子。記者一到便離家避開的她，正是鄺佐輝口中所指上天派來的天使。
「舊年十月喺深圳做嘢識我太太，佢細我十九年，開始同佢一齊我已經坦白自己經濟唔係咁好，還緊債，但佢唔介意，可以講係緣分。我哋舊年十二月結婚，點知新婚半年我就病，佢廿四小時咁照顧我，幫我沖涼又一早起身煲粥俾我食，捱到心力交瘁。老實講，佢選擇走都好合理，但佢仍然留喺我身邊，所以好感激呢份愛。」鄺佐輝說。
抗癌勇士
今年發現患腸癌二期的鄧達智，曾有子宮頸癌的肥媽及數年前患乳癌剃光頭接受化療的林淑敏，均是圈中抗癌勇士，成功打低病魔。
|
鍾意就快D Share啦！
|
|
|