真人騷
燦神歸位 廖偉雄：我冇扮嘢好耐！
打電話俾燦神，是因為下月他將出書《有機人生》，又落實明年一月召回舊班底在九展開兩場舞台版《笑聲救地球》，坊間盛傳惡搞始祖、高登燦神即將全面復出娛樂圈。
結果呢，燦神一早從現時定居的廣州坐直通巴士到港，一早買定晚上六時半的回程車票，專程跑一趟來受訪，卻並不怎麼熱心宣傳他的娛樂新動向：「我唔係返嚟呀，我係出本書有個騷咋嘛！」，反倒是更熱衷已經從事了 11年的有機米種植事業：「我哋榮獲全國有機亞燦米示範基地榮譽，有無興趣移師羅定訪問？」
可惜撞正埋版，不能應邀上羅定，雖則燦神唔講，我都唔知羅定（廣東省西部）在哪兒。
於是這一天，恤衫西褲拿着公事包的燦神準時出現，抽的煙是中南海，用的是微信，說起話來三句話不離本行……是米而不是娛樂圈。
之前應港媒之邀扮過 G Dragon、擾民安，這次我也請他露出心口扮美男廚房扮 Chilam，燦哥木無表情的任我擺佈，卻直言沒聽說過 GD，沒上過高登，亦一點不享受做燦神再扮嘢：「冇睇過，上討論區有乜益？我冇扮嘢好耐喇！
我唔鍾意㗎，不過你哋想咁影，自然有你哋嘅原因，我願意配合。」
說到這，我猜想燦哥的勉強笑容背後的內心獨白實情是：「說這麼多幹嘛！」
57歲人，離開娛樂圈經商 20年，還是任你點任你舞，就係因為你班後生傻更更笑騎騎一廂情願想在他身上找到「乜太」的集體回憶，姑且滿足下大家：「這就是人生，這就是氣勢。」
談復出
我唔係復出娛樂圈呀，係出本書做個騷咋嘛，就嚟死㗎喇，趁住仲有氣有力，同啲人，包括朋友、包括觀眾見下面。
你哋叫我扮嘢，其實即係難為我，我好多年冇扮嘢，扮嘢嘅時間已經過咗，每個人唔同階段做唔同嘅嘢，不過你哋叫我咁做，梗有你哋原因。難為我都會照做。
笑聲救唔救到地球，我唔知呀，但樣樣嘢都離唔開笑，開心就會笑，笑咗世界就會好啲。成日覺得係苦，就會當人生係苦難一場。你打份工都辛苦㗎，但係你如果一直覺得辛苦，每日都係要捱住過。我哋成日同啲人講，鍾意做就去做……試過一次我問個𡃁仔，問佢想做乜？佢話唔知。問佢鍾意啲乜，佢話要搵下先……其實咪又係懶。
有一句說話應該要改，唔係因為鍾意而去做，而係既然做咗，就點都要去鍾意佢。我去種米，係因為做咗咁多年飲食，越做越覺得自己對飲食知道得太少，想知多啲，不如由源頭由食材開始。我種米，係決定咗做米就去愛上佢，當你鍾意，就會為佢付出，點都唔覺得辛苦。我能夠講到咁多有關米嘅知識你聽，全部都係為呢十年我落咗好多功夫。
我拍戲，如果唔係為鍾意，係為咗做明星，一早頂唔順佢要由朝拍到晚咁辛苦。但係你問下我拍咁多年戲咁多對手，邊個唔係返工返得好開心，大家都鍾意呢份工。
𠵱家娛樂圈，我冇留意，亦都唔識邊個，佢哋態度唔好、淨係想出名唔關我事。可能我哋呢啲已經 out咗啦，但係我始終覺得係個人問題，唔係成個娛樂圈問題。個人鍾意點就點係你選擇，但係你好食懶飛，淨係去街，我冇睇過有邊個可以咁都殺出條血路，成為一個好嘅演藝工作者。
論中港
我成日諗，點樣去改變香港，咁多人，我一路去諗，應該用乜嘢方法去改變香港人生活，我未諗通。香港人係我全世界人睇最勤力嘅一班人，但係呢……其實順應潮流一路轉變，一定有新嘅事物發生。到𠵱家我都未摸清，我摸嚟摸去都摸唔到內地點解會咁。
我都有個朋友，佢係知識份子，有日我去佢間別墅，傾傾下偈佢個孫急尿，佢就咁「的住」個孫喺地下痾。喺佢自己個別墅、自己客廳，當住啲客人嘅面，唔知點解，梗係有佢理由㗎……
咩理由呢？我諗嚟諗去諗唔通，因為我冇問到佢……呢啲亦都係文化差異，佢一定有理由，唔會冇理由，我一定會諗通。
國內人其實唔曳嘅，我上咗去咁耐，國內人唔曳嘅，佢哋對於情對於義，好注重。如果佢認同你呢個朋友，會為你做好多嘢。
但係我都俾人呃過，唔可以講話呃咗我就係壞人，呢啲人全世界都有，唔係我唔好彩遇到，而係我自己技術未夠。唔係話我可以奸過佢、掉番轉頭呃佢，係我自己認識唔夠，我知道多啲，我咪唔做囉。咩叫好咩叫壞？呢個世界其實冇好壞，你唔貪就唔會俾佢呃啦。如果每個人認知夠，呢個世界會少好多事。你覺得佢唔好，握個手咪行囉，你既然選擇同佢，點解要話佢壞？
教種米
我寫本書出嚟，係因為做咗十年米，係有經驗同大家分享咋嘛。如果大學嚟講，係一篇論文嚟。不過呢個論文唔係交俾大學，係俾大家。
你種植睇到好多樣嘢。大自然可以睇到好多人生，人生同種米都係一樣。
好簡單，好似啲人生仔咁，要揀日子。我個女生仔，我都叫佢唔好搞呢啲。叫佢如果自己係得，唔好開刀。你要有呢個感受，先至知道母愛嘅偉大。
揀日子，好似種米一樣，收成，一定要喺全個田有八成熟先可以收，收遲啲又唔得，收早啲又唔得。同樣原理，點解人唔可以早收遲收？大自然俾你嘅嘢，自然有佢理由。
你種嘢見到蟲，一諗就係要殺晒佢。其實你種嗰樣嘢，就自然會生嗰樣蟲。你嘅作物健康成長，個纖維夠厚，個蟲就難食入去，搵食個個都貪易，蟲都係一樣，難食就唔嚟食㗎啦。
人會痛風，水稻都會痛風，人會感冒，水稻都會感冒。你食嚿豬肉食塊鮑魚，唔係即刻吸收到能量，都有身體微生物幫你轉化成能量。轉化唔到就排泄咗佢，排泄唔到就積聚成痛風。水稻都係一樣，太多養份會過盛，曬曬下太陽淋雨會作病。
大自然嘅嘢，冇錯可以用科學改變，人病都會食抗生素。但係你記住抗生素無眼㗎，好菌壞菌都殺埋，身子咪弱囉。
人最可愛係有生死，冇生冇死個世界唔會變，乜都俾你霸晒。錢搵得幾多？搵得晒咩？你有錢得過秦始皇？你有錢得過漢武帝？今時今日故宮攞嚟做咩？俾人參觀咋嘛，啲人去到故宮，唔會多謝係話慈禧，係話佢抵死啫。
講道理
我冇上香港啲討論區，唔知咩係高登，睇呢啲嘢有益咩？我唔係鍾意講道理，係提出問題，係分享我咁多年嘅經驗。
唔係我鍾意講道理，係呢個世界所有道理本來就存在，個問題係你知定唔知啫，我知所以我講，做唔做係你嘅事。
我哋嘅米，頭兩年擺晒喺度賣唔出。呢啲嘢唔急得，我哋知我哋嘅優勢，攞去香港化驗，我哋嘅米低糖，即係有糖尿病嘅人都食得。第一年賣唔去，就請人食飯，一個傳一個，足足用咗四年𠵱家一收成，全國啲車手排晒隊嚟攞。如果我哋無第一啖氣，幾百斤嘅米擺晒喺個倉，你唔驚呀？你唔死呀？
有啲嘢唔急得，香港人就係太心急，成日想一步登天。冇得急，一步一腳印，係走唔甩㗎。
我本書如果賺到錢，會成立一個基金。嗰個基金會賣我老婆啲燕窩，然後賺到錢就可以維持到個葵花基金，有問題嘅細路仔或者有問題嘅人，嚟到我嘅基地，希望啟發佢哋領悟到唔同人生。
悟到嘅話，你做咩都可以成功，掃地都可以成功。
我老婆外公親口同我講，佢以前得部好細嘅機仔喺街頭擺檔接生意幫人印嘢。有一日，有個日本仔嚟搵某某印刷廠，如果係第二個，搵我競爭對手，我睬你都傻。佢唔係喎，教人轉邊行邊度，點樣搵。轉個頭，個日本仔又返轉頭，話搵唔到，佢索性帶人去搵。個日本仔過咗兩年返嚟：你個仔要出去讀書呀？過嚟我度啦，嚟日本留學，我教你哋。結果佢屋企六個兄弟有三個去咗日本留學，返到馬拉開咗間大印刷廠，接咗政府馬票嚟印。
呢個就係做人，呢個係人生，如果你係一個好勢利嘅人，你唔會遇到呢啲嘢，如果你係一個斤斤計較嘅人，啲運唔會亂咁嚟，個運係睇你點做嘢，點對人，你唔好計較有咩回報，但係一定會有回報俾你。呢個就係《有機人生》。
紅得有道理
和燦神對話兩小時，省略了幾千字的佛偈、和農業知識，我總算明白，為甚麼離開娛樂圈經商二十年，廖偉雄會變咗燦神再成經典。為甚麼 07年套《向世界出發》那麼多嘉賓，人人口若懸河，卻唯獨廖偉雄會字字成金，貴為燦神。
話說燦哥邊種米邊寫書，一口氣寫下六萬字寫成《有機人生》，想聽燦哥說道理、是燦神信眾的，今次有福了。
|
鍾意就快D Share啦！
|
|
|