被撩一夜情 入錯鴨店？
【結婚打齋】唔識蒼井空
子華指愛情跟股票一樣，他說：「你未入嗰時就不停升，你知啦，你一擁有，有冇咁準呀！」全場即歡呼拍掌。香港離婚率達三成，他建議以後可三揀二去飲，內地於2009年離婚人數是結婚人數一倍，子華笑指將來婚禮可加插打齋環節，新人接吻時旁邊有人揮桃木劍辟邪。
他又舉例男人指「保衞釣魚台 生擒蒼井空」時，自爆不知誰是蒼井空，即惹來噓聲，他說：「台下啲男士，我同你哋唔同，我唔需要自己去搵㗎。」而今年終於知一位四百歲的都敏俊Xi才有資格跟女性相處，全因他不能接觸人類體液，即代表他不能做，他說：「一日唔做，一日都一百分。」子華結論是「幾荒謬，一個諗住粒星星，一個諗住釣魚台，一個點到即止，一個生擒活捉。」之後他自爆去年在酒吧飲酒減壓時，被人撩一夜情，他還以為自己入錯鴨店。
【中港矛盾】買嘢唔使睇
自由行引發不少中港矛盾，子華直指中國人識嘆，去年便有八千萬中國人出埠旅行：「點解成日去到飛機場見到中國人喺飛機打交，因為我啱啱去完旅行又要去旅行呀，好忙呀，好躁呀。連想買啲紀念品都冇，你買咗好多呀！嗰啲邊係紀念品啫，紀念品係你哋買唔起，我又唔使睇價錢嘅物品！」
子華又提到現今印度非常有錢，當地人最鍾意法拉利，及死後燒成骨灰撒落恒河：「若果印度似中國富起來，恒河要改名叫有法拉利河，每個有錢印度人臨死前，揸住法拉利到恒河邊，淋油，連人帶車淋油燒。」
【唔夠環保】紙巾扮富貴
環保是全球關注問題，但子華認為香港做得不夠好：「香港係唔夠環保，明知唔夠環保都係做唔到，好難，點解？以前香港好多人好興吐痰，𠵱家好少，點解呢？因為當年你行入任何一間食肆就會見到四句詩，『隨地吐痰乞人憎，罰款二千有可能，傳播肺癆由此起，衞生法例要遵行。』當年吐一篤痰罰二千蚊，二千蚊調整今日通脹等於今日十萬蚊，你諗吓吐篤痰十萬蚊仲有冇人吐？」
他更以打油詩來呼籲大家注重環保：「用親膠袋正契弟，成叠紙巾扮富貴，水浸眼眉等住做，你大熱天時流鼻涕。」並笑謂：「唔環保正契弟。」
【平板年代】踎廁要闖關
21世紀世界為平板電腦年代，子華解釋這部萬能電腦令唯一可以靜下來的空間也填滿，原因是平板電腦令大家踎廁時方便睇，他說：「𠵱家啲人入廁所好似入少林寺咁，我唔過關我唔會出番嚟，阿強唔過關都唔會出番嚟，冇電呀，所以阿強好醒目，喺個馬桶邊整個插蘇掣，年三十晚入去，人日都未出番嚟。」
完騷前子華自揭研發了一個新智能電話叫「我式」，全因大家經常遇到選擇困難症，他的設計是助大家遇困難時就可以問一問部電話幫你作出決定。
|
鍾意就快D Share啦！
|
|
|