熱爆娛樂: [FACE 385] 巨星拒唱撐傘歌　何韻詩：有班人跟住佢哋搵食何韻詩,MF,

2014年10月9日星期四

[FACE 385] 巨星拒唱撐傘歌　何韻詩：有班人跟住佢哋搵食何韻詩,MF,

連日來出力又出聲，上周六（ 4日）晚的反暴力集會，何韻詩和明哥亦到場演唱新歌〈撐起雨傘〉為學生打打氣。《蘋果日報》圖片

封面

巨星拒唱撐傘歌　何韻詩：有班人跟住佢哋搵食

從 9.28凌晨戴耀廷宣布佔中啟動，始於學界感染全港的「和平佔中」行動踏進第十天。

不過，十天以來並不「和平」，嚐過胡椒噴霧、吸過催淚氣體、被黑社會兇過、被臨記擾亂過，雖然大家頂得住，但亦無可否認疲倦了，是時候打打氣。於是，由何韻詩、謝安琪、葉德嫻、黃耀明等二十位歌手合唱的〈撐起雨傘〉出現了。

一個「撐」字，咪以為講咁易！

據悉發起人何韻詩、 Sammi經理人郭啟華親力親為號召歌手藝人「出聲」，亦有碰釘被拒。

講到尾，有勇氣、有膽識的藝人屈指可數!

其他影片：>>佔中熱血仔女真心話

〈撐起雨傘〉推出僅僅兩日已經累積過 20萬點擊，活動當晚集會人士亦輕聲和唱，成為全晚高潮。《蘋果日報》圖片

用一把黃色雨傘，不僅擋掉胡椒噴霧和催淚彈，亦顯示一顆抵抗暴政爭取普選的決心，始於香港的雨傘革命十日來在全港遍地開花，可惜並不是每個香港人都引以為傲參與其中，尤其在娛樂圈中，連日來站在最前線的總是幾個最熟悉的名字，一線巨星在哪裏？

《蘋果日報》圖片

負責作詞的林夕現身發表創作感想，話「一路驚一路寫」。

「寫支持佔中的歌當然會驚慌，但在這關頭恐懼，將來會受更大恐懼，無人有條件害怕，喊得理直氣壯，好過笑得鬼鬼祟祟、問心有愧。」

葉德嫻冰島回港撐

上周六（ 3日）晚上八時，金鐘政府總部外佔中據點超過十萬港人到場參與「全民反暴、和平抗爭」集會。活動高潮是歌手何韻詩、黃耀明上台演唱最新創作歌曲〈撐起雨傘〉為港人打氣。

整首作品由何韻詩收到作曲人 Pan作品計起，短短 48小時內已經錄製完成。為讓更多歌手參與，增加號召力，發起人親力親為致電同行，當中最具勇氣和最有誠意的莫過於謝安琪和葉德嫺。身在北美登台的 Kay越洋找錄音室灌錄、盧凱彤身在上海亦坐言起行，人在冰島旅行渡假的葉德嫻收到何韻詩邀請後即時回港，成為當中輩份最高份量最重的一把聲音。

48小時之內完成製作〈撐起雨傘〉，不過唔多一線歌手參與，但無損錄音室內的歌手合唱決心。網上圖片

有份錄音、越洋發聲的歌手，除了身在北美的謝安琪和身在上海的盧凱彤，還有從冰島趕回港錄音的殿堂級歌后葉德嫻。網上圖片

本刊致電發起人之一郭啟華，問到獲邀歌手名單，他說︰「有啲歌手要同唱片公司商量。」

阿詩到巴黎出席時裝活動，留咗一日趕返香港錄打氣歌，人在巴黎亦不忘參與當地港人雨傘革命，更在巴黎鐵塔前高舉黃絲帶。網上圖片

星星去哪兒？

陳慧琳閃離港

婚後忙湊仔減少幕前活動， Kelly「佔中」以來都保持沉默，上周三（ 1日）則在機場離境大堂快閃，只答記者要離港工作。

陳奕迅篤魚蛋

Eason近月忙於為《 LIFE巡迴演唱會》穿梭內地各省市，不過佔中期間就未有演唱安排，只於上月 29日同郭偉亮在灣仔露面篤魚蛋打羽毛球。

大台陰招

大台霸道作風，相信大家都見怪不怪，同時又兼顧「維穩」工作。上周六（ 4日）嘅活動上，公然叫杜汶澤除下黃絲帶受訪，搞到阿澤嬲到面都燶埋，現場仲講咗一句：「痴 X線！」。最後主播話唔使除黃絲帶阿澤先肯接受訪問，不過訪問期間又全程 close up阿澤大頭，黃絲帶最終「被消失」，難怪阿澤做完訪問就急急腳走人！

阿澤一做完大台訪問就急急腳轉身走人，明眼人都睇到阿澤當時有幾咁嬲！

經過大台主播出口調停，表示唔使除下黃絲帶，阿澤再次接受訪問前，點知又係用陰招。

雖然幕後人員（右圖）事後係 facebook澄清叫阿澤除黃絲帶乃係自己意思，完全唔關公司事，不過大台「維穩」功夫都唔係第一次見，今次又嚟又有幾咁出奇？

最壞打算　得明哥合唱

現時發布於網上，點擊過 20萬的歌手合唱版，除了以上歌手，還有周國賢、方皓文、黃韾、樂隊 Yellow等近 20個歌手及樂隊，事實上發起人聯絡過的，亦不止這個數目。

本周一，阿詩接受本刊電話訪問，細說製造這首歌曲的目的和困難，她最感激是葉德嫻的幫忙，阿詩說︰「我喺巴黎機場返香港時決定搞呢首歌，前後都唔夠 24小時，初時都好擔心，打算不如我同明哥自己錄啦，點知好多歌手都肯錄，最開心係葉德嫻，佢就好似小朋友對住一個大人咁，有安撫嘅作用。」

「唔好以為睇 TVB就睇咗成個世界」

問到歌手名單是否經過商議，阿詩說體諒歌手們背後的狀況，她說︰「肯參與係無任歡迎，其實我都明白，每個人都有自己立場，有啲人睇法唔一樣，可能又要面對唱片公司。有啲更紅、更有地位，但佢身後有一班人跟住搵食，唔同一般市民東家唔打打西家嘅心態，我可以理解嘅。」

講到仍在「佔中」的學生，阿詩說自己只是盡一點綿力，「𠵱家已經唔係『佔中』唔『佔中』，如果有親身落過去，班學生真係好乖，抗爭就係要犧牲爭取番嚟，佢哋好勇敢。」阿詩又呼籲反對的市民要睜開雙眼，要懂得分析報導，「唔好以為睇 TVB就睇咗成個世界，有啲報導係經過過濾嘅，有啲人隔岸觀火就話啲學生無知，佢哋又冇落去現場，其實呢啲人仲無知，我好嬲㗎！」阿詩仲話有留意最近網上嘅音樂創作，最欣賞是李偲嫣主理「撐警大聯盟」首歌（〈香港生命〉），「我有喺 facebook share㗎！最好可以喺現場播，可能警察都會跟住唱。」呢個時候，仲識得幽默，好緊要㗎！

金鐘直擊　葉蘊儀喬裝撐學生

繼何韻詩、黃耀明、謝安琪勇敢企出來唱〈撐起雨傘〉外，連肥菜葉蘊儀連日來都默默為學生出一分力。上周六（ 4日），本刊就撞見葉蘊儀素顏加黑衫打扮，配埋頂黑色帽，喬裝打扮下，孖住幾位朋友低調去到金鐘為學生打氣。低調現身，當本刊上前要求葉蘊儀幫手寫幾句祝福香港人嘅說話，佢反而當場被嚇一跳，仲話：「好驚，以為你哋係警察！」唔想張揚嘅佢，初時都婉拒《 FACE》嘅邀請，經過連番解釋後，肥菜先肯寫句「加油」為香港人打氣，她說︰「八點幾到，嚟咗幾日喇，你哋去做其他嘢啦。」之後就同朋友轉去另一地方靜坐。