真人騷
44歲回流再起步 唐文龍：呢行就係鬥長命！
約好兩點的訪問，唐文龍兩點半才出現，一到場，不停道歉，原來是睇醫生誤陷佔中車陣。
說起佔中，他其實有不少獨特見解，不過只限私下討論，說不想在這種特殊時期用這種方法吸引目光。
就像個多月前因為冰桶挑戰騷出一身靚肌，傳媒趁機邀他脫衣賣弄，他也說要用這種方法上報，寧願不上。
直到電影版《十月初五的月光》下月開鏡，他才因為總算有工作落實才願意做訪問。
這就是唐文龍，明明眼前放着各種方法自我宣傳，硬是為骨氣耍手擰頭把機會推開，難怪，他從內地回流香港接近一年，竟然冇乜人知冇乜工開；也難怪，空有男神級外型和人人讚好的人品教養，一直一線尾二線頭唔上唔落。
不小心說漏嘴，我第一次從唐文龍口中聽他說自己入行 20年被人要求潛規則好幾次，有男有女有明示有暗示，再霉再窮亦緊守底線，說起來容易做起來其實很難。
「我唔介意我條路總係多石頭，我唔介意行得比人慢，因為黐住大地一步一步行係我嘅選擇，預咗唔會一飛衝天。我以前唔知遊戲規則，𠵱家知，就係食得鹹魚抵得渴，就係鬥長命！」手段不如人高、人脈不如人廣、臉皮不如人厚，鬥長命亦未嘗不是一種生存方式，所以 44歲的唐文龍把身型保持得十年如一日，堅守陣地一等 20年，這就是男藝人口中的「鬥長命」。
窮起上嚟，一碗麥皮捱一日
不說很多人不知道，唐文龍其實是唱新秀、做歌手出身，年資甚至還比 Eason千嬅早一屆（ 94年）。不過遇着華星大地震，一早簽華星，卻遲 Eason、千嬅兩年才錄音出碟；唱歌不成拍電影，拍電影遇着翻版潮又再轉投電視圈，若果僅守住一線尾二線頭到今天，說不定就遇上大台小生逃亡潮能上位，他偏偏早在八年前就離開大台獨個北上。
最低潮是甚麼時期？
好幾個……電影業唔得，完全無工開，最窮得 300蚊喺銀行，真係冇辦法生存。然後入無綫，頭一年月薪四千，打後爆騷都係得個個月六、七千，我屋企住旺角，凌晨兩點收工，為咗慳錢等班旺角廠巴一等就等到五點，仲要好衰唔衰成日飛站。
爆騷都係得六、七千？
係，我唔怪人，份約係我心甘情願簽。無綫可貴在有個平台俾到我，冇無綫就無今日嘅唐文龍，我就冇辦法喺內地站得住陣腳。不過一開頭上去，一樣唔容易。
爆騷都係得六、七千？
係，我唔怪人，份約係我心甘情願簽。無綫可貴在有個平台俾到我，冇無綫就無今日嘅唐文龍，我就冇辦法喺內地站得住陣腳。不過一開頭上去，一樣唔容易。
八年前點解要放棄無綫北上發展？
我唔識交際應酬，唔識鋪排拉攏，行每一步都係我自己決定，走，當然係因為覺得自己發展不如意。初頭上京，要就近呢個圈嘅人搬近市區捱貴租，有時冇錢食飯，一個麵包一碗麥皮就係一餐，仲要全日只得嗰一餐。識我嘅人都知，我從來唔鍾意飲酒，一上到北京，個個傾嘢都要飲，惟有逼自己飲。唔識飲夾硬嚟飲到嘔，再嘔到嘔唔出……
你話由初入行到身在內地都被人要求過潛規則？
有男有女，多數都唔係名碼實價，報酬係一個機會……
明明霉到飯都冇得開，有冇動搖過？
冇動搖過，但係辛苦係真嘅。有時飲到太 high，返屋企瞓唔着覺，因為太靜，會聽到四面牆嘅「依依聲」，嗰種係孤寂，不斷問自己，到底做緊咩？可以做啲咩？願意做啲咩？又唔願意做啲咩……呢啲關口，我諗我唔係娛樂圈唯一一個。做呢行就係咁，今日係海鮮，聽日變咗鹹魚……最難就係堅持，真正嘅遊戲規則，就係要同人鬥長命。
24歲，已經月薪二萬八
事實上，歌手亦不是唐文龍第一份工作。唐家三代都做衫，爺爺是寧波裁縫，爸爸在大酒店開高級洋服店，奇勒基寶、 Michael Jackson都上門幫襯過，輪到唐文龍在美國讀時裝設計，成績拔尖一回港就是大公司搶手貨， 32歲入無綫時月薪四千，實情他 24歲入職不久已經月入二萬八。
有冇諗過，當年如果沒轉行……？
我諗過一萬次，結咗婚、有咗細路，應該喺紐約定居，相對嚟講，一定比𠵱家成功、𠵱家有錢。識我嘅人都知我份人謙，但係讀時裝設計時我真係巴閉，畢業全校頭三名、教授會俾錢買我啲功課，離開學校嘅推薦信基本上可以幫我入任何一間大公司，我返香港第三份工已經由萬二跳到人工二萬八，嗰陣時，我行 JOYCE㗎。
會唔會怪自己經常做錯決定？
就好似我父母當年移民美國，一開始都唔係風光、都唔係一落地就攞綠咭。我哋一家喺香港本來叫中產，生活無憂，我讀喇沙㗎……去到嗰邊，我睇住爸爸媽媽用錢疏通，為錢嗌交，捱到生晒白頭髮，食嘅用嘅都係剪 coupon買減價貨。冇人一生都活得冇悔，人生總有好多遺憾好多後悔，我只能夠講，做每個決定都有後果，我盡力承擔同反思，盡力行出更好將來。
成日聽人講唐文龍條件好，無理由唔紅，聽得多係唔係好刺耳？
再刺耳我都聽過，最多人攞我同千嬅同 Eason比，係呀，佢係遲過我參加新秀，但係人哋𠵱家係巨星，點能夠攞我同佢比？
你覺得自己爭咗啲咩？
唔可以賴晒不景氣，性格、際遇每樣都有影響，我無奈嘅，但係又真心覺得自己比上不足比下有餘。呢個世界邊個唔係比上不足比下有餘？發哥都係一樣，分別在於喺你之下有幾多人啫？
點解呢個時候要返香港？
我唔係放棄內地市場，托賴，喺內地有一定根基，我開始掛住香港。父母年紀大，我唔想佢哋次次返香港都見唔到我，我亦掛住香港啲朋友同香港電影。我知香港電影多我一個唐文龍唔多、少我一個唐文龍唔少，但係我嘅演藝事業由呢度開始，亦想再次參與其中。
單身多少年？
已經四年，我嘅生活太簡單，就係打詠春、打洪拳，最近學埋泰拳，或者睇下書，就係咁填滿自己時間。我唔 social又唔蒲，同我玩開嗰班朋友，（洪）天明、曹永廉、林文龍都有家室都冇得蒲囉，唔通我自己一個落蘭桂坊咩？
上一個女朋友拍拖幾多年？
七、八年。
人生半世，唯一對不起是她
羅嘉良、吳啟華、陳浩民，港產小生北漂十個有九個漂到內地嫩老婆，唐文龍北漂八年，傳過結婚生子、傳過搭上陳靜師妹羅子喬，這一天一次過澄清，從未娶妻、從未生子。
點解分開？
因為嗰個時期我啱啱北上發展，正處於事業低潮，生活經濟都處於嚴重困境，而佢亦都一樣，年紀唔細，工作亦唔順利，我睇唔到自己喺短期內會有轉機，所以做咗個好狠嘅決定，就係分開……
仲有冇聯絡？
有，佢未結婚、未生仔，但係已經唔到我去介懷。我唐文龍一生冇欠任何人，淨係對唔住呢個 ex girlfriend。我唔知有冇下一世，如果有，我希望下一世還俾佢。
難道唔想似班朋友一樣成家立室？
呢個問題你半年前問我，我會話想，我真係諗過，想有一個人，每日放工返屋企攬下我，每日瞓醒可以第一眼見到佢，唔化妝錫一啖……好似好簡單嘅事，其實要遇到好唔容易，我揀人時人揀我，不如老老土土講句，順其自然。
隱形男神
八年沒有進過將軍澳工業邨、幾乎沒有和香港傳媒來往，唐文龍一進蘋果大樓，就說要謝謝本集團待他不薄：「算係咁喇，我失蹤咁耐，之前見到貴集團旗下雜誌仲選我做男神，擺埋我同郭富城、安志杰一齊上榜。」
說真的，風流同名車唐文龍可能拍馬都難追得上城城，不過外型、論口碑，肯定有得比。話說身邊的中女們，提起唐文龍，十個有十個都話正。
中女 A：「金勝《十月初五的月光》呀！見到佢就暈晒大浪！」
中女 B：「當年佢成日嚟我公司健身，又靚仔又 nice又大隻囉！」
行家 C：「十年前同佢做訪問，有家教英文又好，唔明點解佢唔紅。」
點解唔紅？點解係都爭少少？
|
鍾意就快D Share啦！
|
|
|