連詩雅與男友一齊外出食飯，獨留連媽媽在新屋執拾打掃。
滾熱辣
5萬月租九龍塘 連詩雅冧掂過億新歡
15歲出道的連詩雅（ Shiga），曾流出與前男友曲赤的舌戰慾照，又被揭 08年起四年間連𠝹19條仔，包括關楚耀、王浩信和永安太子爺郭永淳等等，戰績彪炳。最近連詩雅終於碼實有米新歡 Anthony Shek（石恆聰），對方樣子不俗外，家底亦非常雄厚，其家族坐擁九龍塘森麻實道一號市值五億的地皮。
泊到個好碼頭，連詩雅隨即帶挈母親，由灣仔劏房樓升呢搬到筆架山道月租五萬的豪宅。富二代的 Anthony為取悅連詩雅，不惜充當外賣仔、派不同的保母車管接送，又送上兩萬蚊的名牌袋。就連連詩雅上月搬新屋當日，他都親自監督，搬屋後二人更到公園談心。搵啱筍盤，連詩雅隨時上岸。
連詩雅是圈中出名的蒲精，視陳冠希為偶像的她， 08年已經開始在夜場獵食和集郵，曾在短短四年間連𠝹19仔。今年 26歲的她，早前鎖定 Anthony為對象後，連形象都突然變回乖乖女。知情者透露：「 Shiga同 Anthony喺夜場都識咗一段時間啦，初初佢唔知人哋有家底，當佢知道 Anthony係有錢仔，態度更加進取。有次成班人出去食飯，大家都飲咗酒，臨走嗰陣 Shiga黐住 Anthony，又暗示叫對方送佢返屋企，我諗應該就係嗰次撻着。早前佢仲同公司（華納）講，以後唔接啲大膽性感戲，想轉型喎！」
細屋搬大屋
今年 6月 28日，連詩雅被影到與 Anthony到中環 dragon-i夜蒲，之後更坐的士返回男友位於碧瑤灣的豪宅過夜，但當時傳媒仍未揭發男方家底。連詩雅男友名叫石恆聰，與母親及三位兄弟姊妹共同持有位於九龍塘森麻實道一號市值達五億的地皮，現居於碧瑤灣碧荔臺，出入均有司機接送。
據知 Anthony與連詩雅拍拖後，立即泵水讓女友極速升呢。上月 8日，連詩雅出席完活動後，即與母親搬離居住多年的灣仔劏房樓，搬到九龍塘筆架山道龍景樓一個近 900呎單位，男友 Anthony當日亦有到場幫手。待搬運工人搬好傢俬後，或許嫌新屋一片混亂， Anthony陪連詩雅到附近公園談心，順道帶女友熟習一下附近環境。
本刊記者發現，連詩雅近日外出，都由 Anthony家族登記的保母車接送。上周六（ 1日），他更充當外賣仔，送了幾袋食物上連詩雅家後才離開。
搣唔甩平民生活
其實連詩雅本來都是富二代，自小住九龍塘豪宅，讀國際學校，但父親生意失敗破產後拋妻棄女。多年來，母女二人租住灣仔劏房樓其中一個單位。連詩雅 15歲已輟學做 model，一直死慳死抵的她對突然脫貧升呢，似乎還未適應。上周四（ 10月 30日），她乘男友的保母車去銅鑼灣，在世貿中心門口會合 Anthony，其時男友把一個約值 2萬元的巴黎世家手袋送給她，之後二人上了一幢唐樓。半小時後，連詩雅獨自離開，竟先後光顧無牌車仔檔，買了個 10元的電話套和價值 6元的絲襪，消費模式仍然非常草根。
連：冇過問人哋有冇錢
周二晚（ 4日），連詩雅出席電台訪問時，被本刊記者問到是否蜜運中，她不停詐傻扮懵，逃避問題。
記：記者 連：連詩雅
記：聽講你拍緊拖？
連：吓？幾時啊？我唔知你講緊咩喎！
記：係咪同一個叫石恆聰（ Anthony）嘅男仔一齊？
連：哦……我哋係朋友。
記：但係我哋見到 Anthony同你一齊搬屋。
連：其實我搬屋分開咗幾次搬，幾次都有唔同朋友幫手嘅。
記：依家搬去豪宅，係咪脫貧？
連：我未聽過人統稱呢啲叫豪宅。
記：九龍塘筆架山道喎，仲唔係豪宅區？
連：九龍塘區啫。
記：咁係咪男朋友幫你俾錢租屋？
連：咁我媽咪都有做嘢嘅，我未叻到養我媽咪，仲係媽咪養緊我。
記： Anthony屋企好有錢？
連：我唔知啊，我冇過問人哋屋企。
記：咁佢同你出街食飯會唔會俾晒錢？
連：咁有時一班人食飯，都會自動自覺各自俾錢嘅。
之後連詩雅以趕時間為由終止訪問。其實 Anthony有家底又有 heart，但連詩雅只肯認對方是普遍朋友，小心蘇州過後冇艇搭呀！
豪放作風名震網絡
26歲的連詩雅 2010年出道做歌手時，被踢爆早於 15歲入行做𡃁模，拍過三點式泳衣寫真。翌年拍攝電影《喜愛夜蒲》成名，當中的情慾戲更為矚目。前年她又被踢爆與前男朋友饒舌歌手曲赤濕吻、咬耳仔、脷疊脷等情慾自拍照。其後連詩雅開記招交代事件，聲淚俱下話自己年少時做傻事，被網民封為「慾女連詩雅」，其外號反映她的豪放個性。
|
鍾意就快D Share啦！
|
|
|