網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2014年11月19日 星期三

[FACE - 391 - 專訪] 當娘娘的日子 杜小喬:我賣點就係普普通通! 杜小喬,MF,




真人騷

當娘娘的日子 杜小喬:我賣點就係普普通通!

從前,有兩個世界:一個叫現實,一個叫網絡,共存平行於同一個空間。

我的受訪者一般來自前者,大多數人不斷捱、不斷等,等一個角色、等一個出頭天,一個唔覺意就十幾廿年,我們之間的對話,常常糾結於:點解紅唔起嘅呢?

這一期的訪問對象杜小喬,是 YouTube界的當家花旦和 CM女皇、討論區的萬人娘娘、在女神排名榜與陳法拉和謝安琪齊名,看看眼前的她:沒有長腿也沒有巨乳,臉蛋和笑容雖然可愛,但是一咧嘴笑又會露出下排亂生的牙齒……照計現實世界審美標準,應該第一時間被唱片公司執去大整然後才可能達到最後一輪「餅碎」甄選資格,這一天我要搞清楚的是:點解會紅得不明不白呢?

年頭張智霖的〈你是如此難以忘記〉首次把她帶進主流娛樂媒體,暑假後正式畢業簽約經理人公司,我問杜小喬,從網路走到現實,作為一個全職藝人她的賣點是甚麼?

24歲的她一點沒有猶疑:「我冇標青嘅身材、冇 model嘅高度、冇林志玲嘅樣貌,我咪就係我囉!普普通通就係我嘅特色。棚牙生得亂咪好囉,我成日話有日死咗,唔認得個人都認得棚牙呀嘛!」

說罷,騎騎一笑,兩眼彎成月牙,棚亂牙再次無所遁形……不過真心 cute真心 true,讓人生添好感、也終於明明,為甚麼娘娘如此多兵。

我不知道來到現實世界的杜小喬將會捱得幾耐、爬得幾高,不過老老實實,下下古天樂配高圓圓,娛樂圈比互聯網更虛擬更奄悶,現實本來就不是完美,不需要完美。

fb專頁:杜小喬

( 187,319 like)

ig: tosiukiu

( 146,518 followers)

新浪微博: 1,633粉絲(未衝出香港喎)

娘娘係角色,我係小喬。

簽咗經理人公司,你覺得作為藝人你嘅賣點係咩呢?

啱啱我都真係唔係好知……一開始會覺得,呢個角色( YouTube短片《男人有話兒》之娘娘)都幾撩交打㗎喎,我係真心驚,但係應承咗人又冇得唔做……

點解熊仔頭熊會搵你拍?我有理由相信佢暗地留意你好耐,恨做你兵好耐。

未拍片之前喺隔離班,唔係好熟,讀緊大專大家已經唔同學校,有日我溫緊書,佢又會吼緊我溫書時打嚟講佢嘅故仔……我溫緊書,都唔知佢講緊咩,咩都答「哦,好呀,好呀!」。心不在焉咁就應承咗佢。

在此之前,你有冇睇過佢啲片?

完全冇睇過,喺幫佢拍片前,我好少睇 YouTube,完全唔識上高登,高登用語唔係好識……係之後,先至開始睇 YouTube多過睇電視。我都有問佢點解要搵我,因為我喺學校(聖士提反女子中學)時好靜,你問十個十個都會話:吓?乜佢喺度嘅咩?吓?乜佢識講嘢嘅咩?

通常每一班都有一個幽靈一樣嘅同學,難道你就係嗰啲幽靈?

係呀,真係試過到放學先至有同學留意到我:杜小喬,乜你今日有返學嘅咩?我問鬆馳熊(原來小喬唔係叫佢熊仔頭!),點解要搵我,佢話佢都唔知點解。

我諗佢留意咗你好耐,鍾意你夠 cute!

我唔會話自己 cute,我只稱得上寂靜。𠵱家開心咗好多。

你拍片之前係個唔開心嘅人咩?

我以前都開心,但係係匿埋笑嗰啲人。

你班同學做緊咩?你算唔算早佢哋一步踏出社會?

我中學讀聖士提反女子中學,中六中七係樂善堂,大部份同學都讀翻譯、會計同 Econ,可以咁講,我比佢哋早咗走出社會。

中學時代你算唔算校花?

我梗係唔算啦,我學校超多靚女,靚到、有氣質到,行過啲空氣都唔同㗎,長頭髮似女神、短頭髮嗰啲十足漫畫入面美男子,我算得係咩?識我嘅人都覺得好驚訝,點解我咁靜會走去做幕前。

人怕出名,乜我值呢個價咩?

唔夠人靚無所謂,重點係你紅得快過人。幾時發覺自己紅咗?

拍完《男人有話兒》都未有乜嘢,係拍完《我在香港當兵的日子》,我出街,第一次俾人嗌「娘娘」。我嘅第一反應係:「咩事!咩事?」嗰次係我唯一一次人哋搵我合照我冇影到,真心淆底。𠵱家有少少慣咗,啲人再嗌「娘娘呀!」我會話:「哈哈哈,唔係呀!我係小喬!」

啲男仔/兵見到你係一副咩嘴臉?

好得意㗎!就好似我係一個卡通人物走咗出嚟現實世界一樣。佢一啲都唔毒,睇落好正常,有一個自己畫咗副畫俾我、又有一個知道我鍾意皮,親手整個銀包俾我,我儲到𠵱家。係有時有啲人一直等到我做完嘢,我會唔知點……真係何德何能呢,唔知自己可以俾到啲咩佢哋,覺得浪費緊佢哋時間。

這就是成名,你明唔明?

因為幫鬆馳熊拍片,多咗好多嘢做,呢樣嘢我真係冇諗過,我會接觸到舞台劇、唱歌、廣告,又會去唔同地方關島、日本、意大利拍嘢,真係完全冇諗過……

大學讀傳意科,做翻譯係唔係就係你小時候理想?

我冇諗過大個要做啲乜嘢,我淨係知道自己嘅強項係語言,揀咗一科我認為比較適合自己嘅科目。呢樣嘢真係要多謝鬆馳熊,我細個鍾意表演,因為我好怕表達自己、表現自己,但係我完全唔敢做。細個特登走去參加 drama club,入咗去都係抦埋一邊嗰啲人。係鬆馳熊俾個機會我,原來當演出角色時、知道呢個係演人哋唔係演自己,我就會變得合理好多,放膽好多。

呢啲叫咗有色心冇色膽!

可以咁講,多得無心插柳應承咗鬆馳熊,我唔再理啲人鍾唔鍾意睇、會唔會覺得好假,起碼我做嘅時候好開心、好 enjoy。以前拍我好驚,𠵱家都都驚,但驚得嚟我 enjoy!

簽經理人呢個舉動,代表你𠵱家唔只有色心仲有色膽,想喺呢行有發圍?

應該咁講,開始有工作打俾我時,我完全唔知發生咩事,好多尷尬位,好多時我都係喺度:「我我我……我……」,尤其係傾價錢,唔知自己值幾多、唔知自己憑乜嘢,有多個價又多得滯……

多得滯唔好咩?

原來唔係囉……當人哋開咗咁嘅價俾我時,我根本就唔知俾得啲咩

人……

咁你𠵱家真正入咗呢行,你覺得可以俾到啲咩人?

我自己睇,用第三者身份睇杜小喬,真係點都唔似一個拍戲嘅人,完全無嗰啲舞台光芒……就係無囉!所以杜小喬好似我囉!

可是,我已經有喜歡的對象了。

娘娘你好!娘娘現實中多唔多兵?

少少啦……好多 followers,但係嗰啲 inbox話好鍾意我都唔係真係鍾意。

有冇拍緊拖呀𠵱家?

冇呀,但係我有好鍾意嘅人。我好想有俾人照顧嘅感覺,但係我又唔係好識照顧人喎,點算呢?

佢知唔知道你鍾意佢?

嗯……唉……唔……唔知呢?我相信我表達咗我想表達嘅嘢,我都相信佢都有感覺嘅。佢應該 get到,但係唔知 get到幾多呢?

你拍過幾多次拖?

我唔係好多拍拖經驗咋,第一次拍拖拍咗九年,第二次差唔多一年……我拍拖經驗唔多啦,但係我細細個就開始拍拖啦,……咦,呢兩句嘢幾押韻喎!

句尾都加個「啦」係唔算押韻㗎,重點係你 13歲就開始拍拖,會唔會太早?

𠵱家會覺得應該聽媽咪話、唔應該咁早拍拖,不過諗落都有好處,我咁細個就開始拍拖,即係話我細細個已經有佢保護、將我同其他男仔隔開,係唔係好似圍牆咁呢?

佢擋開咗其他男仔啫,你咁細個就同佢一齊都未必安全喎!

佢同我一齊九年,始終都知自己做緊咩嘅!總之我哋一齊呢九年就係合法合情合理

佢咁好,又點解要分手?

係性格不合,細個時無嘢重要得過拍拖,男朋友就係全世界。其實細個根本唔知自己想要啲乜,慢慢大家大個,走出社會,發現呢個社會並唔係想像一樣、發覺除咗愛情仲有好多要兼顧、發覺大家步伐開始唔一致,並唔係下下都要陪對方、下下都得閒陪對方……

即係你忙過佢,所以提出分手?

唔係咁樣,點解會咁講呢?係雙方行到嗰一步有個共識,喺所有嘢變質之前可以分開,未至於破壞咗過去嗰九年曾經好美好嘅嘢。重點係,分手之後我體會到,細個成日都覺得冇咗佢唔得、一世人最怕就係分手……但事實上,冇人冇咗邊個會真係唔得,做人又好、拍拖又好,我哋總愛俾個框框自己限制自己嘅可能。不如唔好諗咁多,做咗先算,你永遠唔只呢一步嘅決定,會帶俾你下一步乜嘢機會,你睇下呢一年?我行嘅路就係最好例子!

女神 vs.娘娘

一般市民,如非資深巴打絲打,比如在下,總容易混淆「女神」與「娘娘」,以為規格與用法相同。 sorry,非也!在為準備杜小喬訪問前,惡補多集《男人有話兒》和《我在香港當兵的日子》後,我總算分到何謂女神,而何謂娘娘。

簡單來說女神是完美而不可及的,區區一個宅男,永遠不可能成為女神的兵。

而娘娘則相較平民化,表面看起來有希望可親近;而事實上定時定候給你假希望正是娘娘之所以係娘娘的重點技倆之一。宅男可能有機會做娘娘的兵,但是永遠不可能成為男朋友。

不知道有沒有理解錯,但與娘娘一會,的確長了我不少知識。

杜小喬有幾紅?

YouTube《男人有話兒 3》

YouTube《收兵三十六計》

電視劇 香港電台《醫護人生》

電視劇 張智霖〈你是如此難以忘記〉

廣告  adidas

廣告  3BB.HK

廣告 美心

廣告  Play Station



鍾意就快D Share啦!