【短片】【錫身指數】華嫂佗B四個月食河豚 Mandy Lieu有B三個月做「人肉坐墊」？
2014-12-23 11:35:00
Mandy Lieu自從承認同太陽娛樂老闆周焯華（洗米華）係發展中嘅朋友之後，經常被影到結伴外遊，更被指做男方嘅「人肉坐墊」，自今年8月被爆高調戀上人夫，搞到正印陳慧玲（華嫂）一改低調個性，公開宣示「主權」先喺微信同facebook借文暗示心跡「不喜歡的毒死就好了」、「你只是個賤人」，句句有骨。
其後，華嫂更在老公洗米華拖佢去老友鄺美雲珠寶展當日，晒出凸肚「王牌」，疑佗男B四個月，一向疏爽嘅洗米華先送咗千萬珠寶安撫華嫂，再喺鄺美雲珠寶展當晚，見愛妻睇中300多萬寶石首飾俾老婆，有指Mandy都唔輸蝕，當晚亦按肚去養和醫院睇急症，更有「孕吐」嘅feel，有傳佢去醫院做埋孕婦超聲波檢查，即係兩女都隨時各懷「華種」。
今日有周刊指「華嫂」陳慧玲預產期明年五月，早前仲被影到華嫂去買BB衫，仲專攻藍色，唔知係唔係買畀為肚裡面嗰個「慈枯椗」，不過周刊指華嫂一啲都唔錫身，唔止冇減少應酬，亦都冇戒酒。
上周五更被指，周刊影到華嫂著住三吋高踭，現身老友鄺美雲珠寶展，之後跟黃栢高(Paco)等一班好友去日本高級食府「鮨銀座」食河豚刺身，華嫂完全唔戒口，報道引述知情人士指，華嫂仲飲咗啲酒，不過當時冇人夠膽出聲叫佢唔好食。
不過老公洗米華早前去公司有份投資嘅電影《十月初五的月光》澳門開鏡儀式嗰陣，被問老婆有咗一事，佢就講：「佢身體冇問題，肥咗啫！」唔知係真係「冇餡」，定係想低調處理家有喜事呢?
有指洗米華好尊重華嫂，華嫂要乜，洗米華都會滿足老婆，喺出面亦俾足面老婆，不過華哥對Mandy一樣照顧周到，聽聞佗B女四個多月嘅Mandy現時已全面停工，已返回大馬安胎，順便替洗米華打理當地業務。
該周刊又指，Mandy其實都冇錫身，上月流出Mandy做「人肉坐墊」片，照計佢當時已經懷孕三個月，有傳現時正印「佗仔」，Mandy恐怕都冇機會坐正，甚至唔可能有「名份」，據知Mandy都覺得好心煩，情緒仲唔太穩定，要搵朋友傾心事開解。
(資料圖片)(蘋果日報)
|
鍾意就快D Share啦！
|
|
|