上週二(16日)，肚凸凸 Heidi繞實洗米華出席壹基金慈善晚會，被傳媒連番恭喜時， Heidi甜笑、洗米華則「多謝」默認。
封面
鬥放料 鬥大肚 陀仔大婆險勝陀女 Mandy Lieu
花生嘅嘢，我自細鍾意食，不過呢期確係覺得有啲食滯！
即係咁，名模搭上猛人、正印出馬示威，嗰頭話玩完，呢頭又食住波餅去賭百家樂，盛傳猛人嬲爆放料話斬纜……乜你以為場戲咁就做完？原來戲肉𠵱家先至嚟。最新發展，洗米華拖住大肚正印晒恩愛嘅同時， Mandy Lieu又話又嘔又肚痛喎！衰在陀嘅係 B女，陀仔大婆險勝咗囉！
豪宅入手、身家暴漲、𠵱家連種都話留埋，邊個係扭轉 Mandy命運嘅貴人？正是手下士多啤梨蘋果橙大把女介紹嘅錢國偉！自用又得、送禮都得，開「果欄」咪呢樣好囉！
你的身家如何，你的後宮也必如何！澳門賭業猛人兼太陽娛樂老闆周焯華呢期最係威威。在明，拖住正印 Heidi陳慧玲出席公開場合，上週二（ 16日）兩公婆繞到實去壹基金慈善晚宴，默認懷有第二胎；在暗，遊山玩水賭百家樂有紅顏 Mandy Lieu去到邊陪到邊。可惜， Mandy作嘔睇醫生就冇人陪，更加驚爆正印懷胎四個半月、 Mandy又係懷胎四個半月，又會咁啱？
身價升百倍
芳年 29歲，大馬美國混血的 Mandy來港發展 10多年，娛圈發展一向平平，今年 8月卻突然被週刊拍到搭上澳門猛人洗米華，一週見足三次極盡寵幸，更獲幕後老闆洗米華點名力捧，入行來首次有得擔正，做陶傑處男導演《愛．尋．迷》第一女主角。
本來一個平平無奇混血模，事業高峰都不過係擔任 now電視主持、同李澤楷傳過緋聞， Mandy一躍龍門扭轉亁坤，公開活動買少見少，身家卻突然暴漲，被揭以 9千 1百萬一炮過入手西半山豪宅珒然後，再自資做埋老闆娘開模特兒公司，再唔係手停口停 model妹。
錢國偉拉線搭洗米華
去年九月洗米華 39歲生日，錢國偉帶 bikini𡃁模大隊到賀，雖然 Mandy沒有在報導中出現，不過據悉亦是因為錢國偉介紹而結識洗米華。
大婆出招
Mandy用長腳同人肉梳發箝得洗米華，不過連月以來大婆 Heidi亦不斷出招狙擊，難怪就算留得龍種在， Mandy安胎過程亦情緒麻麻。
睇首映
Mandy被週刊踢爆獲洗米華寵幸後，發聲明公開戀情，正室 Heidi十月即高調拖住洗米華出席《一個人的武林》首映宣示主權。
借把口
11月洗米華豪使五百萬請太座及友人去法國慶祝 Heidi生日，唔使自己出聲，由澳門 Ball后好友李碧君公開鬧爆 Mandy：「你在他們在慶祝她的生日時傳短訊給她的丈夫，你不覺得羞恥嗎？」
貼文鬧
在 fb轉貼文章《女兒寫給父親小三的一封信》後，再於微信鬧多次：「女人不要動不動就和男人生氣，是他不喜歡的，不要動不動就懷疑懷疑那，是他受不了的！學學潘金蓮，不喜歡的毒死就好了，多簡單的事！」
試鏡《夜蒲 2》
據悉，突然拓展生活圈子，結識得澳門猛人並獲寵幸，原來幕後功臣係無綫監製出身、現為電影導演的錢國偉。人稱肥 Wil的錢國偉出晒名愛在女人堆打滾，拍戲專拍《夜蒲》系列攬盡圈中𡃁模，成名作節目《美女廚房》除咗靚女嘉賓，亦有集集都會出現嘅水果小花。士多啤梨蘋果橙儲儲埋埋，自己切生果盤容易，用嚟招呼朋友更方便。
眾所周知，去年九月， Wilson就被拍到廣邀美女過大海，泡製比堅尼人肉佈景板為洗米華慶賀 39歲牛一。雖然當日 Mandy Lieu並冇攝入鏡頭，不過曾經擔任過《美女廚房》嘉賓， 12年肥 Wil開拍《喜愛夜蒲 2》，原來 Mandy Lieu都試過鏡，識做又醒目的 Wilson及後在私人聚會親自帶 Mandy與洗米華見面，成功撮合。
「情緒唔好係真嘅！」
周一（ 22日），事態再有新發展，有報導指 Mandy經理人 Marie親口默認 Mandy腹中肉，經手人除了洗米華並無他人、以及 Mandy已經決定會生下 BB。本刊致電 Marie，她卻指被扭曲意思，她說︰「其實我冇咁講過，我係有同 Mandy用 WhatsApp聯絡，但係唔係生女、經手人係邊個，我唔可以幫佢答！我都係講咗嗰句，係唔係有咗過一排自然會知！（腹中肉係女仔？）咁我哋冇講過呢啲，我唔可以代佢答！據我所知，佢情緒唔好係真嘅，停工亦都係真。不過就唔係因為大肚而推 job，係呢幾個月根本無接過 job。」經理人唔願代答， Mandy電話繼續無回覆，而媒人錢國偉亦極罕見不接電話，睇怕只好繼續食住花生等睇下回分解。
有情歲月
樣靚身材正，搭上洗米華前， Mandy感情生活一向豐富，緋聞男友包括超級富豪級的李澤楷、諧星金剛、和才子型的 G.E.M.的唱片監制 Lupo，不過唯一承認過的只得 07年至 10年間、拍拖四年的台星陳柏霖。當年兩人金童玉女去到邊都連體嬰一樣，可惜 10年突然由女方宣布緣盡。
第二位：何家猜
98年四太梁安琪常伴賭王何鴻燊身邊大出風頭，當年大台播緊《西遊記》，二太藍瓊纓因此揶揄四太：「通臂猿猴點同齊天大聖比」，四太則回敬：「齊天大聖再本事，都逃唔出如來佛祖五指山，佢梗係食咗安眠藥啦，都黐線！」
第一位：玩大劉
08年 10月，甘比由紅顏知己升級，首次懷有大劉骨肉。不過甘比誕女一周後，呂麗君向全港傳媒發聲明表示有人「進取心有目共睹」及有心誤導其初生女兒生父身份，明為爭寵搞大佢。結果大劉震怒，接受週刊訪問鬧爆呂麗君亦話明經濟封鎖，當年亦都食咗全港市民唔少花生。
|
鍾意就快D Share啦！
|
|
|
