丹丹 12年離開大台過檔港視，除咗拍《來生》仲做埋經理人，天堂鳥就係佢捧出嚟。不過今年 8月就以私人理由離職，不過她說：「我轉咗另一間公司，下年會再捧一班新人。」《蘋果日報》圖片
真面目
嫁得快 做過天堂鳥經理人 港視《來生》大陸妹 陳丹丹嫁金融才俊港仔
繼《選戰》、《警界線》後，港視第三套劇《來生不做香港人》上週首播，劇中玩中港矛盾超有共鳴。尤其上週第 6集飾演大陸高層張總嘅陳丹丹，用廣東話同普通話爆 seed鬧張可頤，被網友 like爆。
其實陳丹丹喺大台捱咗十幾年，過咗港視除咗拍《來》劇，仲原來做過天堂鳥經理人，以為劇中丹丹普通話標準係新移民，但原來佢係 100%香港人，仲嫁咗金融才俊老公仔，唔使爆 seed鬧人。
《來生》上週開始首播，張可頤、劉美君搶鏡就意料中事。最驚喜反而係飾演 Isabella張總嘅陳丹丹，劇中除咗做港女公敵北姑，仲成日姣男主角潘燦良（即係蘇玉華真實男友）。其中第 6集用廣東話加埋國語鬧爆張可頤，更加係上週焦點。
床戲好主動
丹丹今次喺《來生》有發揮，但以前喺大台做咗 10年都係 2， 3綫。突然咁多戲，連佢自己都覺得驚，她說：「我初時以為幾場戲咋，點知最後出嚟成 90幾、 100場戲。仲有好多好大膽戲。事前都已經同老公講咗，佢都好放心我，仲同我對稿。」
現實生活中，丹丹老公係金融才俊，仲有個好 cute嘅 3歲寶貝女添！而劇中丹丹要經常誘惑下屬潘燦良，原來之後仲激，「我都係第一次拍呢類戲，都唔係好熟手。都有 NG過，鍚了好多次先 ok。套劇入面我做主動，佢（潘燦良）就係被動，佢要俾我擒，唔知點解每次拍床戲特別多人在場，第一場 kiss戲就喺車入面，嗰場好激烈。」陳丹丹劇中講普通話相當標準，但實情丹丹喺香港出世，除咗係演員，原來做過天堂鳥經埋人。
不過到今年 8月，丹丹就以私人理由辭職。她說：「嚟緊都係想做幕後居多，下年會捧另外一班新人。」咁天堂鳥都有勁敵喎！
齊蔭女神丁樂鍶：食麥記都冇問題！
除《來生》張總陳丹丹又惡又姣，另一位在劇中飾演港女秘書 Lana的丁樂鍶， pure外型加港女性格亦跑出。 09年喺《美女廚房》做美味天使入行， 12年轉投港視，她說：「我係想拍劇先離開 TVB，其實人工係其次，但最令我想走係因為有機會拍劇集。可頤係一個好前輩，佢好樂意教我做戲。有時仲叫我做搶鏡啲，要做得搶過佢。」
劇中丁樂鍶又追星又買名牌袋，但現實她絕非港女，仲話唔介意同男友食麥記，「手袋我自己攞，我都會請男友食飯。食麥記都冇問題，你鍾意嗰個人食咩都好食啦。」又加分囉！
|
鍾意就快D Share啦！
|
|
|
