拒認M字頭o靚模 衛詩雅聞攻城四度喊驚
郭富城日前被爆網上撩女，自稱跟城城拍拖三個月的R小姐，指控城城一腳踏多船媾她的好姊妹M字頭𡃁模，昨有傳M模竟是「翻版熊黛林」、英文名Michelle的衛詩雅，令事件充滿戲劇性，詩雅昨接受本報記者電話訪問急急否認，跟城城劃清界線：「嘩！呢個唔係，一個字：驚！」
■衛詩雅否認是M字頭𡃁模，強調跟城城不算認識，只見過面卻從沒傾偈。
攝影：葉君海
服裝提供：Novelty Lane
■R小姐自稱跟城城拍拖三個月，更公開兩人疑似在社交網交換肉照。
圖片
■城城（左）在電影《踏血尋梅》扮老差骨，有指他曾推薦衛詩雅演出此片。劇照
推掉合作電影
詩雅強調絕不是哪位M字頭𡃁模：「唔係唔係唔係，冇咁嘅事，我唔係傳說中M字女星，亦唔識R小姐，所以將我牽涉入呢件事有啲錯覺嘅。」至於傳城城推薦她拍電影《踏血尋梅》，但要求加兩人床戲，結果詩雅推掉，她說：「之前係有傾過，但檔期有問題同其他原因冇演到。」
問到是否因床戲辭演？詩雅說：「係有性愛場面，自己唔想拍呢啲類型戲，因為嗰段時間情緒有問題，唔係咁開心，唔想拍咁heavy嘅戲，所以推咗，講起床戲有啲驚，之前演過唔鍾意，覺得自己未處理到，費事影響大家。」記者笑問對手是城城都拒絕？她說：「作為演員唔係諗對手係邊個，情緒唔好唔關人物事。」
■城城牽涉入裸聊事件，其經理人小美日前曾發聲明指報道失實。資料圖片
自言唔識城城
詩雅表示不知是否城城推薦拍戲，她說：「同佢應該唔識，只係喺活動見過面，但冇傾偈，電話都冇，之前知道佢關注我Instagram，受寵若驚，我關注番佢，冇網上傾過偈。」她讚城城是好成功的前輩藝人，問若城城追求會否接受？詩雅第四次用驚字形容，並笑說：「擔當唔起，天王喎，好驚㗎，唔係好多人承受到。」
採訪：皓騫
|
鍾意就快D Share啦！
|
|
|
