全城熱爆的娛樂八封新聞 & 時事趣聞 & 生活 + 趣聞
依家啲人話杜如風係「港女典範」，計媽咪姐話，若跟當年嘅「諸葛公主」比，有排都未夠班呀！不過咁，諸葛紫岐自從做咗薛家二少奶兼為人母後，「港女病」似乎少咗好多，母愛果然係偉大嘅！
話說早兩日，媽咪姐撞到諸葛同 1歲囝囝 Arthur遊街。當時有司機、有「姐姐」，但當年嘅公主，竟然親手推 BB車，佢一見到記者，仲即刻用手擋住金叵羅塊面。可惜 Arthur仔啱啱俾花花世界吸引，兩頭望都不知幾寫意！突然被遮擋，梗係 100個唔 like啦，一味掙扎兩頭擰，搞到諸葛都幾狼狽吓。真係「諸葛傻豬」嚟嘅，呢個世界有打格呢個 function㗎嘛！下次唔使遮得咁辛苦嘞。
諸葛一見到記者，即擺手示意唔好影，跟住再用手擋住 Arthur，可惜個仔唔聽話，「姐姐」抱起佢時，佢索性俾個正面任影。真係有其母當年搶鏡真傳。
