全城熱爆的娛樂八封新聞 & 時事趣聞 & 生活 + 趣聞
「渣打馬拉松」唔單止係香港運動界嘅盛事，仲係娛樂圈嘅大事件，眾 artist出嚟跑，隨時仲人齊過啲乜乜乜頒獎禮。呢邊有神嫂徐濠縈，嗰邊又有周柏豪、劉心悠等等，嘩！睇嚟跑馬拉松都不失為一個追星好方法。
出晒名潮得兼跑得嘅徐濠縈，跑到俾老公 Eason叫佢「肯雅徐」，渣馬點少得佢。身為一個運動員，跑緊嗰陣係唔應該姿整，不過跑完就另計！以 3小時 52分 57秒完成全馬賽事。除咗開香檳慶祝，仲要 keep住個 image，即刻換番對潮拖。但搶眼位，其實係啲火紅腳甲呀！
打開波嘅柏豪 BB，都稱得上係運動員，今次同細佬周柏文一齊跑完十公里比賽，即刻話成個人好振奮，不過去到夜晚佢就勁呻「好累」。所以話跑馬拉松真係要量力而為。
圈中跑得嘅女星除咗「肯雅徐」之外，非心悠 BB莫屬。今年佢依然 keep住個好 pure嘅素顏起跑，完成後仲同近日以哭嗓翻唱〈傻女〉嘅李逸朗合照㖭。
為咗跑可以去到幾盡？商台 DJ少爺占喺完成賽事第二日，好感性咁同大家分享，原來佢左腳十字韌帶早年受過傷，仲講到係完全冇復原的可能，呢啲咪叫體育精神囉。
睇 Shiga連詩雅（左）平時弱質纖纖咁，估唔到都會參賽，仲晨咁早拉埋柏豪 BB、陳嘉桓同埋大埔 lulu一齊熱身。不過睇嚟唔係好夠精神咁噃！鬼咩！原來佢前一晚緊張到瞓唔到。
