網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2015年1月1日 星期四

[壹週刊 - 1295] 鎖定目標 買四千萬 屋盛品儒等「老細」蔡一鳳扑槌 盛品儒,蔡一鳳,M1,




探熱針

鎖定目標 買四千萬 屋盛品儒等「老細」蔡一鳳扑槌

亞視前執行董事盛品儒十一月十九日跟澳門銳思集團主席蔡一鳳註冊,揀大台生日好日子娶老婆,另一半隨即被踢結過婚。爆料贈興,不過盛品儒當冇事發生,還孖住老婆去睇樓,目標鎖定四千萬豪宅單位,待他口中的老細(老婆)扑槌,即買!

連走幾場

離開亞視,籌備自己搞網絡科技公司的盛品儒,跟屋企人慶祝完三十八歲生日翌日(十二月二十七日)下午,帶住留港過元旦的老婆連走幾場。

兩公婆由北角屋企出發,由地產經紀帶路,坐七人車到淺水灣道三十七號睇樓,先睇高層單位,之後走落平台,食住風睇周圍環境。第二站是陽明山莊,跟住再去灣仔睇新樓盤示範單位,睇足幾粒鐘接近七點先走人。

走場睇樓,盛品儒說:「我諗住搬,而家自己住嗰度太細,所以要搵個大單位,我哋有共識想同父母一齊住,所以間屋最少都要一千五百呎以上。(價錢呢?)都係市價, around二萬至三萬蚊一呎。(俾老婆話事?)其實佢係我老細,我根本無所謂,佢揸主意,我努力搵錢囉。」

問表哥周焯華有否送結婚賀禮,盛品儒太太笑住澄清:「我同佢冇血緣關係,佢只係我表哥嘅 partner,不過你哋(記者)提我,都會問吓華哥有咩禮物送俾我。」

睇完淺水灣豪宅,二人又到屋苑平台睇附近環境。

第二站再到陽明山莊,蔡一鳳笑住離開,似乎好滿意。

盛品儒今年生日連環慶祝,第一檔先跟圈中老友黎虹讌、莊思敏等食飯打枱波。

生日正日,他就跟老婆及屋企人食飯切蛋糕。

心急生 B

未婚前,盛品儒單身住幾百呎屋無問題,如今即使老婆大部分時間留守澳門,留港時間不多,但地方始終有限加上心急生 B,細屋搬大屋,十萬火急。

「佢哋 plan咗用一年時間搞婚禮,十一月簽咗字結婚,出年十月或者十一月再擺酒,不過未揀到心水地方,本來諗住喺上海同澳門都擺,但而家會一次過一個地方搞掂,男女家都有好多親戚朋友,香港嘅酒店又放唔到咁多圍,所以都幾頭痛。」知情者說。

7月被拍到跟𡃁模當街嘴嘴後,盛品儒氹番當時仍係女友的蔡一鳳,更當眾求婚。

二人早前夫妻檔搞慈善活動,為山區貧童籌款。

蔡一鳳百足咁多爪,賭場副總裁身份外,又跟黃伊汶夾份搞生意,開鋪買珠寶手錶。

盛品儒在亞視時,跟老闆王征經常出鏡,自認是靚仔高層的他,比自己台的藝人人氣更勁。

蔡一鳳澳門朋友多,跟洗米華及華嫂都有一齊玩。

有米家族

活躍於澳門社交圈的盛品儒太太蔡一鳳,有關她的背景有多個不同版本,亦有指其家族成員有菲律賓銀行家、政治人物甚至國民黨高官;有西班牙血統的蔡一鳳是菲律賓華僑,六歲隨家人由中國到菲律賓生活,十六歲舉家移民澳門。現時身兼銳思集團老闆及墨爾本皇冠(澳門區)賭場副總裁的她,父母從事金融及房地產生意,家族身家逾二十億。

坐私人飛機到澳洲 Crown賭場,蔡一鳳亦會帶 VIP客周圍玩。



鍾意就快D Share啦!