2/1 兩人情到濃時，更情不自禁攬攬抱抱，相當溫馨。
娛頭
嗒嫩口法仔 designer 45歲張可頤：老外先滿足到我
港視劇《來生不做香港人》引來不少觀眾關注，劇中飾演強悍霸氣港女「 An霸」的張可頤，入型入格，現實中，亦不愛拖泥帶水； 11年宣布同圈外男友曾安邦分手後，三年來無再拍拖，寧願一個人獨來獨往。
寧缺毋濫，「食齋」三年，張可頤終於有對象；新歡是個中法混血兒，叫 Leonard，今年三十七歲，比四十五歲的張可頤足足後生八年。拍拖見面，張可頤繼續發揮「 An霸」本色，俾錢埋單做埋司機，做晒主導。果然，要老外先可以滿足到張可頤！
望海談心
貼近民情，點出中港矛盾的港視劇《來生不做香港人》被熱捧，高登仔封為神劇，曾經攞過大台視后的張可頤，飾演強悍獨立女強人「 An霸」，上晒身！但現實生活中，張可頤正秘密與一名法國混血兒蜜運中。
上星期五（一月二日）傍晚，張可頤由元朗寓所揸車出尖沙咀海港城，泊車後，上了四樓平台的意大利餐廳 La Locanda，揀了張對住無敵維港景梳化位坐低；五分鐘後，一名老外出現，直接坐在張可頤身邊，同男友排排坐，一副冧樣的張可頤開心到郁晒手，十分忘我，完全冇理會附近的人眼望望。
二人交談夾雜中、英語，老外的廣東話亦頗為流利，間中張可頤又會晒幾句法文，取悅對方。雖然旁邊坐了不少客，但二人態度親暱，沒有避忌。
對住男友，張可頤彷彿回春，不經意托腮凝望，說話時又會掃住小腿，盡顯女性嫵媚；此情此景，同劇中經常黑口黑面的「 An霸」，有很大出入。
照顧周到
十四度低溫坐露天位，男友見張可頤覺凍，立即為她加衣，又主動點了杯熱飲，相當細心。一餐飯 hea足兩個鐘，埋單時，張可頤又突然「復發」，霸住爭俾錢。臨走前，二人靠在 bar枱咬耳仔，傾傾吓，仲忍唔住攬實。
第二日，張可頤再出動到尖沙咀 shopping，在連卡佛男裝部，由鞋、銀包睇到電腦袋，再去埋家品部揀床單，其間張可頤一直傾住電話，全程英語，似是為男友遙控揀床上用品。
本週一（五日）晨早十點，記者發現張可頤和男友在九龍塘又一城歎早餐，同枱還有兩位女性朋友，是日有其他人在場，張可頤和男友表現雖不比之前親密，不過亦經常攞住 iPad一齊睇，睇吓又互相對望一眼，心有靈犀。
食完早餐，張可頤就做司機送男友返工，當駛到觀塘附近，她發現有記者尾隨，立即狂 cut線撇。
法國邂逅
據了解，張可頤的新歡是一名中法混血兒，今年三十七歲，叫 Leonard，在香港住了幾年，任職設計師，所以略懂講廣東話。一年多前，張可頤去法國旅行時由朋友介紹認識對方，當時 Leonard是放長假返法國，所以有時間充當導遊，陪張可頤周圍去，返港後，兩人仍然有保持聯絡，直到大半年前，開始頻密約會，男方為投其所好，不時主動約張可頤行山做運動。
「其實 Maggie（張可頤）最初都有擔心過對方細過自己，唔係咁好，又怕對方玩玩吓，但係經過一段時間觀察，佢覺得 Leonard好好仔，於是俾個機會大家，但佢哋開始咗無耐， Maggie就要返上海三個月拍戲，上個月初先返嚟，但好彩都仲 keep到。」張可頤友人說。
一場誤會
對於同細八年的法仔拍拖，張可頤在電話作回應。
壹：早排你俾人影到有個四眼男去你屋企過夜？
張：真係一場誤會，嗰日有好多朋友嚟我屋企食飯，佢係其中一個，根本乜嘢都冇發生過，冇過夜，我哋絕對唔係拍拖囉！
壹：目前有冇男朋友？
張：我未結婚，當然有正常社交，男性同女性朋友都有好多。
壹：即係有冇拍拖先？
張：咁行街睇戲食飯一定有，呢啲係好正常社交。
壹：你同緊個老外拍拖？
張：（企圖扮傻）外國人？邊個吖？
壹：影到你哋喺尖沙咀同又一城嗰個！
張：哈……哦嗰個，佢係我一個好好朋友嚟啫。
唔怕姊弟戀
壹：你哋都見得好密！隔兩日就見一次。
張：唔係好密啫，朋友見面食飯好正常，你哋唔使咁緊張。
壹：係唔係拍拖？
張：哈哈……我諗暫時嚟講都係太早，我自己都唔知……
壹：你本身介唔介意同外國人發展？
張：其實身邊都有好多來自唔同地方嘅朋友，識朋友唔會分國籍，緣分嘅嘢我覺得冇分國界。
壹：係咪同外國人仲易溝通到？
張：如果有得揀，我係一個好需要空間嘅人，好 enjoy工作，我覺得外國人比香港男仔滿足到我呢方面嘅要求。
壹：介意姊弟戀嗎？
張：其實對方唔係大過你，就係細過你㗎啦，唔使咁敏感嘅。
冇米粥
入行 20年，張可頤甚少公開承認男友身份， 11年與做金融的曾安邦分手後，過去幾年，感情一直冇着落。
上市公司主席董波
入行前，與內地公司主席董波拍拖八年，入行後，因聚少離多分手；直至 05年，張可頤再被拍到與董波夜蒲後當街激吻，被指舊情復熾。
外國口味
愛情無分年齡國籍，圈中不少中女與「港男」拍拖冇結果，口味都轉趨國際化，加上嫩口老外唔介意女友年紀比自己大，大把得揀。
張曼玉
02年與法國導演 Oliver Assayas離婚後，男友清一色外國人，試過搭上細自己七年的德國建築師男友 Ole Scheeren，去年初更驚爆「母子戀」，與足足細十五年的鬼仔 Band友 Adrian拍拖。
|
鍾意就快D Share啦！
|
|
|