元旦日，陳豪拖住懷孕七個月的陳茵媺到圓方拍拖睇戲。
探熱針
一於再生 陳茵媺肚皮無休 陳豪追女講掂數
去年十二月為陳豪誕下大仔陳梓燁（ Aiden）的陳茵媺，過多兩個月又生第二胎，知道今胎又係仔，恨生女的陳豪已經急不及待，氹掂老婆放棄復出計劃，實行生完又生，一於再生，點都要追個女。
放軟手腳
老婆今胎又佗仔！恨做外父的陳豪早前出席活動時表示：「下一個應該係女，最好生夠一隊足球隊。」陳豪唔怕斷擔挑，陳茵媺則唱反調：「咁多小朋友好難 handle，而且我仲好熱愛工作。」兩公婆睇法不一致，趁住大肚婆停工養胎，陳豪出手幫老婆推劇。
「一直都仲有監製搵住 Amiee，佢自己亦心郁想拍番劇，但 Moses唔想老婆出返嚟做，幫佢全部推晒，等 Amiee全職湊 B做家庭主婦，加上 Moses唔想自己啲小朋友年紀相差得太遠，所以佢已經氹掂 Amiee，細仔出世之後，即刻再追個女。」身邊人透露。
陳茵媺復出無期，陳豪亦一樣！以往劇接劇的他，唔理公司詐型，放軟手腳，全年拍得兩部劇。
「拍劇好困身， Moses而家寧願拍吓廣告，接吓登台騷，做嘢時間短咗，但搵得仲多，又多咗時間陪老婆，又可以幫手湊仔，不知幾開心。」
分頭行事
上週四元旦日下午，陳豪同七個月肚的陳茵媺拍拖到 Elements睇戲。預產期在三月的陳茵媺，大褸下的肚皮明顯隆起，但手腳依然纖瘦。
去到戲院後，兩公婆分頭行事，陳豪到自助售票處買飛，陳茵媺就行去小食部排隊，等陳豪買完飛再接力，見周圍人多，陳豪一手拉起圍欄，叫老婆先行入場。
大肚婆食兩人分量，陳豪爆谷熱狗檸檬茶，買到兩隻手都拎唔晒，唯有用嘴唇箝住戲飛入場。
|
鍾意就快D Share啦！
|
|
|